ބަންގްލާދޭޝްގެ ވެރިރަށް ޑާކާގެ ޒަމާންވީ ބާޒާރެއް ކަމުގައިވާ ޗޯކް ބާޒާރުގައި އަލިފަން ރޯވެ އެތައް ބަޔަކު މަރުވެއްޖެއެވެ. ބީބީސީން އެންމެ ފަހުން ޚަބަރުދީފައިވާ ގޮތުގައި މި އަލިފާނުގައި މަރުވި މީހުންގެ އަދަދުވަނީ 78 އަށް އަރާފައެވެ. ޗޯކް ބާޒާރަކީ މީގެ 400 އަހަރުކުރިން މުޢުލް ދަރިކޮޅުން އިންޑިޔާގައި ރަސްކަންކުރި އިރު ހަދާފައިވާ ގަދީމީ އަދި ތާރީޚީ ވިޔަފާރި މަރުކަޒެކެވެ.
ޑާކާގެ ފަޔާ ސާވިސް އެންޑް ސިވިލް ޑިފެންސްގެ ޑިރެކްޓާ ޖެނެރަލް އަލީ އަޙްމަދާ ހަވާލާދީ ބަންގްލާދޭޝްގެ ދަސްޓާ ނޫހުން ޚަބަރުދީފައިވާ ގޮތުގައި ރޭ 10:40 ހާއިރު އަލިފާން ރޯވެފައިވަނީ ޗޯކް ބާޒާރުގައި ހުރި ހާޒީ ވާހިދު މެންޝަން ކިޔާ ފަސް ފަންގިފިލާގެ އިމާރާތެއްގެ އެންމެ ތިރީގައި ހުރި ކެމިކަލް ގުދަނެއްގައެވެ. އަދި އަލިފާންގަނޑު ވަނީ ކައިރީގައި ހުރި ތިން އިމާރާތަކަށާއި، އިޖްތިމާއީ މަރުކަޒަކަށް ހަލުވިކަމާއެކު ފެތުރިފައެވެ.
އަލީ އަހްމަދާ ހަވާލާދީ އޭއެފްޕީން ބުނެފައި ވަނީ އަލީފަން ރޯވީ ކެމިކަލް ގުދަނުގައި ގޭސް ސިލިންޑަރެއް ގޮވައިގެން ކަމަށެވެ.
41 މީހަކަށް އެކި ވަރުގެ އަނިޔާވެގެން ޑާކާ މެޑިކަލް ކޮލެޖް ހޮސްޕިޓަލަށް ގެންގޮސްފައި ވެއެވެ. ބައެއް މީހުން ނުރައްކާތެރި ހާލަތުގައި ތިބުމުން، މަރުވި މީހުން އަދަދު އިތުރުން އެކަށީގެންވާ ކަމަށް އެހީދޭ ފަރާތްތަކުން ބުނެއެވެ.
މިއަދު ފަތިހު ބީބީސީއަށް މައުލޫމާތޫ ދެމުން އަލިފާން ނިއްވުމުގެ މަސައްކަތުގައި އުޅުނު އިސް މަސްއޫލުވެރިއަކު ބުނެފައި ވަނީ މިހާރު އަލިފާން މުޅިން ނިއްވާލެވިފައިވާ ކަމުގައެވެ.
ބީޑީނިއުސް24 އިން ޚަބަރުދޭ ގޮތުގައި އަލިފާންރޯވި އިމާރާތުގެ އެންމެ ތިރީގައި ހުރީ ފިހާރަތަކެވެ. ފުރަތަމަ ފަންގިފިލާ ބޭނުންކުރެވެނީ ޕްލާސްޓިކާއި، ކޮސްމެޓިކްސްއާއި، ބޮޑީ ސްޕްރޭ އަދި ސެންޓުފަދަ ތަކެތި ރައްކާކުރާ ގުދަނެއްގެ ގޮތުގެއެވެ. އޭގެ މަތީ ފަންގިފިލާތަކަކީ މީހުން ދިރިއުޅޭ ތަންތަނެވެ.
"އަލިފާންގަނޑު ފެތުރިގަތް ވަގުތަކީ ޓްރެފިކް ތޮއްޖެހިފައި އޮތް ވަގުތަކަށް ވާތީ، މީހުންނަށް ސަލާމަތް ނުވެވުނު." ފަޔާ ސާވިސްގެ ޑިރެކްޓާ ޖެނެރަލް ވިދާޅުވިއެވެ.
މަންޒަރުދުށް ބައެއް މީހުންނާ ހަވާލާދީ ޓީވީ ޗެނެލްތަކުން ބުނެފައިވާ ގޮތުގައި އަލިފާން ރޯވި އިމާރާތެއްގައި ހުރި ގޭސް ފުޅިތަކެއް، އެކައްޗަށް ފަހު އަނެކެތި ގޮވަމުންދާ އަޑު އިވިފައި ވެއެވެ. އަދި ދުއްވާ ތަކެތި ތޮއްޖެހިފައި އޮތުމުގެ ސަބަބުން ތާށިވެފައި ތިބ ބައެއް އުޅަނދުތަކުގެ ތެޔޮ ޓޭންކުތަކުގައިވެސް އަލިފާން ރޯވެފައި ވެއެވެ.
ޑާކާގައި 2010 ވަނަ އަހަރު ހިނގި އަލިފާނުގެ ހާދިސާއެއްގައި ވެސް 120 އަށްވުރެ ގިނަ މީހުން މަރުވެފައި ވެއެވެ.
