
އަރިއަތޮޅު އުތުރުބުރީ ވެލިދޫ އައިލެންޑް ރިސޯޓަށް އައިސް އުޅުނު އޮސްޓްރޭލިއާގެ ފަތުރުވެރިއަކު މޫދަށް ފައިބައި އުޅނިކޮށް ގެނބިގެން މަރުވެއްޖެއެވެ.
ފުލުހުން ވިދާޅުވީ މިޙާދިސާގައި މަރުވެފައިވަނީ ޢުމުރުން 78 އަހަރުގެ ފިރިހެނެއް ކަމަށެވެ. އޭނާ މަރުވި ކަމުގެ މަޢުލޫމާތު ފުލުހުންނަށް ލިބިފައިވަނީ ހަވީރު 4:49 އެހައިކަންހާއިރު ކަމަށް ފުލުހުން ވިދާޅުވިއެވެ.
ރިސޯޓުތަކުގައި މޫދަށް އެރިއުޅޭއިރު ގެނބިގެން މަރުވާ ފަތުރުވެރިންގެ ޢަދަދު އަންނަނީ ދުވަހެއް ދުވަހަކަށް އިތުރުވަމުންނެވެ. ފާއިތުވި މަހެއްހާ ދުވަސްތެރޭގައި ވެސް މިފަދަ ޙާދިސާތައް ވަނީ ހިނގައިފައެވެ. މިފަދަ ކަން ހުއްޓުވުމަށް ނުވަތަ މަދުކުރުމަށް ކުރަންޖެހޭ ކަންކަމާ ބެހޭގޮތުން ކަމާބެހޭ ފަރާތްތަކުން ގެންދަނީ މަޝްވަރާ ކުރައްވަމުނެވެ.