ބަންގްލާދޭޝްގައި މުސާރަ ބޮޑުކޮށްދިނުމަށް އެދި އިހްތިޖާޖުކުރަމުން ދިޔަ މަސައްކަތްތެރިންގެ 7 ގިނަ ބަޔަކު ވަޒީފާއިން ވަކިކޮށްފިއެވެ.
ބަންގްލާދޭޝްއަށް އެންމެ ގިނަ ބޭރު ފައިސާ ހޯދައިދޭ ސިނާއަތް ކަމުގައިވާ ހެދުން އުފެއްދުމުގައި މަސައްކަތްކުރާ މީހުންގެ 7000 މީހުން ވަޒީފާއިން ވަކިކޮށްފައިވާކަން މަސައްކަތްތެރިންގެ ޖަމްއިއްޔާއިން އިއްޔެވަނީ ޔަގީންކޮށްދީފައެވެ.
ގެޕް، ވޯލްމާޓް، އެޗެ އެންޑް އެމް ފަދަ ދުނިޔޭގެ މަޝްހޫރު ބްރޭންޑްތަކަށް ހެދުން އުފައްދަނީ ބަންގްލާދޭޝްއިންނެވެ. އެއީ 30 ބިލިއަން އެމެރިކާ ޑޮލަރުގެ ސިނާއަތެއްކަމުގައި ވިޔަސް އެ ސިނާއަތުގައި މަސައްކަތްކުރާ މީހުންގެ މިހާރުގެ އެންމެ ކުޑަ މުސާރައަކީ 96 އެމެރިކާ ޑޮލަރެވެ.
ފާއިތުވި ޖަނަވަނީ މަހުގެ ތެރޭގައި ވެރިރަށް ޑާކާއާއި އެރަށުގެ ކައިރީގައިވާ 150 އަށް ވުރެ ގިނަ ކާރުޚާނާގެ މަސައްކަތް ހުއްޓާލައި، މުސާރަ ބޮޑުކުރުމަށް އެދި އިހުތިޖާޖަށް ނުކުތެވެ. އެހެންނަމަވެސް، އިހުތިޖާޖުކުރި މީހުން އެދުނު ކަންތަކަށް އިޖާބަދިނުމުގެ ބަދަލުގައި ގިނަ ބަޔަކު ވަޒީފާއިން ވަކިކުރީއެވެ.
ނޭޝަނަލް ގާމެންޓް ވާކާސް ފެޑެރޭޝަން (އެންޖީޑަބްލިއުއެފް) އިން ބުނި ގޮތުގައި އިހުތިޖާޖުތައް ފެށިފަހުން 4000 އަށް ވުރެ ގިނަ މަސައްކަތްތެރިން 30 އަށް ވުރެ ގިނަ މައްސަލައިގައި ފުލުހުންގެ ތަހުގީގަށް ގެންގޮސް 100 އަށް ވުރެ ގިނަ މީހުން ހައްޔަރުކޮށްފައި ވެއެވެ.
ފާއިތުވި ނޮވެންބަރު މަހު ސަރުކާރުން ވަނީ ހެދުން އުފެއްދުމުގައި މަސައްކަތްކުރާ މީހުންގެ އެންމެ ކުޑަ މުސާރަ މަހަކު 5300 ޓާކާ (63 އެމެރިކާ ޑޮލަރު) އިން 8000 ޓާކާ (96 ޑޮލަރު) އަށް ބޮޑުކޮށްފައެވެ. އެހެންނަމަވެސް މަސައްކަތްތެރިންގެ ޖަމްއިއްޔާތަކުންނާއި، މަސައްކަތްތެރިންގެ ހައްގުތަކަށް މަސައްކަތްކުރާ ޖަމާއަތްތަކުން ގޮވާލާފައިވަނީ އެންމެ ކުޑަ މުސާރަ 16000 ޓާކާ (193 ޑޮލަރު) އަށް ބޮޑުކުރުމަށެވެ. ކާރުޚާނާތަކުގެ ވެރި6ން ބުނަމުން ދަނީ ބައިނަލްއަގްވާމީ ބްރޭންޑްތަކުން ދޭ އަގަށް ބަލާއިރު އެވަރުގެ މުސާރައެއް ނުދެވޭނެ ކަމުގައެވެ.
ޗައިނާއަށް ފަހު ދުނިޔޭގެ ދެވަނައަށް އެންމެ ބޮޑު ހެދުން އުފެއްދުމުގެ ސިނާއަތު އޮތީ ބަންގްލަދޭޝްގައެވެ. އެ ސިނާއަތުގައި 3.6 މިލިއަން މީހުން މަސައްކަތްކުރެއެވެ.
