ދުނިޔޭގެ ޗަސްބިމާ ބެހޭ ދުވަސް ފާހަގަ ކުރުމުގެ ގޮތުން އައްޑޫސިޓީގައި ފެއަރއެއް ބާއްވަން ނިންމައިފިއެވެ. "ވެޓް ލޭންޑް ފެއާ 2019" ގެ ނަމުގައި މި ފެއަރ ބާއްވާނީ ދުނިޔޭގެ ޗަސްބިމުގެ ދުވަސް ކަމަށްވާ ފެބުރުއަރީ ދެވަނަ ދުވަހުއެވެ.
މިފެއަރގައި ބައިވެރިވުމުގެ ފުރުސަތު މިހާރު ވަނީ ހުޅުވައިފައެވެ. މިފެއަރގައި މިފަހަރު ބައިވެރި ކުރުމަށް ހަމަޖެހިފައިވަނީ ޢުމަރުން 9 އަހަރާއި 12 އަހަރާ ދެމެދުގެ 40 ކުދިންނަށް ކަމަށް އައްޑޫ ނޭޗަރޕާކުގެ އެސިސްޓެންޓް ޑިރެކްޓަރ އާމިނަތު އަފާއު ވިދާޅުވިއެވެ. އޭނާ ވިދާޅުވީ ކުދިން ނެގުމަށް ހަމަޖެހިފައިވަނީ ރަޖިސްޓްރީވާ ތަރުތީބުން ކަމަށެވެ.
"ވެޓްލޭންޑް ފެއަރއަކީ ވޯލްޑް ވެޓްލޭންޑް ޑޭ ފާހަގަ ކުރަން އަޅުގަނޑުމެން ބާއްވާ ފެއަރއެއް. ފެއަރ އޮންނާނީ އައްޑޫ ނޭޗަރ ޕާކުގައި. ފެއަރ މިހުޅުވާލީ ނުވަ އަހަރާއި ބާރައަހަރާ ދެމެދުގެ ކުދިންގެ ތެރެއިން ސާޅިސް ކުދިންނަށް. ފުރަތަމަ ރަޖިސްޓްރީ ކުރާ ސާޅީސް ކުދިންނަށް ބައިވެރިވެވޭ ގޮތަށް ހުޅުވާލީ،" އަފާއު ވިދާޅުވިއެވެ.
މިފެއަރގައި އެންމެ ފުރަތަމަ އޮންނާގެ ޙަރަކަތަކީ މެންގްރޫވްސް އާ ބެހޭ މަޢުލޫމާތު ކުދިންނަށް ދިނުމެވެ. އެގޮތުން ނޭޗަރޕާކުގައިހުރި މެންގްރޫވްއާ ބެހޭ ގޮތުން ކުދިންނަށް މަޢުލޫމާތު ދެއްވާނެވެ. އޭގެ އިތުރަށް ނޭޗަރޕާކުގައި ހަދައިފައިވާ ނާސަރީގައި ކޮންމެ ކުއްޖަކު ލައްވައި މެންގްރޫވް ގަހެއް އިންދުން އޮންނާނެއެވެ. "އެ މެންގްރޫވް ގަސް ހެދޭގޮތް ދުވަސްދުވަސްވަރުން ކުދިންނަށް ކިޔާދޭ ގޮތަށް މިއޮންނަނީ،" އަފާއު ވިދާޅުވިއެވެ.
މީގެ އިތުރަށް ރިލޭއެއްގެ ގޮތުގައި ގްރޫޕްތަކަށް ކުދިން ބަހާލައިގެން ކެނޯ ރޭހެއްވެސް ނޭޗަރ ޕާކުގައި ބާއްވާނެއެވެ. އެ ރިލޭ ރޭހުން ވަނަތައް ހޯދާ ކުދިންނަށް އެކުދިންގެ ޢާއިލާއާއެކު ހިލޭ ކެނޯ ދުއްވުމުގެ ފުރުސަތު ލިބޭނެއެވެ.
އޭގެ އިތުރަށް ޗަސްބިމާއި ބެހޭ މަޢުލޫމާތާއި އެތަންތަން ހިމާޔަތް ކުރުމުގެ މުހިންމު ކަމާއި މޫސުމަށް އަންން ބަދަލުތަކާ ބެހޭގޮތުން ކުދިންނަށް މަޢުލޫމާތު ދިނުމުގެ ޙަރަކާތްތަކެއް ވެސް ކުރިއަށް ގެންދަވާނެއެވެ. އެ މަޢުލޫމާތު ތަކަށް ބިނާކޮށް "ވެޓްލޭންޑް ކުއިޒް" އެއްވެސް ކުދިންގެ މެދުގައި ބާއްވާނެއެވެ. "އެ ކުއިޒުން އެއްވަނަ ދެވަނަ ތިންވަނަ އަޅުގަނޑުމެން ހޮވާނަން. އެއްވަނައަށް ފަނަރަ ބޭފުޅަކަށް ހިލޭ ކެނޯ އެންޑް ސްނޯކްލިން ސާވިސް ލިބޭނެ. ދެވަނައަށްދާ ކުއްޖަކަށް ދިހަ ބޭފުޅުންނަށް ކެނޯ އަދި ސްނޯކްލިން ސާވިސް ހިލޭ ލިބޭނެ. ތިންވަނައަށްދާ ކުއްޖަކަށް ކެނޯ އެންޑް ސްނޯކްލިން ސާވިސް ހިލޭ ލިބޭނެ،" އަފާއު ވިދާޅުވިއެވެ.
އަފާއު ވިދާޅުވީ ފެއަރގައި ކުރެހުމުގެ މުބާރާތެއްވެސް ކުރިއަށްގެންދިއުމަށް ހަމަޖެހިފައިވާކަމަށެވެ. ކުރެހުމުގެ މުބާރާތުގެ މަޢުޟޫއަކީ މިއަހަރުގެ ޗަސްބިމުގެ ދުވަހު ޝިއާރު ކަމަށްވާ "މޫސުމަށް އަންނަ ބަދަލުތަކާއި ޗަސްބިން" ކަމަށެވެ. މުބާރާތުން ވަނަހޯދާ ކުރެހުންތައް އަންނަ އަހަރުގެ ޗަސްބިމުގެ ދުވަސް އަންނަންދެން ނެޗަރ ޕާކުގައި ބަހައްޓާނެ ކަމަށް އަފާއު ވިދާޅުވިއެވެ. "މި މުބާރާތް ކޮންމެ އަހަރަކު ބާއްވާ ގޮތަށް އަޅުގަނޑުމެން ހަމަޖެއްސީ. މިއަހަރުތެ ތީމާ ގުޅިގެން ކުރަހާ އެންމެ ރީތީ ތިން ކުރެހުމެއް ހޮވާލައި އެ ތިން ކުރެހުން އައްޑޫ ނޭޗަރޕާކިގެ އެގްޒިބިޝަން އޭރީގައި ބެހެއްޓިފައި ހުންނާނެ ދެން އަންނަ ފަހަރުގެ މުބާރާތާ ޖެހެންދެން،" އަފާއު ވިދާޅުވިއެވެ.
