ނުކުޅެދުންތެރިކަން ހުންނަ މުސްކުޅި މީހަކަށް ސައި ހޮޓަލެއްގައި އަނިޔާކުރި މައްސަލަ ބަލާނެ ކަމަށް ޖެންޑަރ މިނިސްޓަރ ޝިދާތާ ޝަރީފް ވިދާޅުވެއްޖެއެވެ. މިނިސްޓަރ ވިދާޅުވެފައިވަނީ ވީޑިއޯއިން ފެންނަ މަންޒަރަކީ އެއްގޮތަކަށް ވެސް ބަލައިގަނެވޭނެ ކަމެއް ނޫންކަމަށެވެ.
މިނިސްޓަރ ކުރައްވައިފައިވާ ޓްވީޓެއްގައި ވިދާޅުވެފައިވަނީ "ޢުމުރުން ދުވަސްވީ ނުކުޅެދުންތެރިކަން ހުންނަ މީހަކަށް އަނިޔާކުރާ މަންޒަރު ދައްކުވައިދޭ ވީޑިއޯއިން ފެންނަނީ އެއްވެސް ޙާލަތެއްގައި ބަލައިނުގަނެވޭނެ، އަނިޔާވެރި ޢަމަލެކެވެ. މި ޢަމަލު ހިންގި ފަރާތާ މެދު އަޅަން ޖެހޭ ފިޔަވަޅުތައް އެޅުމަށް ބާރުއަޅައި މަސައްކަތްކުރަމުން ގެންދާނަމެވެ"
އެޙާދިސާ ހިންގާފައިވަނީ އައްޑޫސިޓީ ސައިހޮޓަލެއްގެ ތެރޭގައެވެ. އެ ވީޑިއޯ ސޯޝަލް މީޑިއާގައި ޢާއްމު ވުމާއެކު ވަރަށްގިނަ މީހުންގެ ފާޑިކިޔުންތައް ވަނީ އަމާޒުވެފައެވެ. އެ މައްސަލަ ރަނގަޅަށް ބަލައި އެ ޢަމަލު ހިންގި މީހާއާމެދު ފިޔަވަޅު އެޅުމަށް މީހުން ވަނީ ގޮވައިލައިފައެވެ.
އެ ވީޑިއޯއިން ފެންނަ ގޮތުގައި ނުކުޅެދުންތެރިކަން ހުންނަ މީހާއަށް ޙަމަލާ ދިނުމުން އެމީހާގެ ދިފާޢުގައި އެތާތބި އެއްވެސް ބަޔަކު މަސައްކަތްކުރާ ތަނެއް ނުފެނެއެވެ.
މަޢުލޫމާތު ލިބިފައިވާ ގޮތުގައި އެމީހާއަކީ ސިކުނޑީގެ އުނިކަމެއް ހުންނަ މީހެކެވެ.
