ޖޯޑަނުން ދެކޮޅުހަދަމުން ދަނިކޮށް އިސްރާއީލުގެ ދެވަނަ ބައިނަލްއަގްވާމީ ވައިގެ ބަނދަރު އީލާތު ކައިރީގައި ހުޅުވައިފި

ޖޯޑަންގެ އަޤަބާ ކައިރީގައި އޮންނަ އިސްރާއީލުގެ ރަށެއްކަމުގައިވާ އީލާތުގައި އެގައުމުގެ ދެވަނަ ބައިނަލްއަގްވާމީ ވައިގެ ބަނދަރު އިއްޔެ ހުޅުވައިފިއެވެ. އީލާތާ 18 ކިލޯމީޓަރު ދުރުގައި އޮންނަ ރާމޯން އިންޓަނޭޝަނަލް އެއާޕޯޓު އިއްޔެ ހުޅުވައިދިނީ އިސްރާއީލުގެ ބޮޑުވަޒީރު ބެންޖަމިން ނަތަންޔާހޫއެވެ. އެތަނަށް ނަންދީފައި ވަނީ އިސްރާއީލުގެ ފުރަތަމަ އެސްޓްރޮނޯޓަށް ނިސްބަތްކޮށެވެ.

އިއްޔެ އެތަން ހުޅުވަފައިވަނީ ޖޯޑަނުން ދެކޮޅުހަދަމުން ދަނިކޮށެވެ. އެ ވައިގެ ބަނދަރު އޮންނަނީ އަގަބާއާއި އެންމެ 8 މޭލު (13 ކިލޯމީޓަރު) ދުރުގައެވެ. އެހެންކަމުން، ރާމޯން ވައިގެ ބަނދަރަށް ޖައްސަން އަންނަ ބޯޓުތަކަށް ޖޯޑަންގެ ވައިގެ ސަރަހައްދަށް ވަދެވޭނެއެވެ.

އީލާތުގައި ވައިގެ ބަނދަރެއް ހަދާ ވާހަކަ 2015 ވަނަ އަހަރު އިސްރާއީލުން ދައްކަންފެށުމާއެކު ޖޯޑަނުން ވަނީ އެކަމާ ވަރަށް ބޮޑަށް ދެކޮޅު ހަދައި އިހުތިޖާޖުކޮށްފައެވެ. ދެ ގައުމުގެ ވައިގެ ސަރަހައްދު ފުށުއަރާ ހިސާބުގައި ވައިގެ ބަނދަރެއް ހެދުމަކީ ބައިނަލްއަގްވާމީ ގަވާއިދުތަކުން މަނާކުރާ ކަމެއްކަމަށް ބުނެ ޖޯޑަނުން ދިޔައީ މައްސަލަ ޖައްސަމުންނެވެ.

ޖޯޑަންގެ ސިވިލް އޭވިއޭޝަން ރެގިއުލޭޝަން އޮތޯރިޓީގެ ރައީސު ހައިޘަމް މަސްތޫ ހޯމަ ދުވަހު ވިދާޅުވީ ރާމޯން އިންޓަނޭޝަނަލް އެއާޕޯޓު މިހާރު އޮތް ތަނުގައި ހިންގުމަކީ ޖޯޑަން ދެކޮޅު ހަދާ ކަމެއް ކަމުގައެވެ. އޭނާ ވަނީ ބައިނަލް އަގްވާމީ މިންގަނޑުތަކުން ކަނޑައަޅިފައިވާ ވައިގެ ސަރަހައްދުގެ ސިޔާދަތަށް އިހްތިރާމުކުރުމަށް އިސްރާއީލަށް ގޮވައިލައްވާފައެވެ.

މަސްތޫ ވިދާޅޫވެފައި ވަނީ 192 ގައުމަކުން 1944 ވަނަ އަހަރު ސޮއިކޮށްފައިވާ ބައިނަލްއަގްވާމީ މަދަނީ ވައިގެ ދަތުރުފަތުރާ ބެހޭ މުއާހަދާއަށް އިސްރާއީލު އިހްތިރާމުކުރަން ޖެހޭނެ ކަމުގައެވެ. އިސްރާއީލާއި ޖޯޑަންވެސް ވަނީ އެ މުއާހަދާގައި ސޮއިކޮށްފައެވެ.

އޭނާ އިތުރަށް ވިދާޅުވީ ޖޯޑަން ސަރުކާރުގެ ފަރާތުން ޖޯޑަން ސިވިލް އޭވިއަޝް ރެގިއުލޭޝަން އޮތީރިޓީން މިހާރުވަނީ އިންޓަނޭޝަލަން ސިވިލް އޭވިއޭޝަން އެސޯސިއޭޝަން މިމައްސަލަ ހުށަހަޅައިފައެވެ. އަދި އިސްރާއީލު އެ ޖަމާއަތު އުސޫލުތަކަށް ތަބައަވާކަން ކަށަވަރުކުރުމަށް އެދިފައެވެ.

ޖޯޑަނުން ބުނެފައި ވަނީ އެގައުމުގެ ވައިގެ ސަރަހައްދުގެ ސިޔާދަތު ހިމާޔަތްކުރުމަށް ކުރަންޖެހުނު ކޮންމެ ކަމެއް އެގައުމުން ކުރާނެ ކަމުގައެވެ.

ރާމޯން އިންޓަނޭޝަނަލް އެއާޕޯޓަކީ 500 މިލިއަން އެމެރިކާ ޑޮލަރު ޚަރަދުކޮށްގެން ހަދާފައިވާ، 3600 މީޓަރު ދިރު ރަންވޭއަކާއި، އަހަރަކު 2 މިލިއަން މީހުންނަށް ޚިދުމަތް ދެވޭ، 50 ހާސް އަކަމީޓަރުގެ ޓާމިނަލެއް އެކުލެވޭ ވައިގެ ބަނދަރެކެވެ.