ޕާޓީގެ މަސްލަހަތަށްވުރެ ގައުމީ މަސްލަހަތު އިސްކުރެއްވުމަށް ސަރުކާރު ކޯލިޝަނުގެ ޕާޓީތަކަށް ކުރީގެ ރައީސް މައުމޫން އަބްދުލްގަތްޔޫމް އިލްތިމާސް ކުރައްވައިފިއެވެ.
ރައްޔިތުންގެ މަޖިލީހުގެ އިންތިޚާބާހެދި ކޯލިޝަނުގެ ތެރޭގައި ރެނދު ލާފައިވަނިކޮށް ރައީސް މައުމޫން މިއަދު ކުރެއްވި ޓްވީޓެއްގައި ވިދާޅުވީ ކޯލިޝަނުގެ ހުރިހާ ޕާޓީއެއްގެ ކިބައިންވެސް އެމަނިކުފާނު އެދިވަޑައިގެންނެވީ 4 ޕާޓީ ގުޅިގެން ސަރުކާރެއް އުފެއްދި މަގްސޮދު ޙާސިލް ކުރުމަށްޓަކައި ގައުމީ މަސްލަހަތު އިސްކުރުމަށެވެ.
"އަޅުގަނޑުމެން ހަތަރު ޕާޓީ ގުޅިގެން ކޯލިޝަނެއް އުފެއްދީ އިންސާފުވެރި ހެޔޮ ވެރިކަމެއް ގާއިމްކޮށް ރައްޔިތުންގެ އުންމީދުތައް ހާސިލްކޮށް ދިނުމަށް" މައުމޫން ވިދާޅުވިއެވެ.
މަޖިލީހުގެ އިންތިޚާބު ބޯމަތިވެފައިވާއިރު ކޯލިޝަނުގެ ހަތަރު ޕާޓީގެ ތެރެއިން އެމްޑީޕީ އާއި ޖޭޕީގެ މެދުގައި މިހާރު ހޫނު ހަމަލާތަކެއް ދެމުންދަނިކޮށް މައުމޫން ވިދާޅުވީ ގައުމީ މަސްލަހަތަށް އިސްކަން ދެއްވުން އެދިވަޑައިގަންނަވަނީ އިޚްލާސްތެރިކަމާއެކު ކަމަށެވެ.
މަޖިލީހުގެ އިންތިޚާބުގެ ފޯރި ގަދަވެފައިވާއިރު ކުރީގެ ރައީސް މުޙަންމަދު ނަޝީދާއި ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ މެދުގައި ބަހުގެ ހޫނު ހަމަލާތަކެއް ދަނީ ދެމުންނެވެ. އަދި މަޖިލީހުގެ އިންތިޚާބުގައި ޖޭޕީން އެހެން ޕާޓީތަކަކާއެކު ކޯލިޝަން ހަދަން ޖެހިދާނެ ކަމުގެ އިންޒާރުވެސް ގާސިމް ވަނީ ދެއްވާފައެވެ.
