އިނގިރޭސިވިލާތް ޔޫރަޕިއަން ޔުނިއަން (އީޔޫ) އިން ވަކިވުމުގު އުސޫލުތައް ކަނޑައަޅައި އިނގިރޭސި ސަރުކާރުން އެކުލަވާލި އެއްބަސްވުން ފާސްކުރަން އެގައުމުގެ ގާނޫނުހަދާ މަޖިލިސް، ހައުސް އޮފް ކޮމަންސްއަށް ހުށަހެޅުމުން ފާސްނުކޮށް ބޭރުކޮށްލައިފިއެވެ.
މި އެއްބަސްވުން ފާސްކުރަން ހައުސް އޮފް ކޮމަންސްގައި އިއްޔެ ނެގިވޯޓުގައި ބޮޑުވަޒީރު ޓެރޭސާ މޭ ވަނީ ބޮޑު ތަފާތަކުން ބަލިވެވަޑައިގެންފައެވެ. އެއްބަސްވުމާ ދެކޮޅަށް 432 މެންބަރުން ވޯޓުދެއްވި އިރު އެއްބަސްވުން ފާސްކުރަން ވޯޓުދެއްވީ 202 މެނބަރުންނެވެ. ބޮޑުވަޒީރު ޓެރޭސާ މޭ ނިސްބަތްވެވަޑައިގަންނާ ކޮންޒާވެޓިވެ ޕާޓީގެ 118 މެންބަރުން ވަނީ އެއްބަސްވުމަ ދެކޮޅަށް ވޯޓުދެއްވާފައެވެ. މިއީ 1920 ވަނަ އަހަރުގެ ފަހުން އިނގިރޭސިވިލާތުގެ ގާނޫނުހަދާ މަޖިލީހުގައި ވެރިކަން ކުރާ ޕާޓީއަކަށް ލިބުނު އެންމެ ބޮޑު ނާކާމިޔާބީއެވެ.
މި ވޯޓުން ސަރުކާރު ބަލިވުމާއެކު އިދިކޮޅު ލޭބަ ޕާޓީގެ ލީޑަރު ޖެނެމީ ކޯބިން ވަނީ ބޮޑުވަޒީރު ޓެރޭސާ މޭގެ އިތުރުބާރު ނެތްކަމުގެ މައްސަލަ ގާނޫނު ހަދާ މަޖިލީހަށް ވައްދަވާފައެވެ. މިމައްސަލައާ މެދު ބަހުސްކޮށް ވޯޓަށް އެހުން މިއަދު (ބުދަ ދުވަހު) އޮންނާނެއެވެ.
އިނގިރޭސިވިލާތް އަންނަ މާރިޗު މަހުގެ 29 ވަނަ ދުވަހު އީޔޫއިން ވަކިވާންޖެހޭއިރު، އެކަމާގުޅޭ އެއްބަސްވުން ފާސްނުވުމުން އީޔޫގެ ރައީސު ޖާން-ކްލައުޑް ޔަންކާ ވަނީ އެކަމާ ހިތާމަކުރައްވާކަން ހާމަކުރައްވާފައެވެ. އޭނާ ކުރެއްވި ޓުވީޓެއްގައި ވިދާޅުވެފައި ވަނީ "މިއަދު ހަވީރު ހައުސް އޮފް ކޮމަންސްގައި ނެގި ވޯޓުގެ ނަތީޖާ އަހަރެން ފާހަގަކުރަނީ ހިތާމައާއެކުގައެވެ. ޔޫކޭއިން ބޭނުންވާ ގޮތް ވީހާވެސް އަވަހަކަށް ސާފުކޮށްދިނުން އެދެމެވެ. ވަގުތު އައިސް މިޖެހެނީއެވެ."
ހައުސް އޮފް ކޮމަންސްއިން އިއްޔެ އެ އެއްބަސްވުން ބޭރުކޮށްލުމުން އިނގިރޭސިވިލާތް އީޔޫއިން ވަކިވުމަށް (ބްރެގްޒިޓަށް) ދެން ވާނެ ގޮތަކާމެދު މިހާރު ވަނީ ސުވާލު އުފެދިފައެވެ. ބޮޑުވަޒީރު މޭ އައު އެއްބަސްވުމަކާއިގެން އީޔޫއަށް ވަޑައިގަންނަވާނީތޯ، ނުވަތަ އެއްބަސްވަމަކާ ނުލައި ވަކިވާނީތޯ، ނުވަތަ އީޔޫއިން ވަކިވުމާ މެދު އާއްމުންގެ ޚިޔާލު ހޯދަން އަލުން ވޯޓަކަށް ދާނީތޯ މިއީ އުފެދިފައިވާ ސުވާލުތަކެވެ.
ޓެރޭސާ މޭގެ އިތުބާރު ނެތްކަމަށް ފާސްވެއްޖެނަމަ އާއްމު އިންތިޚާބަކަށް ދާންޖެހުމަކީ އެކަށީގެންވާ ކަމެކެވެ. އިއްޔެގެ ވޯޓުގައި ގިނަ އަދަދެއްގެ މެންބަރު އޭނާއާ ދެކޮޅަށް ވޯޓު ދެއްވިޔަސް އޭނާގެ ވެރިކަން ނިމުމަކަށް ގެންނަން އެ މެންބަރުން ވޯޓުނުދެއްވާނެއެވެ. މޭއާ ދެކޮޅަށް ނެގޭ ވޯޓުގެ ނަތީޖާ އެނބުރިގެންދާނީ ސަރުކާރު ހިންގާ ކޯލިޝަނުގައި ހިމެނޭ ކުދި ޕާޓީތައް ވޯޓުދޭ ގޮތަކަށެވެ.
