ކުރިޔަށް އޮތް ރައްޔިތުންގެ މަޖިލީހުގެ އިންތިޚާބުގައި ވާދަކުރައްވައި މަޖިލީހަށް ހޮވިވަޑައިގެންފިނަމަ ރައްޔިތުންގެ މަޖިލީހުގައި މިހާރު ހިނގަމުން އަންނަ މެމްބަރުން ޕާޓީ ބަދަލު ކުރުމާއި ވޯޓު ވިއްކުންފަދަ ހުރިހާ ކަމެއް ހުއްޓުވާނެ ކަމަށް ކުރީގެ ރައީސް މުޙަންމަދު ނަޝީދު ވިދާޅުވެއްޖެއެވެ.
އެމްޑީޕީގެ މަޖިލިސް ޕްރައިމަރީގައި ވާދަކުރައްވާ މުޙަންމަދު ވިޝާމްގެ ކެމްޕޭނު ބައްދަލުވުމެއްގައި ނަޝީދު ވިދާޅުވީ އެމަނިކުފާނު އިންނަވާ ރައްޔިތުންގެ މަޖިލީހުގައި މެމްބަރުން ބޭނުންހާ އެއްޗެއް ނުހެއްދެވޭނެ ކަމަށާއި މެމްބަރުން ބޭނުންހާ ކަމެއް މަޖިލިސް ތެރެއިން ވިޔަނުދެއްވާނެ ކަމަށެވެ.
"އަޅުގަނޑަށްވެސް އެނގޭ ޕާޓީ ބަދަލުކުރަން. ވޯޓްވެސް ވިއްކަން. ތިޔަބޭފުޅުން ހިތައްއަރާ ގޮތެއް މިމަޖިލީހަކަށް ވެގެން ނުދާނެ.'' ނަޝީދު ވިދާޅުވިއެވެ.
މައްޗަންގޮޅީމެދު ދާއިރާގެ އެމްޑީޕީ ޕްރައިމަރީގައި ވާދަކުރައްވާ ނަޝީދު ވިދާޅުވީ އެމަނިކުފާނު މަޖިލީހަށް މިފަހަރު ހޮވިވަޑައިގެންފިނަމަ އެމްޑީޕީގެ މަޖިލިސް މެމްބަރުންގެ ކިބައިގައި ހުންނަންޖެހޭ ހުރިހާ ސިފަތަކެއް އަލުން އަނބުރައި ގެންނަވާނެ ކަމަށެވެ. އެމްޑީޕީގެ ޓިކެޓުގައި މަޖިލީހަށް ހޮވިވަޑައިގަންނަވާ މެމްބަރުން އެމްޑީޕީން ވަކިވެވަޑައިގެން ނުގޮސް ޕާޓީގެ ތެރޭގައި ބައިތިއްބެވިދާނެ ކަމަށްވެސް ނަޝީދު ވިދާޅުވިއެވެ.
ކުރިޔަށް އޮތް ރައްޔިތުންގެ މަޖިލިސް އިންތިޚާބުގައި އެމްޑީޕީގެ ޓިކެޓު ހޯދުމަށް ޕްރައިމަރީ މިމަހުގެ 18 ވަނަ ދުވަހު ބާއްވާއިރު ޕްރައިމަރީގެ ކެމްޕޭން އެމްޑީޕީގެ ތެރޭގައި ފޯރިއާއެކު ދަނީ ކުރިޔަށެވެ. އެމްޑީޕީ ފިޔަވައި ދެން ހުރި ޕާޓީ ތަކުންވެސް އަދި ކުރީގެ ރައީސް މައުމޫނުގެ ފަރާތްޕުޅުންވެސް މަޖިލިސް އިންތިޚާބަށް ކުރިމަތިލާން ބޭނުންވާ ބޭފުޅުން އެކަމަށް އެދުމުގެ ފުރުސަތު މިހާރު ވަނީ ހުޅުވާލާފައެވެ.
