އިނގިރޭސިވިލާތުގެ ވެރިރަށް ލަންޑަނުގައި މުސްލިމުންނަށް ކުރާ ނަފްރަތު އިތުރުވެ ދެވޭ ހަމަލާތައް ގިނަވަމުންދާ ކަމަށް ތަފާސް ހިސާބުތަކުން ދައްކައިފިއެވެ.
ލަންޑަން ފުލުހުންގެ އިސްވެރިއަކު އަރަބް ނިއުސްއަށް ހާމަކުރެއްވި އަދަދުތަކުން އެނގޭ ގޮތުގައި ހަމަލާތައް އިތުރުވަމުން ދާތީ ފުލުހުންދަނީ އެކަން ހުއްޓުވުމަށް މަސައްކަތްކުރަމުންނެވެ. އަދި ގިނަ ހަމަލާތައް ފުލުހުންނަށް ރިޕޯޓުނުކުރެވޭ ކަންވެސް އޭނާ ފާހަގަކުރެއްވިއެވެ.
2018 ވަނަ އަހަރުގެ ޖަނަވަރީ މަހުން ފެށިގެން ސެޕްޓެންބަރު މަހުގެ ނިޔަލަށް މިފަދަ 1003 ހަމަލާ ފުލުހުންނަށް ރިޕޯޓުކޮށްފައި ވެއެވެ. އެއީ އެވްރެޖުކޮށް ބަލާނަމަ ހަފުތާއަކު 26 ހަމަލާއެވެ. 2107 ވަނަ އަހަރު 1662 ހަމަލާ ރިޕޯޓުކުރެވިފައި ވާއިރު، 2016 ވަނަ އަހަރު 1224 ހަމަލާ ރިޕޯޓުކުރެވިފައި ވެއެވެ. ތަންކޮޅެއް ކުރިއަށް ޖެހިލާއިރު 2011 ވަނަ އަހަރު ރިޕޯޓުކުރެވިފައި ވަނި އެންމެ 320 ހަމަލާއެވެ.
"ލަންޑަނުގައި މުސްލިމުންނަށް ކުރާ ނަފުރަތު ބޮޑުވެ ދެވޭ ހަމަލާތައް ދަނީ އިތުރުވަމުން." އަރަބް ނިއުސްއާ ވާހަކަދައްކަވަމުން މެޓްރޮޕޮލިޓަން ޕޮލިސްގެ ޑިޓެކްޓިވް ސާޖަންޓް ޓޯނީ ފޯސައިތު ވިދާޅުވިއެވެ.
އޭނާ ފާހަގަކުރެއްވި ގޮތުގައި މި އަދަދަތަކަކީ ކަންބޮޑުވާންޖެހޭ އަދަދުތަކެކެވެ. އަދި މި ފަދަ ގިނަ ހާދިސާތަކެއް ރިޕޯޓުނުކުރެވި ދާތީ ކަމުގެ ހަގީގީ ނުރައްކާތެރިކަން ދެނެގަތުމަކީވެސް އުނދަގޫ ކަމެކެވެ.
"މުޅި ގައުމަށް ބަލާއިރު ވެސް މިފަދަ ނަފުރަތުގެ ގިނަ ހަމަލާތައް ރިޕޯޓުނުކުރެވި ދާކަން އަހަރުމެންނަށް އެނގޭ. މިފަދަ ހަމަލާތަކުގެ ޝިކާރައަކަށް ވާ މީހުންނަށާ، މިފަދަ ހަމަލާތައް ފެންނަ މީހުންގެ ކިބައިން އަހަރުމެން އެދެނީ ރިޕޯޓުކުރުން." އޭނާ ވިދާޅުވިއެވެ.
