މިހާރު ޖަލު ޙުކުމެއް ތަންފީޒު ކުރައްވަމުން ގެންދަވާ ރާއްޖޭގެ ކުރީގެ ނާއިބު ރައީސް އަދި އެމްޓީޑީގެ ރައީސް އަޙުމަދު އަދީބުގެ ޙާލަތު ގޯސްވެ އަލުން ހޮސްޕިޓަލުގައި ފަރުވާދޭން ޖެހުނީ ޑރ. ގެ އިރުޝާދާ ޚިލާފަށް އެމަނިކުފާނު ޖަލަށް ގެންގޮސްފައިވަނިކޮށް ކަމަށް އެމްޓީޑީން ވިދާޅުވެއްޖެއެވެ.
އެމްޓީޑީން ބޭއްވި ނޫސްވެރިންގެ ބައްދަލުވުމެއްގައި އެޕާޓީގެ ނާއިބު ރައީސް އަދި ވެލިދޫ ދާއިރާގެ މެމްބަރު ޔާމީން ރަޝީދު ވިދާޅުވީ ޑރ. އިރުޝާދު ދެއްވައިފައިވަނީ ސްޓްރޭސް ފްރީ މާޙާއުލެއްގައި އަދީބު ބަހައްޓަވައިގެން ބޭސްފަރުވާގެ ކަންކަން ފުރިހަމަ ކުރެއްވުމަށް ކަމަށެވެ. އޭނާ ވިދާޅުވީ ބޭސްފަރުވާއަށް އިހުމާލު ވުމަކީ އަނިޔާއެއް ކަމަށެވެ. "އަޅުގަނޑުމެން މިދައްކަނީ މީހެއްގެ ފުރާނައާ ގުޅުހުރި ބޭސްފަރުވާގެ ވާހަކަ. އެހެންވީމާ މިކަންކަމަށް އިހުމާލުނުވަމާ ހިނގާށޭ،" ޔާމީން ވިދާޅުވިއެވެ. އޭނާ ވިދާޅުވީ ހޯމް މިނިސްޓަރާއި ކަރެކްޝަނުން ވަނީ އަދީބުގެ ބޭސްފަރުވާގެ ކަންކަމަށް އިހުމާލުވެފައި ކަމަށެވެ.
އަދީބުގޭގައި ބަހައްޓަވައިގެން ފަރުދިނުމަށް ޑޮކްޓަރު ދީފައިވާ މުއްދަތު އެންމެ އަވަހަށް ހަމަވިޔަސް ހަމަވާނީ ޖެނުއަރީ 27 ވަނަ ދުވަހު ކަމަށް ވެސް ޔާމީން ވިދާޅުވިއެވެ. އެހެންނަމަވެސް މުއްދަތު ހަމަވުމުގެ ކުރިން އަދީބު ޖަލަށް ބަދަލުކޮށް މުޅި ޖަލު "ރޭޑު ކުރަން ފެށުމުން" "ސްޓްރެސް ފްރީ" ނުވާނެ ކަމަށް އޭނާ ވިދާޅުވިއެވެ. "އެހެންވީމާ މިހާރުން މިހާރަށް ޑޮކްޓަރުންގެ އިރުޝާދާ އެއްގޮތަށް އަދީބު ގޭގައި ބަހައްޓަވައިގެން ބޭސްފަރުވާގެ ކަންކަން ފުރިހަމަ ކޮށްދެއްވުމަށް އަޅުގަނޑު ހޯމް މިނިސްޓްރީއަށާއި ކަރެކްޝަނަށް ގޮވާލަން،" ޔާމީން ވިދާޅުވިއެވެ.
އޭނާ ވިދާޅުވީ ބޭސްފަރުވާގެ ކަންކަމުގައި ޑޮކްޓަރަށްވުރެ މަތިން ބަސް ބުނެވޭނެ މީހަކު ނުހުންނަވާނެ ކަމަށެވެ. އެހެންނަމަވެސް އެއާ ޚިލާފަށް ޢަމަލުކޮށްގެން އަދީބުގެ ޙާލަތު ގޯސްވުމުން އެކަމުގެ ޒިންމާ އުފާލާނީ ކޮންބައެއްތޯ ވިދާޅުވެ ޔާމީން ވަނީ ސުވާލު އުފައްދަވައިފައެވެ.
