ރިސޯޓަކުން ފައިސާތަކަކާއި މޮބައިލް ފޯނުތަކެއް ވަގަށްނެގި ކަމުގެ ތުހުމަތުގައި މީހަކު ހައްޔަރުކޮށްފިއެވެ.
މިމައްސަލައިގައި ބަންދުކޮށްފައިވަނީ އުމަރުން 33 އަހަރުގެ މީހެއް ކަމަށް ފުލުހުން ވިދާޅުވިއެވެ. އޭނާ ބަންދުކޮށްފައިވަނީ ކޯޓު އަމުރެއްގެ ދަށުންނެވެ. އޭނާ ބަންދު ކުރުމަށްފަހު ބަލައި ފާސްކުރިއިރު ވަގަށް ނަގައިފައިވާ ކަމަށް ބެލެވޭ ފަސް ހާހަށްވުރެ ގިނަ ރުފިޔާއި، 4 މޮބައިލްފޯނާއި، 2 ސިގުރެޓް ކާޓުނު ހިމެނެއެވެ.
މި މައްސަލަ ރ. އުނގޫފާރު ޕޮލިސް ސްޓޭޝަނަށް ރިޕޯޓުކޮށްފައިވަނީ ޖަނަވަރީ 4ވަނަ ދުވަހުގެ ރޭ ގައެވެ. އެރޭ 2:30 ހާއިރު، ރިސޯޓުގެ ބައެއް މުވައްޒަފުން ނިދާ ކޮޓަރިތަކަށް ވަދެ ވައްކަންކޮށް، އެ ރިސޯޓުގެ މުވައްޒަފުންގެ ފިހާރަ ފަޅާލައި ފައިސާތަކެއް ވަގަށް ނަގާފައިވާ ކަމަށް ފުލުހަށް ވަނީ ރިޕޯޓުކޮށްފައެވެ. އެހެންނަމަވެސް އެއީ ކޮން ރިސޯޓެއް ކަމަށް ފުލުހުން ހާމައެއް ނުކުރައްވައެވެ.
މި މައްސަލައިގައި ހައްޔަރުކޮށްފައިވާ މީހާގެ ބަންދާއިމެދު ގޮތެއް ނިންމުމަށް ރ. އުނގޫފާރު މެޖިސްޓްރޭޓް ކޯޓަށް ހާޒިރުކުރުމުން، މިނިސްޓްރީ އޮފް ހޯމް އެފެއާޒުން ކަނޑައަޅާ ތަނެއްގައި ބަންދުގައި ބެހެއްޓުމަށް ހަތް ދުވަހުގެ މުއްދަތެއް ދީފައިވެއެވެ.
މިމައްސަލަ ރ. އުނގޫފާރު ޕޮލިސް ސްޓޭޝަނުންދަނީ ތަޙުޤީޤު ކުރަމުންނެވެ.
