ރައީސް ޢަބްދުﷲ ޔާމީން ޙައްޖުގެ މަތިވެރިއަޅުކަން އަދާ ކުރެއްވުމަށްފަހު އެބުރި ރާއްޖެ ވަޑައިގެން އެއާޕޯޓުން މާލެ ވަޑައިގެންނެވި "ފިނިފެންމާ" ލޯންޗުކޮޅު ގޮވުމުގެ ހާދިސާއާ ބެހޭގޮތުން ރައީސް އޮފީހުގެ ކުރީގެ ތަރުޖަމާނު އިބްރާހީމް މުޢާޒު ޢަލީ ދެއްކެވި ވާހަކަ ޕީޕީއެމުން މިރޭ ދޮކުރައްވައިފިއެވެ.
މުޢާޒު ވަނީ ކުއްލި ޕްރެސްއެއް ބާއްވައި އެ ޙާދިސާއާއި، ރައީސް ޔާމީނާ ބެހޭ ގޮތުން ވާހަކަ ދައްކައިފައެވެ. އޭނާ ވިދާޅުވެފައިވަނީ އެ ހާދިސާގައި އެ ލޯންޗުން އަލިފާނުގެ އެއްވެސް އަސަރެއް ނުދެކޭ ކަމަށެވެ. އެވާހަކަ ފުލުހުންނަށްދިން ބަޔާނުގައި ވެސް ހިމަނާފައިވާނެ ކަމަށް މުޢާޒު ވިދާޅުވިއެވެ. އަލިފާން ފެނުނީ އެމައްސަލަ ތަޙުޤީޤު ކުރައްވަން ރައީސް އެކުލަވާލެއްވި ކޮމިޓީގެ އިސް ބޭފުޅަކަށް ހުންނެވީ އޭރުގެ ހޯމްމިނިސްޓަރު ޢުމަރު ނަޞީރު ދެއްވި ސީޑިއަކުން ކަމަށެވެ.
މުޢާޒު ވިދާޅުވީ އެ ޙާދިސާގައި ރައީސް ޔާމީންގެ މޫނުފުޅުމަތިން އެއްވެސް ހާސްކަމެއް ފެނިގެންނުދާ ކަމަށެވެ. އަދި އެފަދަ ޕްރެސްތައް ރައީސް ބާއްވަނީ ވެލާނާ އިންޓަރނޭޝަނަލް އެއާޕޯޓުގައި ކަމަށާއި ނަމަވެސް އެދުވަހު ޕްރެސް ބާއްވަން ރައީސް ވިދާޅުވީ ޢިއްޒުއްދީން ފާލަމުގައި ކަމަށެވެ. އަދި ރައީސް އޮފީހުގެ ކެމެރާއަކަށް ލޯންޗުގައި އެއްޗެއް ގޮވި މަންޒަރު ރެކޯޑު ކުރެވިފައިވާ ސަބަބާމެދުވެސް އޭނާ ސުވާލު އުފެއްދިއެވެ. އޭނާ ވިދާޅުވީ ޕްރެސްއަށް ތައްޔާރުވުމުގެ އިތުރަށް އެހެން ކަމެއްކުރަން އެދުވަހު އޭނާ ރައީސް އޮފީހުގެ މީޑިއާއަށް ނުއަންގަވާ ކަމަށް ވެސް ވިދާޅުވިއެވެ.
މުޢާޒުގެ މިފަދަ ވާހަކަތައް ކުށްވެރިކޮށް ޕީޕީއެމުން ނެރުނު ބަޔާނުގައި ބުނެފައިވަނީ ޕީޕީއެމްގެ އަސާސީ ޤަވާއިދުގެ ދަށުން މުޢާޒުގެ މައްސަލަ ތަޙުޤީޤުކޮށްދިނުމަށް ސްލޫކީ ކޮމިޓީއަށް ހުށަހަޅައިފައިވާނެ ކަމަށެވެ. އެހެންނަމަވެސް މުޢާޒު ވިދާޅުވީ އޭނާއަކީ އެއްވެސް ޕާޓީއެއްގެ މެމްބަރެއް ނޫންކަމަށެވެ. އޭނާ ވިދާޅުވީ ޕީޕީއެމްގެ މެމްބަރު ކަމުންނާއި ކައުންސިލް މެމްބަރު ކަމުން އޭނާވަނީ އިސްތިއުފާ ދެއްވައިފައި ކަމަށެވެ. އޭނާއަކީ މިހާރު އެއްވެސް މީހެއްގެ ސިޔާސީ "ޓޫލް" އެއް ނޫންކަމަށާއި އެއީ މިނިވަނެއް ކަމަށް ވެސް ވިދާޅުވިއެވެ.
މުޢާޒު ވިދާޅުވީ ލޯންޗު ގޮވި ޙާދިސާ ހިނގި ދުވަހު ރައީސް އިންނެވީ އެހެންޏާ އެމަނިކުފާނު އިންނަވާ ގޮނޑި ނޫން އެހެން ގޮނޑިއެއްގައި ކަމަށެވެ. ރައީސް ޔާމީން ޢާއްމުކޮށް އިންނަވާ ގޮނޑީގައި އެދުވަހު އިންނެވީ ރައީސްގެގެ އަނބިކަނަބަލުން ފާތުމަތު އިބްރާހީމް ކަމަށް ވެސް މުޢާޒް ވިދާޅުވިއެވެ.
