ރައްޔިތުންގެ މަޖިލީހުން ހުސްވެފައިވާ ގޮނޑިތަކުގެ ބައި އިލެކްޝަން ނުބާއްވާނެ ކަމަށް އިލެކްޝަންސް ކޮމިޝަނުން ވިދާޅުވެއްޖެއެވެ.
އެ ކޮމިޝަންނުގެ ރައީސް އަޙުމަދު ޝަރީފް ވިދާޅުވީ އިލެކްޝަންސް ނުބާއްވަނީ މިހާރުގެ ހިނގަމުންދާ މަޖިލީހުގެ ދައުރު ހަމަވެ އަންނަ އަހަރު އާދައުރަކަށް މެމްބަރުން އިންތިޚާބު ކުރުމާ ދެމެދުގައި ވާ މުއްދަތު 6 މަހަށްވުރެ ކުރުވެފައިވާތީ ކަމަށެވެ.
ޤާނޫނުގައި ބުނެފައިވަނީ މެމްބަރަކު އިސްތިއުފާ ދެއްވިޔަސް އިސްތިއުފާ ދެއްވުމާއި އައު ދައުރަކަށް މަޖިލިހަށް މެމްބަރުން އިންތިޚާބު ކުރުމާދެމެދު 6 މަހަށްވުރެ މުއްދަތު ކުރުކަމަށްވާނަމަ އެ ދާއިރާއެއްގެ އިންތިޚާބު ބާއްވަން ނުޖެހޭނެ ކަމަށެވެ.
ރައްޔިތުންގެ މަޖިލީހުގައި މިހާރު ހިނގަމުންދާ ދައުރު އަންނަ އަހަރު ހަމަވާނެއެވެ. އައުދައުރަކަށް މެމްބަރުން ހޮވުމަށް ބާއްވާ އިންތިޚާބު އަންނަ އަހަރު މާރިޗުމަހު ބާއްވާގޮތަށް އިލެކްޝަންސް ކޮމިޝަނުން ވަނީ ނިންމަވައިފައެވެ.
ރައްޔިތުންގެ މަޖިލީހުގެ 6 ގޮނޑިއެއް މިހާރު ވަނީ ހުސްވެފައެވެ. އެއީ މިހާރުގެ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ފުރުއްވަމުން ގެންދެވި ހިންނަވަރުދާއިރާގެ ގޮނޑިއާއި، އެމަނިކުފާނުގެ ނާއިބު ފައިސަލް ނަސީމް ފުރުއްވަމުން ގެންދެވި ކާށިދޫ ދާއިރާގެ ގޮނޑީގެ އިތުރަށް މި ސަރުކާރުގެ 4 މިނިސްޓްރީއަކާ ޙަވާލުވެ ވަޑައިގެންނެވުމަށް 4 މެމްބަރަކު އިސްތިއުފާ ދެއްވުމުން ހުސްވެފައިވާ 4 ގޮނޑިއެވެ.
އެއީ އިކޮނޮމިކް މިނިސްޓަރު ފައްޔާޒު އިސްމާޢީލް ފުރުއްވަމުން ގެންދެވި ގަމުދާއިރާގެ ގޮނޑިއާއި، ޔޫތު މިނިސްޓަރު އަޙުމަދު މަހުލޫފް ފުރުއްވަމުން ގެންދެވި ގަލޮޅު ދެކުނު ދާއިރާގެ ގޮނޑިއާއި، ޑިފެންސް މިނިސްޓަރު މާރިޔާ އަޙުމަދު ދީދީ ފުރައްވަމުން ގެންދެވި، މައްޗަންގޮޅީ އުތުރު ދާއިރާގެ ގޮނޑިއާއި، ފޮރިން މިނިސްޓަރު ޢަބްދުﷲ ޝާހިދު ފުރުއްވަމުން ގެންދެވި ހެންވޭރު އުތުރު ދާއިރާގެ ގޮނޑިއެވެ.
