މިމަހުގެ ކުރީކޮޅު އިސްތަންބޫލުގައި ހުންނަ ސައޫދީ ކޮންސިއުލޭޓަށް ވަނުމަށްފަހު ވީނުވީއެއް ނޭނގި ގެއްލިގެން ހޯދަމުންދާ ސައޫދީ ނޫސްވެރިޔާ ޖަމާލު ޚާޝުޤްޖީ ގެއްލުމުގެ ފަހަތުގައި ވަނި ސައޫދީ އަރަބިއްޔާކަން ކަށަވަރުވެއްޖެނަމަ އެގައުމަށް "ހަރުކަށި އަދަބު ދެއްވާނެކަމުގެ އިންޒާރު އެމެރިކާގެ ރައީސު ޑޮނާލްޑް ޓްރަމްޕް ދެއްވައިފިއެވެ.
"އަހަރުމެން އެކަމަގެ އެންމެ އަޑިއަށް ދާނަން. އަދި އެކަމަށް ހަރުކަށި އަދަބު ދެވޭނެ." ސީބީއެސް ޗެނަލްގެ '60 މިނަޓްސް" ޕްރޮގްރާމަށް ދެއްވި ބަސްދީގަތުމެއްގައި ރައީސު ޓްރަމްޕް ވިދާޅުވެފައި ވެއެވެ. "އަދި މިހާތަަނަށް އެމީހުން (ސައޫދީން) ދަނީ އެކަމަށް އިންކާރުކުރަމުން. އަދި އިންކާރުކުރަނީވެސް ވަރަށް ބޮޑަށް. އެކަންކުރީ އެމީހުންކަމަށް ވެދާނެބާ؟ އާނ! ވެދާނެ." ޓްރަމްްޕް ވިދާޅުވިއެވެ. ދެއްވާނެ ހަރުކަށި އަދަބު ޓްރަމްޕް ހާމަކުރައްވާފައި ނުވެއެވެ.
އަނެއްކޮޅުން، ތުރުކީގައި ހައްޔަރުކޮށްފައި ހުރުމަށްފަހު ދޫކޮށްލި އެމެރިކާގެ ފާދިރީ އެންޑްރޫ ބްރަންސަންއާއި ވައިޓް ހައުސްގައި ބައްދަލުކުރެއްވުމަށް ފަހު ވާހަކަފުޅުދައްކަވަމުން ޓްރަމްޕް ވިދާޅުވީ، ސައުދީ އަރަބިއްޔާ އަށް އެމެެރިކާއިން ވިއްކަން ނިންމާފައިވާ ހަތިޔާރު ވިއްކުން އެ މަަސައްލައާ ގުޅިގެން ހުއްޓާލައިފިނަ އެކަން ވާނީ "މޮޔަ" ކަމަކަށެވެ. އަދި އެމެރިކާ އެއް ފަރާތަށް ޖެހިގެންފިނަމަ ޗައިނާއާއި ރަޝިޔާއިން އެކަމުގަ ފައިދާ ނަގާނެކަމަށެވެ.
ޖަމާލު ޚާޝުޤްޖީއަކީ އެންމެ ފާޅުކަންބޮޑު ގޮތެއްގައި ސައޫދީ ސަރުކާރުގެ ސިޔާސަތުތަކަށް ފާޑުކިޔަމުން އައި އެއް ނޫސްވެރިޔާއެވެ. އަރަބި ނޫސްވެރިންގެ ތެރެއިން އެންމެ މަޝްހޫރު އެއަކު ކަމުގައި ބެލެވޭ ޚާޝުޤްޖީ އަކީ ވޮޝިންޓަން ޕޯސްޓްގެ ލިއުންތެރިއެކެެވެ. އޭނާ ފަހުން ދިރިއުޅެމުން ދިޔައީ އެމެރިކާގައެވެ.
ކުރިން ސައޫދީ ޝާހީ އާއިލާއާ ގާތް ގުޅުމެއް އޮތް، އަދި ޝާހީ ގަނޑުވަރުގައި މުސްތަޝާރެއްގެ ގޮތުގައިވެސް މަސައްކަތްކޮށްފައިވާ ޖަމާލު ޚާޝުޤްޖީ ސައޫދީ ސަރުކާރާ ދެކޮޅަށް ނުކުތީ މިހާރުގެ ވަލީއަހުދު މުޙައްމަދު ބިން ސަލްމާން ގެއްގުޅުއްވާ ޤަޠަރު ހިސާރުކުރުމާ، ޔަމަނުގެ ހަނގުރާމައިގެ ތެރެއަށް ވަނުން ފަދަ ސިޔާސަތުތަކާ މެދު ހިތްހަމަނުޖެހިގެންނެވެ.
އިއްޔެ އުމުރުން 60 އަަހަރު ފުރުނު ޚާޝުޤްޖީ، އޭނާ އިންނަން އުޅޭ ތުރުކީގެ ރައްޔިތެއް ކަމުގައިވާ ޚަދީޖާ ޗަންކޭޒާއި ކައިވެނިކުރުމަށް ބޭނުންވާ ލިޔެކިއުންތަކެއް ހޯދުމަށް މި އޮކްޓޯބަރު މަހުގެ 2 ވަނަ ދުވަހު މެންދުރު އިސްތަންބޫލުގައި ހުންނަ ސައޫދީ ކޮންސިއުލޭޓަށް ވަން ފަހުން އޭނާ ފެނިފައި ނުވެއެވެ. އޭނާ އަތުނުން ނުކުމެގެން ގޮސްފައިވާ ކަމަށް ސައޫދީން ބުނާއިރު ތުރުކީންނާއި، އޭނާ އިންނަން އުޅުނު މީހާ އެކަން ދޮގުކުރެއެވެ. ތުރުކީގެ މަސްއޫލުވެރިން ބުނާ ގޮތުގައި ޖަމާލު ޚާޝުޤްޖީ ވަނީ ކޮންސިއުލޭޓް ތެރޭގައި މަރާލެވިފައެވެ. ނުވަތަ އޭނާ ހައްޔަރުކޮށްގެން ސައޫދީން އޭނާ އެހެންތަނަކަށް ގެންދިޔައީއެވެ.
