ވެރިކަން ބަދަލުކުރުމުގެ މަރުހަލާގައި ކުރެވޭ މަސައްކަތަކީ ސިޔާސީ ޑީލް އެއް ހަދަން ކުރާ މަސައްކަތެއް ނޫން ކަމަށް ޗެއަރމަން އޮފް ޓްރާންސިޝަން ޢަބްދﷲ ޝާހިދް ވިދާޅުވެއްޖެއެވެ. ރައީސް މުންތަޚަބް އިބްރީހީމް މުހައްމަދު ޞާލިޙްގެ ފަރާތުން އިންތިގާލީ މަރުހަލާގެ މަސައްކަތް ކުރިއަށް ދާ ގޮތް މީޑިއާ އާއި ހިއްސާ ކުރުމަށް މިއަދު ބޭއްވި ބައްދަލުވުމުގައި ވާހަކަ ދައްކަވަމުން ޝާހިދް ވިދާޅުވީ ޓްރާންސިޝަން ޓީމުން ކުރަމުންދާ މަސައްކަތަކީ ސަރުކާރުން ރައްޔިތުންނަށް މިހާރު ދެމުންދާ ޚިދުމަތްތައް އާ ސަރުކާރުގެ ފުރަތަމަ ދުވަހުވެސް ފަސޭހަ ކަމާއެކު ލިބޭނޭ ގޮތް އިންތިޒާމު ކުރުން ކަމަށެވެ.
އިންތިގާލީ އޮފީހުގެ ފަރާތުން މީޑިއާ އާއި މިއަދު ބައްދަލުކޮށްފައި މިވަނީ ސަރުކާރު ބަދަލުކުރުމުގެ މަސައްކަތުގެ ތެރެއިން ޓްރާންސިޝަން ޓީމުތައް މިނސްޓްރީ ތަކާއި ކުންފުނި ތަކާއި އެކު ބާއްވާ ބައްދަލުވުންތައް ހުޅުވާލައިގެން ދެފުށް ފެންނަ ގޮތަށް ބާއްވާންޖެހޭ ކަމަށް ބުނެ މީސްމިޑިއާގަިއ ބަހުސްކުރެވެމުންދާ ދަނޑިވަޅެއްގައެވެ.
ޝާހިދު ވިދާޅުވިގޮތުގައި މިހާރު ކުރަމުންދާ މަސައްކަތުގެ ތެރެއިން ޓްރާންސިޝަން ޓީމްތަކުން މިހާތަނަށް ސަރުކާރުގެ 15 މިނިސްޓްރީގެ ތެރެއިން 9 މިނިސްޓްރީ އަކަށާއި އަދި 8 ކުންފުންޏަކަށް ޒިޔާރަތް ކޮށްފައިވެއެވެ. ބައްދަލުވުން ތަކުގެ މައުލޫމާތު ދެއްވަމުން ޝާހިދް ވިދާޅުވީ ކޮންމެ މިނިސްޓްރީއެއްގައި ވެސް މިނިސްޓަރަކު ހުންނަވާތި ޓީމުތަކުން އެންމެ ފުރަތަމަ މިނސްޓަރުގެ އަރިހަށް ކުރަނީ އިޙްތިރާމްގެ ޒިޔާރަތެއް ކަަމަށެވެ. އެއަށްފަހު ސަރުކާރުން ކުރައްވާ މަސައްކަތްތައް ދެނެގަންނަނީ މިނިްސްޓްރީ ތަކާއި ކުންފުނި ތަކުގެ ސިވިލް ސާވަންޓުން މެދުވެރިކޮށް ކަމަށް ޝާހިދް ފާހަގަކުރެއްވިއެވެ.
"މިވަގުތު މިކުރަނީ އިދާރީ މަސައްކަތް. އެއްވެސް ސަރުކާރުގެ އިދާރާއަކަށް އަޅުގަނޑުމެންގެ ޓީމުތަކުން ގޮސް އެ އިދާރާއެއްގެ މުއައްޒަފުންނާ ސިޔާސީ ވާހަކަތަކެއް ނުދައްކާނެ. މީކީ ސިޔާސީ ޑީލްތަކެއް ހަދަންކުރާ މަސައްކަތެއް ނޫން"، ޝާހިދް ވިދާޅުވިއެވެ. ޝާހިދް ވިދާޅުވިގޮތުގައި މަސައްކަތް ހިނގަނީ މިނސްޓްރީތަކާއި ކުންފުނިތަކުން ވަރަށް ބޮޑަށް އެއްބާރުލުން ލިބިގެން، ދެފަރާތް ގުޅިގެން އޮމާންކަމާއެކު ކަމަށެވެ. އެހެންކަމުން މަސައްކަތް ނިމިގެން ދާއިރު ފެށިފައިވާ ރޫޙުގައި ކުރިއަށް ގެންދެވޭނެ ކަމުގެ އުއްމީދު އެބައޮތް ކަމަށް ވެސް އެމަނިކުފާނު ވިދާޅުވިއެވެ. ޝާހިދު ވިދާޅުުވިގޮތުގައި ސިޔާސީ ގޮތުން ކިތަންމެ ޚިޔާލު ތަފާތުވިޔަސް އާ ސަރުކާރު ހިނގާނީ ތަހްޒީބީ ނިޒާމެއްގެ ތެރެއިން ކަމަށެވެ.
ޝާހިދް ވިދާޅުވިގޮތުގައި އިންތިގާލީ ޓީމްތަކުން ކުރަމުންދާ މަސައްކަތާ ބެހޭ މައުލޫމާތު އެބޭފުޅުން ހާމަކަން ބޮޑު ގޮތެއްގައި މީޑިއާއަށް ހާމަކުރަމުން ގެންދަވާނެއެވެ. އެގޮތުން ކޮންމެ ދުވަހަކު މެންދުުރު 2:30 ގައި ރައީސް މުންޠަޚަބްގެ ތަރުޖަމާނު އަލްއުސްތާޒާ މާރިއާ އަޙްމަދް ދީދީ މީޑިއާ އާއި ބައްދަލުކުރައްވައި މީޑިއާގެ ސުވާލުތަކަށް ޖަވާބު ދެއްވާނެ ކަމަށް ވެސް ޝާހިދު ވިދާޅުވިއެވެ.
