"ފަހި 913 ކުޅިވަރު ފެސްޓިވަލް" އަކީ ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމުގެ ވެރިކަމަށް 913 ދުވަސް ވެގެން އެކަންފާހަގަކުރުމުގެ ގޮތުން ބޭއްވި ކުޅިވަރު ފެސްޓިވަލެކެވެ.
"ފަހި 913 ކުޅިވަރު ފެސްޓިވަލް" ބޭއްވުމުގެ މަޤްސަދަކީ ހުރިހާ ޢުމުރެއްގެ މީހުންނަށް ވެސް ކުޅިވަރު ކުޅުމުގެ ފުރުޞަތު ހޯދައިދީ އުފާވެރި މާޙައުލެއް ގާއިމްކޮށްދިނުންކަމަށް ރައީސް ޔާމިން ކެމްޕެއިން އޮފީހުން މަޢުލޫމާތުދެއްވައެވެ. މިއީ ރާއްޖޭގައި މިފަދަ ގޮތަކަށް ކުރިއަށް ގެންދިޔަ ފުރަތަމަ ފެސްޓިވަލްކަން ވެސް ފާހަގަކޮށްލެވެއެވެ. މިފެސްޓިވަލް އިންތިޒާމުކުރީ ރައީސް ޔާމީން ކެމްޕެއިން އޮފީހުންނެވެ.
ކުޅިވަރު އެކުވެނި ދަނޑުގައި ކުރިއަށް ގެންދިޔަ، "ފަހި 913 ސްޕޯޓްސް ފެސްޓިވަލް" އަށް، ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމާއި، އެމަނިކުފާނުގެ އަނބިކަނބަލުން ފާޠިމަތު އިބްރާހީމް ޒިޔާރަތް ކުރެއްވިއެވެ.
މި ޒިޔާރަތުގައި، ރައީސުލްޖުމްހޫރިއްޔާގެ ދެކަނބަލުން ވަނީ މި ފެސްޓިވަލުގައި ހިނގަމުންދިޔަ ކުޅިވަރުތައް ބައްލަވާލައްވާފައެވެ. މީގެ ތެރޭގައި، އަންހެނުން އަދި ފިރިހެނުންގެ ފުޓުބޯޅަ، ހޭންޑްބޯލް، ބާސްކެޓް، ބަށި، ބައިބަލާ އަދި ދުވުމުގެ މުބާރާތުގެ އިތުރުން ކުޑަކުދިންނަށް ޚާއްޞަ ކުޅިވަރުތަކެއް ވަނީ ކުރިއަށް ގެންގޮސްފައެވެ. ރައީސުލްޖުމްހޫރިއްޔާގެ ދެކަނބަލުން ވަނީ ކުޅިވަރުތައް ބައްލަވާލެއްވުމަށްފަހު، މި ފެސްޓިވަލުގައި ހިމެނޭ ކުޑަކުދިންގެ އެކަޑެމީތަކުގެ ބައިވެރިންނާ ބައްދަލުކުރައްވާ ފޮޓޯ ނަންގަވާފައެވެ. މި ފެސްޓިވަލަށް، ރައީސުލްޖުމްހޫރިއްޔާގެ ދެކަނބަލުން މި ކުރެއްވި ޒިޔާރަތުގައި، "ފަހި 913" ކޭކުފެޅުމުގެ ރަސްމިއްޔާތުގައި ވަނީ ބައިވެރިވެވަޑައިގެންފައެވެ.
މި ރަސްމިއްޔާތުގައި، ރައީސުލްޖުމްހޫރިއްޔާގެ އަރިހުގައި، ވަޒީރުންގެ މަޖިލީހުގެ މެންބަރުންނާއި، ސަރުކާރުގެ ބައެއް އިސް ވެރިން ބައިވެރިވެވަޑައިގެންނެވިއެވެ.
