ގައުމަށް ތަރައްގީ ބޭނުންވާ ކަމަށްވަނަމަ އެކަން ރައްޔިތުންނަށް އިހުސާސްވާން ޖެހޭ ކަމަށް އިއްތިހާދުގެ ރިޔާސީ ކެންޑިޑޭޓް އިބްރާހީމް މުހައްމަދު ސާލިހު (އިބޫ) ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ކެމްޕޭން ދަތުރުފުޅެއްގައި އއ. ހިމަންދުއަށް މިއަދު ވަޑައިގެން އެރަށުގެ ރައްޔިތުންނާ ބައްދަލު ކުރައްވައި ދެއްކެވި ވާހަކަ ފުޅުގައެވެ.
"ތަރައްގީ ގައުމަށް ގެންނަން ބޭނުންކަމަށް ވަންޏާ ފުރަތަމަ އެބަޖެހޭ ރައްޔިތު މީހާއަށް އެކަން އިހުސާސްވާން. ތިމާއަށް ހަމަޖެހިލައިގެން އާއިލާއާއެކު އުޅެވެންއެބަޖެހޭ. އަސާސީ ބޭނުންތައް ފުދެން އެބަޖެހޭ،" އިބޫ ވިދާޅުވިއެވެ. އެހެންނަމަވެސް އެބޭފުޅުން ވަޑައިގަންނަވާ ކޮންމެ ރަށަކުންވެސް އިވެނީ އެހެން އަޑުތަކެއް ކަމަށްވެސް ވިދާޅުވިއެވެ.
އިވޭއަޑަކީ، ސާފު ބޯފެން ނުލިބޭ ވާހަކައާއި، ނަރުދަމާއާއި، ރަނގަޅަށް ސިއްހީ ޚިދުމަތާއި، ދަރިވަރުންނަށް ކިޔަވައިނުދެވޭ ވާހަކައާއި، ލަފާފުރަން ދަތިވާ ވާހަކައާއި، ކަރަންޓު ނެތްވާހަކަ ކަމަށް އިބޫ ވިދާޅުވިއެވެ. އެހެންނަމަވެސް މިއީ އެކާވީސްވަނަ ގަރުނުގައި މިފަދަ އާމްދަނީއެއް ލިބޭ ގައުމެއްގައި ކަންއޮންނަންވީ ގޮތެއް ނޫން ކަމަށް އެމަނިކުފާނު ވިދާޅުވިއެވެ. ރައްޔިތުން ދައްކާފައިސާއާ އެއްކޮށް ރާއްޖެއަށް ލިބޭ އާމްދަނީއަށް ބަލާއިރު މިފަދަ އެއްވެސް ޚިދުމަތެއް ނުލިބޭ ނުވަތަ ތަރައްގީ ވެފައިނުވާ އެއްވެސް ރަށެއް އޮވެގެން ނުވާނެ ކަމަށް އިބޫ ވިދާޅުވިއެވެ.
އިބޫ ވިދާޅުވީ އެމަނިކުފާނުގެ ވެރިކަމުގައި ހިމަންދުއަށް ބޭނުންވާ އަސާސީ ހުރިހާ ކަމެއް ކޮށްދެއްވާނެ ކަމަށެވެ. އަދި ލަފާފުރުމުގެ ދަތިކަން ހައްލު ކުރުމަށްޓަކައި އެރަށުގެ ބަނދަރު ހައްދަވައި ދެއްވާނެ ކަމަށް ވެސް ވިދާޅުވިއެވެ. އަދި ރާއްޖޭގެ ހުރިހާ ރަށެއްގައި ސާފު ބޯފެނާއި ނަރުދަމާގެ ޚިދުމަތް ވެސް ގާއިމްކޮށްދެއްވާނެ ކަމަށް ވިދާޅުވިއެވެ.
"ސިއްހީމަރުކަޒުތަކާއި ލެބޯޓަރީހެދި، ސްކޫލަށް ބޭނުންވާ އިމާރާތްތައް އިތުރުކުރެވި ބޭނުންވާ މުދައްރިސުންނާއި ބޭނުންވާ ސާމާނު ހޯދައިދީ ސްކޫލުގައި ރަނގަޅަށް ތައުލީމް ލިބިގެންދާނެގޮތް ހެދިގެންދާނެ. މިކަންތައްތައް މިރަށަށް ވެސް ފަހިވެގެންދާނެ. މިރަށުގެ ސްކޫލަށް ބޭނުންވާ 4 ކުލާސްރޫމާއި ސިއްހީމަރުކަޒަށް ބޭނުންވާ ލެބޯޓަރީ އިރާދަކުރެއްވިއްޔާ ގާއިމުކުރާނަން،" އިބޫ ވިދާޅުވިއެވެ.
ޒުވާނުންނަށް ފުޓުބޯޅައާއި ވޮލީއާއި އަދިވެސް އެހެން ކުޅިވަރުތައްވެސް ކުޅެވޭނެ އިންތިޒާމް ހަމަޖެހިފައި ހުންނަން އެބަޖެހޭ ކަމަށްވެސް އިބޫ ވިދާޅުވިއެވެ. އެގޮތުން ހިމަންދޫގައި ރަނގަޅު ފުޓުބޯޅަ ދަނޑެއް އަޅުއްވައި ދެއްވާނެ ކަމަށް ވެސް ވިދާޅުވިއެވެ. އެމަނިކުފާނު ވިދާޅުވީ ރިޔާސީ އިންތިޚާބު ބޯމަތިވެފައިވާ މިދަނޑުވަޅުގައި އެންމެން ގުޅިގެން މަސައްކަތްކޮށް އެމަނިކުފާނު ވެރިކަމަށް އިންތިޚާބު ކޮށްދެއްވުމަށް އިބޫ އެދިވަޑައިގެންނެވިއެވެ. މި ފުރުސަތު ނަގައިލައިފި ކަމަށްވާނަމަ އަނެއްކާވެސް މާޒީގެ ތެރެއަށް ގައުމުދާނެ ކަމަށް އިބޫ ވިދާޅުވިއެވެ.
