ވެރިކަން ލިބިއްޖެ ކަމަށްވާނަމަ ކޮޅުމަޑުލު ހިރިލަންދުއަށް ދިމާވެފައިވާ ބިމުގެ މައްސަލަ އަށް ހައްލު ހޯއްދަވައި ދެއްވާނެ ކަމަށް ގުޅިފައިވާ ޕާޓީތަކުގެ ރިޔާސީ ކެންޑިޑޭޓް އިބްރާހީމް މުހައްމަދު ސާލިހު (އިބޫ) ގެ ރަނިންމޭޓް ފައިސަލް ނަސީމް ވިދާޅުވެއްޖެއެވެ.
ކެމްޕޭން ދަތުރުފުޅެއްގައި ހިރިލަންދުއަށް ވަޑައިގެން އެރަށު ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައި އޭނާ ވިދާޅުވީ އެރަށަށް ދިމާވެފައިވާ ބިމުގެ ޖާގައިގެ މައްސަލައިގެ އިތުރަށް ސްކޫލަށް ދިމާވެފައިވާ ޖާގައިގެ މައްސަލަވެސް އެބޭފުޅުންގެ ވެރިކަމުގައި ހައްލު ކޮށްދެއްވާނެ ކަމަށެވެ. އެރަށުގެ ފަޅުން ބިންހިއްކައި އިތުރުވާ ޖާގައިން ރައްޔިތުންނަށް ބޭނުންވާ ގޯތިތަކާއި ސިނާއީ މަސައްކަތްކަށް ބޭނުންވާ ބިންތައް ވެސް ލިބޭނެ އިންތިޒާމް ހަމަޖައްސަވައި ދެއްވާނެ ކަމަށް އެމަނިކުފާނު ވިދާޅުވިއެވެ.
ކޮޅުމަޑުލުގެ ރަށްރަތަށް ކުރައްވާ ދަތުރުފުޅުގައި ހިރިލަންދުއަށް ފައިސަލް ވަޑައިގެންނެވުމުން އެރަށުންވަނީ އޭނާއަށް ވަރަށް ހޫނު މަރުހަބާއެއް ދަންނަވައި ތަރުހީބު ދެއްވާކަން ހާމަކޮށްފައެވެ. މިދަތުރުފުޅުގައި އެއަތޮޅުގެ 13 ވަރަކަށް ރަށަށް އެމަނިކުފާނު ވަޑައިގަންނަވާނެއެވެ.
ފައިސަލް ތ. އަތޮޅުގައި މަސައްކަތް ކުރައްވަމުން ގެންދަވާއިރު އިބޫ ގެންދަވަނީ ނ. އަތޮޅަށް ވަޑައިގެން ކެމްޕޭން ކުރައްވަމުންނެވެ.
