ޔޫރަޕުގެ އިއްތިހާދުން އިނގިރޭސިވިލާތް ވަކިވެއްޖެނަމަ، އިޤްތިސާދީ ފުރުސަތުތައް ލިބުމުގައި އިނގިރޭސިވިލާތް އޮންނާނީ ކިޔުގެ އެންމެ ފަހަތުގައި ކަމަށް އެމެރިކާގެ ރައީސް ބަރަކް އޮބާމާ ވިދާޅުވުމާ ގުޅިގެން މިމައްސަލާގައި އިނގިރޭސިވިލާތުގައި ދެބަސްވުންތަކާއި ޚިޔާލުތަފާތުވުންތައް އިތުރުވެއްޖެއެވެ.
ޔޫރަޕުގެ އިއްތިހާދުގައި އިނގިރޭސި އޮންނަން ފެންނަތޯ ބެލުމަށް އަންނަ ޖޫން މަހުގެ 23 ވަނަދުވަހު ބޭއްވުމަށް ހަމަޖެހިފައިވާ ރެފެރެންޑަމް ގައި އނގިރޭސިވިލާތުން އެއިއްތިހާދުގައި އޮންނަން ނުފެންނަކަމަށް ނިންމައިފިނަމަ، އިޤްތިސާދީ ފުރުސަތުތައް ލިބުމުގައި އިނގިރޭސިވިލާތް އޮންނާނީ ކިޔުގެ އެންމެ ފަހަތުގައި ކަމަށް އެމެރިކާގެ ރައީސް ބަރަކް އޮބާމާ ވިދާޅުވީ، އެމަނިކުފާނު މިހާރު އިނގިރޭސިވިލާތަށް ކުރައްވަމުންދާ ދަތުރުފުޅުގައި އިނގިރޭސިވިލާތުގެ ބޮޑުވަޒީރު ޑޭވިޑް ކެމެރަންއާއެކު ބޭއްވި ޚާއްސަ ނޫސްވެރިންގެ ބައްދަލުވުމެއްގައެވެ.
ޔޫރަޕްގެ އިއްތިހާދުން އިނގިރޭސިވިލާތް ވަކުވުމަށް ތާއީދުކުރާ އެޤައުމުގެ ބައެއްބޭފުޅުން ވަނީ އެމެރިކާގެ ރައީސް، އިނގިރޭސިވިލާތުގެ ނިންމުންތަކަށް ނުފޫޒު ފޯރުވަން އުޅޭކަމަށް ވިދާޅުވެ ވަރަށް ބޮޑަށް ނުރުހުން ފާޅުކުރައްވާފައެވެ.
އެހެންނަމަވެސް ހުރިހާ ދާއިރާ އަކުންވެސް އިނގިރޭސިވިލާތާށް ކުރިއެރުން ލިބެމުންދަނީ ޔޫރަޕުގެ އިއްތިހާދުގައި އެޤައުމު އޮވެގެންކަން، އެމަނިކުފާނު ޤަބޫލުފުޅުކުރައްވާކަމަށް އޮބާމާ ވަނީ ވިދާޅުވެފައެވެ.
އިނގިރޭސިވިލާތަށް އޮބާމާ ކުރައްވާ ދަތުރުފުޅަކީ ރައީސްކަމުގައި ހުންނަވައިގެން ޤައުމުންބޭރަށް ކުރައްވާނެ އެންމެފަހު ދަތުރުފުޅުކަން ފާހަގަކޮށްލެވެއެވެ. މި ދަތުރުފުޅުގެ ތެރެއިން އޮބާމާއާއި އެމަނިކުފާނުގެ އަނބިކަނބަލުން ވަނީ އިނގިރޭސި ރާނީ އެލިޒަބެތްގެ އުފަންދުވަހުގެ މުނާސަބުގައި ހެޔޮއެދުމާއި ތަހުނިޔާ ދަންނަވާފައެވެ.
