ރާއްޖޭގައި ފަތުރުވެރިކަން ތަރައްގީ ކުރެއްވުމުގެ ސިޔާސަތުގެ ދަށުން މިއަހަރުގެ ޑިސެބަރުގެ ނިޔަލަށް ރާއްޖޭގައި 21 ރިސޯޓެއްގެ މަސައްކަތް ނިމޭނެ ކަމަށް ރައީސުލްހުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ.
ރައީސް ޔާމީން މިގެން ވިދާޅުވީ ކޮޅުމަޑުލުގެ ބައެއް ރަށްރަށަށް ކުރެއްވި ތިންދުވަހުގެ ދަތުރުފުޅުގައި މަޑިފުއްޓަށް ވަޑައިގެން އެރަށުގެ ބިންހިއްކުމުގެ މަޝްރޫއުގެ ނިމުން ފާހަގަކުރެއްވުމަށާއި، އެރަށުގައި ހިއްކާފައިވާ ސަރަޙައްދު ހިމާޔަތްކުރުމުގެ މަޝްރޫއިގެ ނިމުން ފާހަގަކުރެއްވުމަށާއި، އަދި، ނަރުދަމާ ނިޒާމްގެ ޚިދުމަތް ރަސްމީކޮށް ފައްޓަވައިދެއްވުމަށް ބޭއްވެވި ރަސްމިއްޔާތުގައި ވާހަކަފުޅު ދައްކަވަމުންނެވެ. އެމަނިކުފާނު ވިދާޅުވީ އެ ރިސޯޓުތަކުގެ 75 އިންސައްތަ މިހާރުވަނީ ނިމިފައި ކަމަށެވެ.
މި ސަރުކާރުގެ މިހިނގާ ފަސްއަހަރު ދުވަހުގެ ތެރޭގައި މިހާތަނަށް 30 އައު ރިސޯޓް ތަރައްގީކޮށް ހުޅުވާފައިވާކަމަށްވެސް އެމަނިކުފާނު ވިދާޅުވިއެވެ. އެމަނިކުފާނު ވިދާޅުވީ ދިވެހި ރައްޔިތުންނަށް ބޭނުންވެފައި ހުރި ކަންތައްތައް ފުރިހަމަ ކޮށްދެއްވައި، އުއްމީދުތަކުގައި ކުލަޖައްސަވައިދެއްވާނީ ވެސް އެމަނިކުފާނު ކަމަށެވެ.
މި ސަރުކާރުގެ މެނިފެސްޓޯގައިވާ ކަންތައްތަކުގެ ތެރެއިން ފުދިގެންގޮސްފައިވަނީ ބައިކުޅަބައިކަމަށް އިދިކޮޅު ފަރާތްތަކުން ދައްކަވާ ވާހަކަފުޅުތަކަކީ އެއްވެސް އަސާސެއް ނެތް ވާހަކަތަކެއްކަމުގައި ވެސް ރައީސް ވިދާޅުވިއެވެ. އެމަނިކުފާނު ވިދާޅުވީ ނ. މާފަރު އެއަރޕޯޓަކީ 12 އަހަރު ދުވަހުގެ ތެރޭގައި 3 ސަރުކާރަކުން ކުރަން އުޅެ ނުނިންމުނު މަޝްރޫޢެއްކަމަށާއި، ނަމަވެސް މި ސަރުކާރުން 1 އަހަރު ދުވަހުގެ ތެރޭގައި މާފަރު އެއަރޕޯޓުގެ މަސައްކަތް ނިންމައި ޓެސްޓް ފްލައިޓް ޖައްސާފައިވާ ކަމަށެވެ.
މިއަދުގެ ރަސްމިއްޔާތުގައި ވާހަކަފުޅުދައްކަވަމުން ރައީސުލްޖުމްހޫރިއްޔާ ވަނީ، ކުރިޔަށް އޮތް ރިޔާސީ އިންތިޚާބުގެ ވޯޓާ ހަމަޔަށް ދިޔުމުގެ ކުރިން އިދިކޮޅު ފަރާތްތަކުން ކުރީގައި ދައްކަވާފައި ހުރި ވާހަކަތަކާއި، ކުރައްވާފައިހުރި ކަންކަމާއިމެދު ރައްޔިތުން ވިސްނާލުން މުހިންމުކަމުގައި ވިދާޅުވެފައެވެ.
