ރީރަޖިސްޓްރޭޝަނަށް ހުޅުވައިފައިވާ މުއްދަތު މިއަދު ހަމަވާއިރު ނުވަދިހަފަސް ހާހެއްހާ ފޯމު ލިބޭނެ ކަމަށް އިލެކްޝަންސް ކޮމިޝަނުން ވިދާޅުވެއްޖެއެވެ.
އިލެކްޝަނަށް ބޭނުންވާ ޓްރެއިނަރުން ތަމްރީން ކުރުމަށް މިއަދުފެށި ޕްރޮގްރާމް އިފްތިތާހު ކޮށްދެއްވުމުގެ ރަސްމިއްޔާތުގައި ވާހަކަ ދައްކަވަމުން އިލެކްޝަންސް ކޮމިޝަންގެ ރައީސް އަހުމަދު ޝަރީފް އާދަމް ވިދާޅުވީ މިހާރުވެސް އަށްޑިހަ ހަ ހާސް ފޯމަށްވުރެ ގިނައިން ލިބިފައިވާ ކަމަށެވެ. އެހެން ކަމުން އެއަދަދު އިތުރުވެ ނުވަދިހަފަސްހާހަށް އަރާނެ ކަމަށް އަންދާޒާ ކުރެވޭ ކަމަށް ވިދާޅުވިއެވެ. ޝަރީފް ވިދާޅުވީ އެއަދަދު ލައްކައަކަށް އިތުރުވާނެ ކަމަށް އުންމީދު ކުރައްވާ ކަމަށެވެ. މި އިންތިޚާބަށް އާންމުން ވަރަށްބޮޑަށް ތަރުހީބު ދެމުން ގެންދާ ކަމަށާއީ މިހާރު ރީރަޖިސްޓްރީކޮށްފައިވާ އަދަދަށް ބަލާއިރު އެއީ މީގެ ކުރީގެ އިންތިޚާބަށްވުރެ ދެގުނަ އިތުރު އަދަދެއް ކަމަށްވެސް އޭނާ ވިދާޅުވިއެވެ.
ރީރަޖިސްޓްރީ ކުރުމުގެ މުއްދަތު ހަމަވާނީ މިރޭ 12:00 އަށެވެ.
މިފަހަރުގެ ރިޔާސީ އިންތިޚާބުގައި ވާދަކުރައްވަނީ ޕީޕީއެމްގެ ރިޔާސީ ކެންޑިޑޭޓް ރައީސް ޢަބްދުﷲ ޔަމީނާއި، އިދިކޮޅު ކެންޑިޑޭޓް އިބްރާހީމް މުހައްމަދު ސާލިހު (އިބޫ) އެވެ. އެހެން ކަމުން މިފަހަރުގެ އިންތިޚާބުގައި ދެވަނަ ބުރަކަށް ދާކަށް ނުޖެހޭނެއެވެ.
އިންތިޚާބުގައި ވާދަކުރައްވާނެ ކަމަށް އެންމެފުރަތަމަ ވިދާޅުވި ކުރީގެ ހޯމްމިނިސްޓަރު އުމަރު ނަސީރުވަނީ އެންމެފަހު ވަގުތު ވާދަ ނުކުރައްވަން ނިންމަވައިފައެވެ. 2008 ގެ ރިޔާސީ އިންތިޚާބުގައިވެސް އުމަރު ވާދަކުރެއްވިއެވެ. އެފަހަރު ކުރިމަތި ލެއްވީ ނާކާމިޔާބާއެވެ. 2013 ވަނަ އަހަރު ބޭއްވި ރިޔާސީ އިންތިޚާބުގައި ވާދަ ކުރެއްވުމަށް ޕީޕީއެމްގެ ރިޔާސީ ޕްރައިމެރީގައި ރައީސް ޔާމީނާ ވާދަކުރައްވައިގެން އުމަރަށް ވަނީ ބަލިވެފައެވެ.
އެލްޖީއޭގެ ކުރީގެ ނާއިބު ރައީސް ޝުޖާއު ހުސައިން ވެސް ވަނީ އިންތިޚާބުގައި ވާދަ ނުކުރަން ނިންމަވައިފައެވެ. އިންތިޚާބުގައި ވާދަކުރެއްވުމަށް ފޯމު ހުށަހެޅުއްވި ހުސައިން ނަސީރުގެ ފޯމުގައި މައްސަލަ އުޅޭތީ އިލެކްޝަނުންވަނީ އެފޯމް ބާތިލް ކުރައްވައިފައެވެ.
