ސެޕެޓެމްބަރު 23 ބާއްވާ ރިޔާސީ އިންތިޚާބުގައި ވާދަކުރައްވަން ނިންމަވައިގެން ތިއްބެވި ބޭފުޅުންގެ ތެރެއިން ކުރީގެ ހޯމްމިނިސްޓަރު އުމަރު ނަސީރާއި، އެލްޖީއޭގެ ކުރީގެ ނާއިބު ރައީސް ސުޖާއު ހުސައިން ރިޔާސީ އިންތިޚާބުގައި ވާދަ ނުކުރައްވަން ނިންމަވައިފިއެވެ.
އުމަރު ވިދާޅުވީ މިފަހަރުގެ ރިޔާސީ އިންތިޚާބަކީ ފެންނަ ނުފެންނަ ވޯޓެއް ނަގަން ބާއްވާ އިންތިޚާބެއް ކަމަށެވެ. އާފަތިހަށް މައުލޫމާތު ދެއްވަމުން އުމަރު ވިދާޅުވީ ގައުމު އަމާން މިސްރާބަކަށް ގެންދާނެ ލީޑަރުން އިންތިޚާބު ކުރުމުގެ ވިސްނުމެއް މިހާރުން ފެންނަމުން ނުދާ ކަމަށެވެ. "މިވަގުތު ހާލަތުހުރީ މެނިފެސްޓޯއާއި، ގަބޫލުކުރާ ހަމަތަކާއި އުސޫލުތަކަށް ވޯޓުދޭގޮތަށް ވުރެ ބޮޑަށް ފެންނަން ނުފެންނަ ވޯޓަކަށް. އެހެންވެ އިންތިޚާބުގައި ވާދަނުކުރަން ނިންމީ،" އުމަރު ވިދާޅުވިއެވެ.
އުމަރު ވިދާޅުވީ ރިޔާސީ އިންތިޚާބުގައި ވާދަނުކުރައްވަން ނިންމެވިޔަސް އެއްވެސް ކޮޅަކަށް ތާއީދު ނުކުރައްވާނެ ކަމަށެވެ. "ވާދަ ނުކުރިއަސް އެއްވެސް ކޮޅަކަށް ނުޖެހޭނަން. އަހަރެން ހަމަހުންނާނީ. މިހާރު ކުރިމަތި ލައްވައިފައިވާ އެއްވެސް ބޭފުޅަކަށް ޑެލިވާއެއް ނުކޮށްދެވޭނެ އަހަރެން މިޑިލިވަރ ކުރަންއުޅޭކަންކަން. އެހެންވެ އެމީހުންނާ ވާހަކަ ދެއްކުމުގެ ވެސް ބޭނުމެއްނެތް،" އުމަރު ވިދާޅުވިއެވެ.
އޭނާ ވިދާޅުވީ ރިޔާސީ އިންތިޚާބަށް އޭނާ އެކުލަވާލީ މެނިފެސްޓޯގައި ހިމަނާފައިވާ ކަންކަމާއި މިހާރު ވާދަކުރައްވާ ރައީސް ޔާމީނާއި އިބްރާހީމް މުހައްމަދު ސާލިހު (އިބޫ) ހުށަހަޅުއްވާފައިވާ ކަންކަމާ އަޅާނުކިޔޭނެ ކަމަށެވެ. "އެދެބައި މީހުންނަކީ ވެސް ވެރިކަން ކޮށްފައިތިބި މީހުން. އެއްވެސް ބަޔަކަށް ޑްރަގެއް ނުހުއްޓުވުނު. ކޮރަޕްޝަނެއް ނުހުއްޓުވުނު. އެފަދަ އެހެންކަންކަން ވެސް ނުހުއްޓުވުނު،" އުމަރު ވިދާޅުވިއެވެ.
ރިޔާސީ އިންތިޚާބުގައި ވާދަނުކުރައްވާނެ ކަމަށް ވިދާޅުވެ ސުޖާއު ހުސައިން ނެރުއްވި ބަޔާނުގައި ވިދާޅުވެފައިވަނީ ފާއިތުވި 10 އަހަރަށްބަލާއިރު ރާއްޖޭގައި އުފެދިފައިވަނީ ގޮންމުށުގެ ބާރުން ހިންގާ ކުދިކުދި ޑިކްޓޭޓަރޝިޕްތަކެއް ކަމަށެވެ. އަދި އެއްވެސް ޕާޓީއެއްގެ ތެރޭގައި ޑިމޮކްރަސީއެއް ނެތް ކަމަށް ވެސް ވިދާޅުވެފައިވެއެވެ. އެޕާޓީތައް ހިންގީ ވަކިބަޔަކަށް ސިޔާސީ ތަސައްލީއެއް ހޯދައިދޭން ކަމަށް ވެސް ވިދާޅުވެފައިވެއެވެ. ގައުމަށް ޑިމޮކްރަސީ ގެންނެވުމުގެ ނަމުގައި ކުރިން ވެރިކަން ކުރެއްވީ ބޭފުޅުން ހެއްދެވީ އިތުރުފުޅު ކަމަށާއި ރައީސް ޔާމީން ވަނީ މައްސަލަތަކަށް ހައްލު ހޯއްދަވައި ދެއްވުމުގެ ނަމުގައި ދުސްތޫރީ ނިޒާމް ގަޑުބަޑު ކުރައްވައިފައި ކަމަށް ވެސް ވިދާޅުވިއެވެ.
ރިޔާސީ އިންތިޚާބުގައި ވާދަކުރެއްވުމަށް އިލެކަޝަނަށް ފޯމު ހުށަހެޅުއްވި ހުސައިން ނަސީރުގެ ފޯމު އިލެކްޝަންސް ކޮމިޝަނުން ވަނީ ބާތިލް ކުރައްވައިފައެވެ. ސަބަބެއް ކަމަށް ވިދާޅުވެފައިވަނީ އިންތިޚާބުގައި ވާދަ ކުރެއްވުމަށް ހުށަހެޅުއްވި 1500 ސޮއިގައި މައްސަލަތައް ހުރުމާއި، އޭނާގެ ރަނިންމޭޓެއްގެ ގޮތުގައި ހުށަހެޅުއްވި ޝައިޚް ނަސްރުﷲ ގެ ކުށުގެ ރެކޯޑު ފޯމުގައި މައްސަލަތަކެއް ހުރުމުންނެވެ. އަދި ނަސީރުގެ ދާއިމީ އެޑްރެހުގައި ވެސް މައްސަލަ އުޅޭކަމަށް އެކޮމިޝަނުން ވިދާޅުވެފައިވެއެވެ. މި މައްސަލަ ނަސީރުގެ ފަރާތުން މިހާރުވަނީ ކޯޓަށް ހުށަހަޅައިފައެވެ.
