ފަތުރުވެރިކަމުގެ އެންމެ ބޮޑު އުންމީދެއްއޮތީ ހުވަދުއަތޮޅުގައި ކަމަށާއި، އިގްތިސާދުގެ މައިނާރަކަށް އެއަތޮޅު ވެގެންދާނެ ކަމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ހުވަދުއަތޮޅުގެ ބައެއް ރަށްރަށަށް މިއަދު ފެއްޓެވި ދަތުރުފުޅުގައި، އެއަތޮޅު ދެކުނުބުރީ ގައްދޫގައި ހިންގި ހަތަރު މަޝްރޫޢެއްގެ ނިމުން ފާހަގަކުރުމުގެ ރަސްމިއްޔާތުގައި ބައިވެރިވެވަޑައިގެން މިއަދު ހަވީރު ދެއްކެވި ވާހަކަފުޅުގައެވެ.
ރައީސް ވިދާޅުވީ ޓޫރިޒަމް ދާއިރާގެ ބޮޑު މަންފާ ކުރިމަގުގައި ލިބެންއޮތީ ހުވަދު އަތޮޅަށް ކަމަށެވެ. އެއީ އެއަތޮޅުގައި ފަތުރުވެރިކަމަށް އެކަށީގެންވާ ގިނަރައްތައް ހުރެފައި މުސްތަގުބަލުގައި އެރަށްތައް ސަރުކާރުން ތަރައްގީ ކުރައްވާނެތީ ކަމަށް ރައީސް ވިދާޅުވިއެވެ. އެމަނިކުފާނު ވިދާޅުވީ ޓޫރިޒަމްގެ އެންމެ ބޮޑު އުއްމީދެއް އޮތް އަތޮޅަކީ ވެސް ހުވަދު އަތޮޅުކަމަށެވެ. އެހެން ކަމުން މުސްތަގުބަލުގައި އެއަތޮޅު ވެގެންދާނީ އިގްތިސާދީ މައި ނާރެހަކަށް ކަމަށްވެސް ވިދާޅުވެފައެވެ.
ކުރިއަށް އޮތް ދައުރުގެ ފުރަތަމަ ތިން އަހަރުގެ ތެރޭގައި ހުވަދު އަތޮޅު ދެކުނުބުރީގައި ތަރައްގީކުރުމަށް ނިންމަވާފައިވާ ފަތުރުވެރިކަމުގެ ސިނާއަތުގެ 6000 އެނދުގެ ތެރޭގައި ހިމެނިގެން ގައްދޫ ދާއިރާގައި 21 ރަށް ތަރައްގީ ކުރަން ނިންމަވާފައިވާކަމުގައި ވެސް ރައީސުލްޖުމްހޫރިއްޔާ ވިދާޅުވިއެވެ. އެގޮތުން މިދާއިރާގައި 4200 އެނދު ތަރައްގީ ކުރެވޭނެކަން ފާހަގަކުރައްވައި ރައީސުލްޖުމްހޫރިއްޔާ ވިދާޅުވީ މި ތަރައްގީއާއުއެކު 7000 ޒުވާނުންނަށް ވަޒީފާގެ ފުރުސަތު ތަނަވަސްވެގެންދާނެ ކަމަށެވެ.
ގައްދޫގެ ރައްޔިތުންނަށް މިހާރު އަސާސީ ޚިދުމަތްތައް ލިބޭނެކަން ފާހަގަކުރައްވައި ރައީސުލްޖުމްހޫރިއްޔާ ވިދާޅުވީ، މިދިޔަ ސަރުކާރުގައި ގައްދޫއަށް 27 މިލިއަން ރުފިޔާ ހޭދަކޮށްފައިވާއިރު، މި ސަރުކާރުން ގައްދޫއަށް 240 މިލިއަން ރުފިޔާ ހޭދަކޮށްފައިވާ ކަމަށެވެ. މިސަރުކާރުން ވަރަށް މަދު ރަށެއްގައި ނޫނީ ބޮޑެތި މަޝްރޫއުތައް ހިންގާފައިވާނެކަން ވެސް ރައީސުލްޖުމްހޫރިއްޔާގެ ވާހަކަފުޅުގައި ފާހަގަކުރެއްވިއެވެ.
އެއްވެސް ރަށަކުން ލިބޭ އާމްދަނީއަކުން އެރަށަކަށް ބޭނުންވާ ކަންކަން ނުކުރެވޭނެކަމަށް ވިދާޅުވެ ރާއްޖެއަކީ ޔުނިޓަރީ ދައުލަތެއްކަން ފާހަގަ ކުރައްވައި ދައުލަތަށް ލިބޭ އާމްދަނީ ބެހުމުގައިވެސް ޔުނިޓަރީ ދައުލަތަކަށްވާންޖެހޭނެ ކަމުގައި ރައީސް ވިދާޅުވިއެވެ.
