ރިޔާސީ ދެވަނަ ދައުރަކަށް އިންތިޚާބު ކޮށްދެއްވައިފި ކަމަށްވާނަ ފުރަތަމަ ތިން އަހަރު ތެރޭގައި ހުވަދުއަތޮޅުގައި ޓުއަރިޒަމް ކުރިއަރުވައި ދިހަހާސް އެނދު ތަރައްގީ ކޮށްދެއްވާނެ ކަމަށް ރައީސް ޔާމީން ވިދާޅުވެއްޖެއެވެ.
ހުވަދުއަތޮޅުގެ ބައެއް ރަށްރަށަށް ކުރައްވާ ދަތުރުފުޅުގައި ގދ. މަޑަވެއްޔަށް ވަޑައިގެން އެރަށު ރައްޔިތުންނާ ބައްދަލު ކުރައްވައި ދެއްކެވި ވާހަކަފުޅުގައި ރައީސް ވިދާޅުވީ ހުވަދުއަތޮޅަކީ ޓުއަރިޒަމަށް ވަރަށްއެކަށީގެންވާ ރަށްތައް ގިނަ އަތޮޅެއް ކަމަށެވެ.
އެހެން ކަމުން އެމަނިކުފާނުގެ ދެވަނަ ދައުރެއްގެ ފުރަތަމަ ތިން އަހަރު ދިހަހާސް އެނދު އެއަތޮޅުގައި ތަރައްގީކޮށް ދެއްވާނެ ކަމަށެވެ. އެއީ ގއ. ގައި 4000 އެނދާއި، ގދ. ގައި 6000 އެނދު ކަމަށް ވެސް ރައީސް ވިދާޅުވިއެވެ.
އެމަނިކިފާނު ވިދާޅުވީ އެއަދަދަށް އެނދު ތަރައްގީ ކުރުމުން އެއަތޮޅުގައި ގިނަ އަދަދެއްގެ ވަޒީފާގެ ފުރުސަތު ވެސް އިތުރުވެގެންދާނެ ކަމަށެވެ. އަދި އެއަދަދަށް އެއަތޮޅުގައި އެނދު ތަރައްގީ ކުރައްވާއިރު ބައިނަލް އަގުވާމީ އެއާޕޯޓެއް އެއަތޮޅުގައި އޮންނަންޖެހޭނެ ކަމަށެވެ. އެހެންވެ ކާޑެއްދޫ އެއާޕޯޓު ބައިނަލްއަގުވާމީ އެއާޕޯޓަކަށް ބަދަލު ކުރުމަށް ބަލަންޖެހޭ ކަންކަން ބެލުމަށް ވަޒީރުންނަށް އަންގަވައިފައިވާނެ ކަމަށް ވެސް ރައީސް ވިދާޅުވިއެވެ.
އެމަސައްކަތްވެސް އެމަނިކުފާނުގެ ދެވަނަ ދައުރުގެ ފުރަތަމަ ތިން އަހަރުތެރޭ ކުރައްވާނެ ކަމަށް ރައީސް ވިދާޅުވިއެވެ.
