ަންނަ ސެޕްޓެމްބަރު 23 ވަނަ ދުވަހު އޮންނަ ރިޔާސީ އިންތިޚާބަށް ޕާޓީތަކުން ކެމްޕޭނުގެ ހަރަކާތްތައް ކުރިޔަށް ގެންދާއިރު ހުރިހާ ސިޔާސީ ޕާޓީ ތަކަށްވެސް އެއްވަރުގެ، ހަމަހަމަ ފުރުޞަތު ތަކެއް ދެއްވާނެ ކަމަށް އުންމީދު ކުރައްވާ ކަމަށް އިދިކޮޅު ކޯލިޝަނުގެ ރިޔާސީ ކެންޑިޑޭޓް އިބްރާހިމް މުޙަންމަދު ސޯލިޙް (އިބޫ) މިއަދު ވިދާޅުވެއްޖެއެވ.
އިދިކޮޅު ކޯލިޝަނުގެ ކެމްޕޭން ހަރަކާތްތަކުގައި މިއަދު މައްޗަންގޮޅީގެ ގެތަކަށް އިބޫ ވަޑައިގަތުމުގެ ކުރިން ނޫސްވެރިންނާ ވާހަކަ ދައްކަވަމުން އިބޫ ވިދާޅުވީ ކެމްޕޭނުގައި މިހާތަނަށް އެންމެ ބޮޑަށް އިސްކަމެއް ދެއްވާފައި ވާނީ ސިޔާސީ ބޮޑެތި އެއްވުންތަކާއި ބޮޑެތި ޖަލްސާތައް ބޭއްވުމުގެ ބަދަލުގައި ގެތަކަށް ވަޑައިގެން ރައްޔިތުންނާ ބައްދަލު ކުރައްވައި ވާހަކަފުޅު ދެއްކެވުމަށް ކަމަށެވެ. މިހާތަނަށް ކެމްޕޭނު ކުރިޔަށް ދިޔައިރު ކެމްޕޭނުގެ މަގުމަތީ ހަރަކާތެއް ބާއްވަންވެސް އަދި ބޮޑު ޖަލްސާއެއް ބާއްވަންވެސް ތަނެއް ހޯދަން ކަމާބެހޭ މުއައްސަސާއެއްގައި އެދިވަޑައިގެންފައި ނޯންނާނެ ކަމަށް އިބޫ ވިދާޅުވިއެވެ. އިބޫ ވިދާޅުވީ ސަރުކާރުން އިދިކޮޅު ކޯލިޝަނުގެ ކެމްޕޭނުގައި އަމަލު ކުރައްވާނެ ގޮތެއް އެނގޭނީ އެފަދަ ހުއްދައަކަށް އެދިވަޑައިގަތުމުން ކަމަށެވެ.
އިބޫ ވިދާޅުވީ ކެމްޕޭނުގައި ކުރިޔަށް އޮތް ދުވަސްވަރު މަގުމަތީގެ ހަރަކާތަކާއި، ބޮޑެތި ޖަލްސާތައްވެސް ފެންނާނެ ކަމަށެވެ. އެހެންކަމުން އުންމީދު ކުރައްވަނީ އެފަދަ ހަރަކާތްތައް އިދިކޮޅު ކޯލިޝަނުން ބާއްވާއިރު އިލެކްޝަން ކޮމިޝަނާއި، ހޯމް މިނިސްޓްރީން ހުރިހާ ޕާޓީއަކަށްވެސް ހަމަހަމަކޮށް އެފުރުޞަތު ފަހިކޮށް ދެއްވުން ކަމަށް އިބޫ ވިދާޅުވިއެވެ.
އިބޫ ވިދާޅުވީ މަގުމަތީގެ ސިޔާސީ ހަރަކާތާއި ޖަލްސާތައް ބޭއްވި ނަމަވެސް އެންމެ ބޮޑަށް އިސްކަމެއް ދެއްވާނީ ރައްޔިތުންގެ ގެތަކަށް ވަޑައިގެން ރައްޔިތުންގެ ބޭނުންތަކާއި ޙާލު ބެއްލެވުން ކަމަށެވެ. މީގެކުރިންވެސް އިބޫ ވަނީ މާލެ އާއި ބަޔެއް ރަށްރަށަށް ވަޑައިގެން ގެތަކަށް ޒިޔާރަތް ކުރައްވާފައެވެ.
