ރައްޔިތުންގެ މަޖިލީހުގެ ގޮނޑި ގެއްލިފައިވާ ކަމަށް އިލެކްޝަން ކޮމިޝަނުން ވިދާޅުވެފައިވާ މެންބަރުން މަޖިލީހުގެ ޖަލްސާތަކަށް ވަނަ ނުދެއްވައި ހުރަސް އެޅުއްވުމަކީ ގާނޫނޫ އަސާސީ ހިންގެވުމަށް ހުރަސް އެޅުއްވުން ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އެމަނިކުފާނު ކުރެއްވި ޓްވީޓެއްގައި ވިދާޅުވެފައިވަނީ އެބޭފުޅުންގެ ގޮނޑި ނުގެއްލޭ ކަމަށާއި އެބޭފުޅުން އެދާއިރާތަކުގެ މަޖިލިސް މެންބަރު ކަމަށް އިންތިޚާބުކުރެއްވި ސަބަބަކީ މިއަދުވެސް މާދަމާވެސް މަޖިލީހުގެ ޖަލްސާ ތަކަށް ވަޑައިގެންނެވުން ކަމަށެވެ.
"12 މެންބަރުންގެ ގޮޑިއެއް ނުގެއްލޭ. އެ މެންބަރުން މަޖިލީހަށް ވަޑައިގަތަ ނުދީ ހުރަސް އެޅުމަކީ ގާނުނު އަސާސީ ހިންގުމަށް ހުރަސް އެޅުން. މިއަދު ވެސް މާދަމާ ވެސް އަދި ކޮންމެދުވަހަކުވެސް އެ 12 މެންބަރުން މަޖިލީހަށް ވަޑައިގަތުމަކީ އެބޭފުޅުން އެމަގާމަށް އިންތިޚާބުކުރި ސަބަބު،" ރައީސް ނަޝީދުގެ ޓްވީޓްގައި ވިދާޅުވެފައިއެވެ.
ގޮނޑި ގެއްލިފައިވާ ކަމަށް ކަނޑައަޅުއްވައިފައިވާ 12 މެންބަރުންވެސް ވަކާލާތު ކުރައްވަމުން ގެންދަވަނީ އެބޭފުޅުންގެ ގޮނޑި ނުގެއްލޭ ކަމަށެވެ. އެގޮނޑިއާމެދު ގޮތެއް ނިންމަވަން ޖެހޭނީ ސްޕްރީމްކޯޓުން ކަމަށާއި އެހެންނަމަވެސް ގޮނޑިގެއްލިފައިވާ ކަމަށް އަދާހަމައަށް ވެސް ސްޕްރީމް ކޯޓުން ނިންމަވާފައި ނުވާކަމަށް އެ އެމެންބަރުން ވިދާޅުވެއެވެ.
އެބޭފުޅުންގެ ގޮނޑި ގެއްލިޖެއް ކަމަށް ސްޕްރީމްކޯޓުން ސީދާ ވިދާޅުނުވިޔަސް އެބޭފުޅުންގެ ގޮނޑި ނުގެއްލޭ ކަމަށް ފެބުރުއަރީ އެކެއްގައި ސްޕްރީމްކޯޓުން ނެރުއްވައިފައިވާ އަމުރުގައިވާ ބައި އެކޯޓުން ވަރަށްފަހުން ވަނީ ބާތިލް ކުރައްވައިފައެވެ.
އެގޮތަށް ނިންމެވިޔަސް އެމެންބަރުން ވަކިވަކިން ހުށަހަޅުއްވައިފައިވާ މައްސަލަތައް ބަލަންޖެހޭނެ ކަމަށް ސްޕްރީންކޯޓުން ވަނީ ވިދާޅުވެފައެވެ.
ގޮނޑި ގެއްލިފައިވާ ކަމަށް ކަނޑައަޅާފައިވަނީ އިހަވަންދޫ ދާއިރާގެ މެމްބަރު، މުހައްމަދު އަބްދުﷲއާއި، ދިއްދޫ ދާއިރާގެ މެންބަރު، އަބްދުއްލަތީފު މުހައްމަދާއި ހަނިމާދޫ ދާއިރާގެ މެންބަރު ހުސައިން ޝަހުދީއާއި މަޑުއްވަރީ ދާއިރާގެ މެންބަރު މުހައްމަދު އަމީތާއި ތުލުސްދޫ ދާއިރާގެ މެންބަރު މުހައްމަދު ވަހީދު އިބްރާހީމާއި ދަގެނތީ ދާއިރާގެ މެންބަރު އިލްހާމް އަހުމަދާއި ތިމަރަފުށީ ދާއިރާގެ މެންބަރު މުހައްމަދު މުސްތަފާއާއި ވިލިނގިލީ ދާއިރާގެ މެންބަރު ސައުދު ހުސައިނާއި ތިނަދޫ އުތުރު ދާއިރާގެ މެންބަރު ސައުދުﷲ ހިލްމީއާއި ތިނަދޫ ދެކުނު ދާއިރާގެ މެންބަރު އަބްދުﷲ އަހުމަދާއި ފުވައްމުލަކު އުތުރު ދާއިރާގެ މެންބަރު އަލީ ޝާހުއާއި، މައްޗަންގޮޅީ ދެކުނު ދާއިރާގެ މެންބަރު އަބްދުﷲ ސިނާނެވެ.
