ރައީސުލްޖުލްހޫރިއްޔާ އަބުދުﷲ ޔާމީން، ޖަޕާންގެ ބޮޑުވަޒީރު ޝިންޒޯ އަބޭއަށް ހަމްދަރުދީގެ މެސެޖެއް ފޮނުއްވައިފިއެވެ.
ރައީސް ޔާމިން ޖަޕާނުގެ ބޮޑުވަޒީރު ޝިންޒޯ އަބޭއަށް ހަމްދަރުދީގެ މެސެޖެއް ފޮނުއްވާފައި މިވަނީ އެގައުމުގެ ދެކުނުގެ ސަރަހައްދެއް ކަމަށްވާ ކުމަކޯޓޯ ޕްރިފެކްޗާއަށް އައި ބާރުގަދަ ބިންހެލުމާއި ގުޅިގެން ބައެއް މީހުން މަރުވެ މުދަލަށާއި އިމާރާތްތަކަށް ބޮޑެތި ގެއްލުން ލިބުމާއި ގުޅިގެން އެކަމުގެ ހިތާމައިގައެވެ.
ރައީސުލްޖުމްހޫރިއްޔާ ފޮނުއްވި މެސެޖުގައި، ޤައުމީ ހިތާމައިގެ މިދަނޑިވަޅުގައި، ދިވެހި ސަރުކާރާއި، ރައްޔިތުންނާއި، ރައީސުލްޖުމްހޫރިއްޔާގެ އަމިއްލަ ނަންފުޅުގައި، ޖަޕާނުގެ ސަރުކާރަށާއި ރައްޔިތުންނަށް ވަރަށް އިޚްލާޞްތެރިކަމާއެކު ހަމްދަރުދީ ފޮނުއްވާފައިވެއެވެ. އަދި މި ޙާދިޘާގައި މަރުވި މީހުންގެ ޢާއިލާތަކަށް ތަޢުޒިޔާ ރައްދުކޮށްދެއްވުމަށްވެސް ރައީސުލްޖުމްހޫރިއްޔާގެ މެސެޖުގައި އެދިވަޑައިގެންފައިވެއެވެ.
