ސިޔާސީ ޕާޓީތަކުގެ ދަފްތަރު އުވާލަންޖެހޭ ކަމަށާއި ޕާޓީތަކުގެ ދަފްތަރަކީ ގައުމު ބައިބައިކޮށް، ފިތުނަ އުފައްދާ އެއްޗެއް ކަމަށް ޖުމްހޫރީ ޕާޓީގެ ނައިބު ރައީސް ޑރ އަބްދުﷲ މައުސޫމް ވިދާޅުވެއްޖެއެވެ.
އާފަތިސް ނޫހާ ވާހަކަ ދައްކަވަމުން ރައީސް މައުމޫނުގެ ދައުރުގައި ޓޫރިޒަމް މިނިސްޓަރުކަންވެސް ކުރެއްވި ޑރ މައުސޫމް ވިދާޅުވީ ސިޔާސީ ޕާޓީތަކުގައި މެމްބަރުން ތިބޭ އަދަދު އެއީ މުހިންމު އެއްޗެއް ކަމަށް ގަބޫލުނުކުރައްވާ ކަމަށެވެ. އެހެންވެ ޕާޓީތަކުގެ ދަފްތަރެއް އޮތުން މުހިންމު ނޫން ކަމަށް މައުސޫމް ވިދާޅުވިއެވެ.
"އަޅުގަނޑު ރައްޔިތުންގެ މަޖިލީހުގައި އުޅުނު ދައުރުގައިވެސް އެކަމަށް މަޖިލީހުގައި އޮންނާނެ ބަހުސްކޮށްފައި، އަޅުގަނޑު ގަބޫލުކުރާ ގޮތުގައި ޕާޓީތަކުގެ މެމްބަރޝިޕް އެއީ މުހިންމު އެއްޗެއް ނޫން، ޕާޓީ ތަކުގެ މެމްބަރޝިޕްގެ ސަބަބުން ގައުމު ބައިބައިވެ، ފިތުނަ އުފެދި، ހަމަހަމަކަން ގެއްލި ތަފާތު ކުރުން އިންތިހާއަށް އޮންނަނީ" ޑރ މައުސޫމް ވިދާޅުވިއެވެ.
ޑރ މައުސޫމް ވިދާޅުވީ ސިޔާސީ ޕާޓީތަކުގެ ދަފްތަރު އުވާލަން ގޮވާލައްވާ އެންމެ ބޮޑު ސަބަބަކީ ޕާޓީ ސިސްޓަމް ރާއްޖެއަށް ތައާރަފް ވީއްސުރެ އަބަދުވެސް ސަރުކާރު ހިންގާ ޕާޓީއަކުން އެ ޕާޓީއެއްގެ މެމްބަރުންނާއި އެހެން ޕާޓީތަކުގެ މެމްބަރުންގެ މެދުގައި ވަރަށް ބޮޑެތި ތަފާތު ކުރުންތަކެއް ގެންގުޅުން ކަމަށެވެ. އެގޮތުން ވަޒީފާގެ ފުރުޞަތުވެސް ގިނަ އޮފީސް ތަކުން ދެނީ ސަރުކާރު ހިންގާ ޕާޓީއެއްގެ މީހެއްތޯ ބެލުމަށް ފަހު ކަމަށް މައުސޫމް ވިދާޅުވިއެވެ.
"މިވާގޮތަކީ ކުންފުނިތަކުގެ ވެރިންވެސް ސަރުކާރުގެ އިސްވެރިން ރުއްސަން ވެގެން އެ ކުންފުނީގެ ވަޒީފާއަށް ވެސް މި ވައްދަނީ ޕާޓީ ކުދިން، އެންމެ ފުރަތަމަވެސް ބަލަނީ އެއީ ކޮންޕާޓީއެއްގެ ދަފްތަރުގައި އޮތް މީހެއްތޯ ވަޒީފާއެއް ދޭންވެސް، އޭގެ ސަބަބުން ވަރަށްގިނަ ބަޔަކަށް ވަޒީފާގެ ފުރުޞަތު އެބަގެއްލޭ، އެނޫނަސް ތަފާތު ކުރުންތައް ބައިވަރު އޮވޭ ޚިދުމަތްތައް އޮފީސްތަކުން ދިނުމުގައިވެސް" ޑރ މައުސޫމް ވިދާޅުވިއެވެ.
މައުސޫމް ވިދާޅުވީ ކޮންމެ ޕާޓީއެއްގެ ދަފްތަރުގައި އެމީހެއްގެ ނަން އޮތަސް ހަމަހަމަކަމާއެކު ކަންކަން ވާންޖެހޭނެ ކަމަށާއި ނަމަވެސް ޕާޓީ ސިސްޓަމް ތައާރަފްވީ ފަހުން އެކަން ބޮއްސުންލާފައިވާ ކަމަށެވެ. އަދި ވެރިކަންކުރާ ޕާޓީއަށް ވަންނަ ގިނަ މީހުންނަކީ އެމީހާގެ ސިޔާސީ ފިކުރު އެޕާޓީއާ އެއްގޮތަށް ހުރެގެން ވަންނަ މީހުން ނޫން ކަމަށްވެސް މައުސޫމް ވިދާޅުވިއެވެ.
"މިސާލަކަށް މިވަގުތު ބަލަމާ ވެރިކަންކުރާ ޕީޕީއެމަށް، ޕީޕީއެމްގެ ރަޖިސްޓްރީގައި ކިތަންމެ ގިނަބަޔަކު މިވަގުތު އޮތަސް އޭގެތެރޭގައި ގިނަވާނީ ހިތުން ރުހުމުގައި ވަދެތިބި މީހުންނެއްނޫން، ކޮންމެވެސް ކަމަކާ މަޖުބޫރުން ވަދެ، ނޫނީ މަޖުބޫރުން ވައްދާފައިތިބި މީހުން ގިނަވާނީ، ޕާޓީގެ މެމްބަރޝިޕް މުހިންމެއްނޫން، ވޯޓަކަށް ދިޔައިމަ ކަށަވަރުވާނެ އެންމެގިނަ މެމްބަރުން ތިބި ޕާޓީއެއް، ޕާޓީގެ ދަފްތަރަކުން ނޭނގޭނެ، އަޅުގަނޑު ގަބޫލެއް ނުކުރަން ދިވެހިރާއްޖޭގެ ކޮންމެ މީހަކީ ކޮންޕާޓީއެއްގެ މީހެއްކަން މުޅި ޕަބްލިކަށް އެނގެން ޖެހޭނެ ކަމަކަށް، އެކަން އެނގުނީމަ މިއޮތީ ފިތުނަ އާއި ތަފާތު ކުރުން އިންތިހާއަށް ގައުމުގައި އުފެދިފައި" މައުސޫމް ވިދާޅުވިއެވެ.
"ދެން އުފެދޭނެ ސުވާލަކީ ޕާޓީތަކަށް ފައިސާދެނީ މެމްބަރޝިޕަށް ބަލާފަ ނޫންހޭ އެހެންވީމާ ކިހިނެތްހޭ ޕާޓީތަކަށް ފައިސާދޭނެ ވަރެއް ނިންމޭނީ، އޭގެ ޖަވާބަކީ ޕާޓީތަކަށް ފައިސާ ދެވިދާނެ ގޮތެއް ނިންމުމުގައި ދެގޮތަކަށް ބެލިދާނޭ، އެއްގޮތަކީ ރައްޔިތުންގެ މަޖިލީހުގައި އެ ޕާޓީއެއްގެ މެމްބަރުން ތަމްސީލުކުރާ ނިސްބަތުން، އަނެއް ގޮތަކީ ރައްޔިތުންގެ މަޖިލީހުގައި އެ ޕާޓީއަކުން މެމްބަރުން ވާދަކޮށް އެ މެމްބަރުންނަށް ވޯޓު ލިބުނު ނިސްބަތަށް ބެލުން" ޑރ މައުސޫމް ވިދާޅުވިއެވެ.
ދައުލަތުން ސިޔާސީ ޕާޓީ ތަކަށް މިހާތަނަށް ފައިސާ ދޫކުރަމުން އައީ ޕާޓީގެ ދަފްތަރުގައި މެމްބަރުން ތިބި އަދަދަށް ބަލައިގެންނެވެ. އެގޮތުން އެންމެ މެމްބަރުން ގިނަ ޕާޓީއަކަށް ލިބޭ ފައިސާގެ މިންވަރުވެސް ބޮޑުވާނެއެވެ.
