އައިޑީކާޑުގެ މައުލޫމާތު ބަދަލު ވެގެން އަލަށް އައިޑީކާޑު ހެދުން ވަގުތީ ގޮތުން ހުއްޓާލައިފިއެވެ.
ޑިޕާޓްމެންޓް އޮފް ނެޝަނަލް ރެޖިސްޓްރޭޝަން (ޑީއެންއާރު) އިން ކޮށްފައިވާ އިއުލާނެއްގައި ބުނެފައި ވަނީ މައުލޫމާތު ބަދަލުވެގެން އަލަށް އައިޑީކާޑު ހެއްދުން ވަގުތީ ގޮތުން ހުއްޓާލަން ޖެހުނީ ކުރިޔަށް އޮތް ރިޔާސީ އިންތިޚާބުގެ ވޯޓާސް ލިސްޓު އިލެކްޝަން ކޮމިޝަނުން މިހާރު ނެރެފައިވާތީ ވޯޓާސް ލިސްޓު ނެރުނު ފަހުން އައިޑީކާޑުގެ މައުލޫމާތު ބަދަލު ވުމުގެ ސަބަބުން އެފަދަ ފަރާތްތަކަށް ވޯޓު ލުމުގެ ހައްގު ގެއްލިދާނެތީ ކަމަށެވެ.
ޑީއެންއާރުން ބުނީ އިންތިޚާބުގެ ވޯޓުލުމާ ހަމައަށް އެފަދަ ފަރާތްތަކަށް އައިޑީކާޑު އާކުރުން ވަގުތީ ގޮތުން ހުއްޓާލި ނަމަވެސް ރިޔާސީ އިންތިޚާބުގެ ވޯޓަށް ފަހު އެފަދަ ފަރާތްތަކުން ބަދަލުވެފައިވާ މައުލޫމާތާއެކު އައިޑީކާޑު ހައްދައިދޭނެ ކަމަށެވެ.
ޑީއެންއާރުން މިގޮތަށް ނިންމީ ސަރުކާރުގެ ބޯހިޔާވެހި ކަމުގެ މަޝްރޫއުގެ ދަށުން ހުޅުމާލޭގައި ދޫކުރާ 7000 ފްލެޓަށް އެދުމުގެ ފުރުޞަތު ވީހާވެސް ގިނަބަޔަކަށް ދިނުމަށްޓަކައި މާލޭ ދަފްތަރުގައި އަލަށް ރަޖިސްޓްރީ ވުމަށް ހައުސިންގ މިނިސްޓްރީން ދާދިފަހުން ހުޅުވާލުމާއެކު ބަޔެއް ފަރާތްތަކުން ދަފްތަރުގައި ޖެހުމަށް ފަހު އައި ބަދަލާއެކު އާ އައިޑީކާޑު ހައްދަމުންދާތީއެވެ.
އެފަދަ ފަރާތްތަކުންވެސް ދަފްތަރުގައި ޖެހުމަށް ފަހު އައިޑީކާޑު ބަދަލު ނުކުރާނަމަ ވޯޓުލުމުގެ ހައްގު ލިބޭނެއެވެ. ނަމަވެސް ވޯޓާސް ލިސްޓަށް ފަހު އެފަދަ ފަރާތަކުން އައިޑީކާޑުގެ މައުލޫމާތު ބަދަލުކޮށްފިނަމަ ވޯޓު ނުލެވިދާނެއެވެ.
