ކުރިއަށްއޮތް ރިޔާސީ އިންތިޚާބުގައި ވޯޓުފޮށިތައް ބަހައްޓާ ރިސޯޓުތަކުގެ އަދަދު ދެން އިތުރުނުވާނެ ކަމަށް އިލެކްޝަންސް ކޮމިޝަން (އީސީ) އިން ވިދާޅުވެއްޖެއެވެ.
އެކޮމިޝަންގެ ރައީސް އަހުމަދު ޝަރީފް އާދަމް ވިދާޅުވީ ވޯޓުފޮށިތައް ބެހެއްޓުމަށް މިހާރު ހަމަޖެހިފައިވަނީ ގާތްގަނޑަކަށް 35 ރިސޯޓެއްގައި ކަމަށެވެ. އެންމެފުރަތަމަ ހަމަޖެއްސެވީ 7 ރިސޯޓެއްގައި ވޯޓު ފޮށިތައް ބަހައްޓާށެވެ. އެހެންނަމަވެސް ރިސޯޓުތަކުގެ ފަރާތުން އިލެކްޝަނާ ބައްދަލުކުރައްވައި ވާހަކަ ދައްކައި މަޝްވަރާ ކޮށްގެން މިހާރުވަނީ އިތުރަށް 28 ރިސޯޓެއްގައި ވޯޓު ފޮށިތައް ބަހައްޓަން ނިންމަވައިފައެވެ.
ކުރިން ނިމާފައިވަނީ ވޯޓުލާ މީހުންގެ އަދަދު 250 އަށްވުރެ އިތުރުވާ ރިސޯޓުތަކުގައި ވޯޓުފޮށިތައް ބެހެއްޓުމަށެވެ. "އެހެނަމަވެސް ރިސޯޓުތަކުގެ ފަރާތުން އީސީއާ ބައްދަލުކޮށް އެކަމުގެ ކަންބޮޑުވުން ފާޅު ކުރުމުން މިހާރުވާނީ ވޯޓުލާ މީހުންގެ އަދަދަދު ސަތޭކައަށް އަރާ ކޮންމެ ރިސޯޓެއްގައި ވޯޓު ފޮށްޓެއް ބަހައްޓަން ނިންމައި ރީރަޖިސްޓްރޭޝަނަށް ހުޅުވާފައި. އެގޮތަށް ހެދުމުމުން އެ އަދަދު ހަމަވާ އަށާވީސް ރިސޯޓު އޮތީ،" ޝަރީފް ވިދާޅުވިއެވެ. އޭނާ ވިދާޅުވީ ރިސޯޓުތަކުގައި މަސައްކަތްކުރާ ބައެއް މީހުން އެހެން ރަށްރަށުގައިވެސް ރަޖިސްޓްރީ ވަމުން އަންނަ ކަމަށެވެ.
މިއަހަރުގެ ރިޔާސީ އިންތިޚާބުގެ ވޯޓުލުން ބާއްވަނީ ސެޕްޓެމްބަރ 23 ގައެވެ. ޕާޓީތަކުން މިހާރުވަނީ ފޯރިއާއެކު ކެންޕޭން ވެސް ކުރަން ފަށައިފައެވެ.
