ރިޔާސީ ދެވަނަ ދައުރަކަށް އިންތިޚާބު ކޮށްދެއްވައިފި ކަމަށްވާނަމަ ފުރަތަމަ ދެއަހަރުތެރޭގައި ރާއްޖޭގެ ސިއްހީމަރުކަޒުތަކާއި ރާއްޖޭގެ މައި ހޮސްޕިޓަލް ޓެލެ މެޑިސިން ނެޓްވޯކަކުން ގުޅައިލައްވާނެ ކަމަށް ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.
މ. ކޮޅުފުށްޓަށް ވަޑައިގެން އެރަށު ރައްޔިތުންނާ ބައްދަލު ކުރައްވައި ދެއްކެވި ވާހަކަފުޅުގައި ރައީސް ވިދާޅުވީ އެގޮތަށް ހަމަޖައްސަވަން ނިންމެވީ ރާއްޖޭގެ ރަށްތައް އުފެދިފައިވާ ގޮތުން ޑޮކްޓަރުންގެ ޚިދުމަތް އެންމެ އެދެވޭ ގޮތުގައި ރައްޔިތުންނަށް ފޯރުކޮށް ދެއްވުމުގެ ބޭނުންފުޅުގައި ކަމަށެވެ.
"ކޮންމެ ރަށަކަށް ވެސް ކޮންމެވެސް ފެންވަރެއްގެ ޑޮކްޓަރުންތަކެއް ގެނެސްދެވިދާނެ. އެކަމަކު ކޮންމެވެސް ޚާއްސަ ފަންނެއްގެ ޑޮކްޓަރަކު ކޮންމެވެސް ރަށަކަށް ނުލިބިގެން އުޅެން މިޖެހެނީ. އެއީ އެޑޮކްޓަރުން ވަޒީފާ ލިބެން މިއޮންނަނީ ހަމައެކަނި ދިވެހިރާއްޖެއަކުންނެއްނޫން. ޑޮކްޓަރުންނަކީ ރާއްޖެއިން ބޭރުގެ ވެސް ހުރިހާތަނަކަށް ބޭނުންވާ ބައެއް. ނަރުހުންނާއި ސްޕެޝަލިސްޓުންނަކީ ދުނިޔޭގެ ހުރިހާ ދިމާއަކުންވެސް ވަޒީފާ ލިބޭނެ މީހުން. އެހެންވީމާ ހުރިހާ ރަށެއްގެ ސިއްހީ ޚިދުމަތް އެއްފެންވަރަކަށް ގެނައުމަކީ ފަސޭހަ ކަމަކަށް ނުވާނެ. މިކުރާ މަސައްކަތުގެ ތެރޭގައި އެންމެބޮޑެތި މުހިންމު ކަންތައްތަކަށް ބޭނުންވާ ޚާއްސަ ފަރުވާތައް ބޮޑެތި ރަށްރަށުން ލިބޭނެ. އެއީ އަޅުގަނޑުމެންގެ މެނިސްފެސްޓޯގައި ހިމަނާފައިވާ ކަމެއް،" ރައީސް ވިދާޅުވިއެވެ.
ދުރުގައި ވަކިންއޮންނަ އާބާދީ މަދު ރަށްރަށަށް ސިއްހީ ހުރިހާ ޚިދުމަތެއް ހަމަކޮށްދިނުމަކީ ފަސޭހަ ކަމެއްނޫންކަމަށާއި، އެފަދަ ކަންކަމަކީ ފަސްއަހަރެއްގެ މުއްދަތެއްގައި ކުރެވޭ ވަރުގެ ކަމަކަށްވެސް ނުވާ ކަމަށް ރައީސް ވިދާޅުވިއެވެ.
މިކަމަށް އޮންނަ އެންމެ ފަސޭހަ ހައްލަކީ ހުރިހާ ސިއްހީމަރުކަޒުތައް ނެޓުވޯކަކުން ގުޅާލައި ސްޕެޝަލިސްޓު ޑޮކްޓަރުންގެ އިރުޝާދާއެކު ރަށްރަށުގެ ސިއްހީ މަރުކަޒުގައިތިބޭ ޑޮކްޓަރުން މެދުވެރިކޮށް ބަލިމީހުންނަށް ޚިދުމަތްދިނުން ކަމަށް ރައީސް ވިދާޅުވިއެވެ. ފަންނީ ޑޮކްޓަރުން މާލެއިން ފުރައިގެން އެއްރަށުން އަނެއްރަށުގައި ކެންޕުޖަހައިގެން ފަރުވާދިނުމަކީ ވެސް ކުރަން ފަސޭހަކަމެއް ނޫން ކަމަށް ވެސް ރައީސް ވިދާޅުވިއެވެ.
"އަޅުގަނޑުމެންގެ ސަރުކާރެއްގައި ކުރިއަށްއޮތް ދެއަހަރެއްހާ ދުވަހުގެ ތެރޭގައި އަޅުގަނޑުމެން ކުރަން ބޭނުންވާ ކަމަކީ މިކަހަލަ ހުރިހާ ސިއްހީ މަރުކަޒުތަކެއް ޓެލެ މެޑިސިން ނެޓްވޯކަކުން އަޅުގަނޑުމެންގެ މައި ހޮސްޕިޓަލާ ގުޅައިލުން. މައި ހޮސްޕިޓަލް ނިމުމުން ރާއްޖެއިން ބޭރުން މިހާރު ހޯދާފަރުވާ އެތަނުން ލިބެނޭ. ލިބިގެންދާނީ އެންމެ ގާބިލް އެންމެ ތަޖުރިބާހުރި ޑޮކްޓަރުންގެ ތެރެއިން. އެ ފެންވަރުގެ ޑޮކްޓަރުންގެ ކޮންސަލްޓެންސީ މިރަށްރަށުގައި ތިބޭ ޑޮކްޓަރުން މެދުވެރިކޮށް ލިބޭނެގޮތް މިހަމަޖައްސަނީ،" ރައީސް ވިދާޅުވިއެވެ.
