ތައިލޭންޑުގެ އުތުރު ސަރަަހައްދުގެ ހޮހޮޅައެއްގައި ތާށިވެފައި ކުދިން 12 ކުދިންނާއި ކޯޗު ހިމެނޭ ފުޓުބޯޅަ ޓީމުގެ ތެރެއިން މިހާތަނަށް 8 ކުދިން ސަލާމަތްކުރެވިފައިވާ ކަމުގައި ތައި ނޭވީ ސީލްސް ރޭ ބުނެފިއެވެ.
މިކަން އެމީހުންގެ ފޭސްބުކު ސަފުހާގައި ކަށަވަރުކޮށްދީފައި ވެއެވެ.
ހޯމަ ދުވަހުގެ ރޭ ނޫސްވެރިންނާ ވާހަކަ ދައްކަމުން، ކުދިން ސަލާމަތްކުރުމުގެ މަސައްކަތުގެ އިސް ވެރިޔާ ނަރޮންގްސަކް އޮސޮތަނަކޯން ބުނީ ހޮހޮޅައިގެ ތެރޭގައި މިހާރު ތިބި 5 މީހުން ހާލު "އަދިވެސް ރަނގަޅު" ކަމުގައެވެ. އޭނާ ވެސް ވަނީ މިހާތަނަށް 8 ކުދިން ސަލަމާތްކުރެވިފައި ވާކަން ޔަގީންކޮށްދީފައެވެ.
"މިއަދު އަހަރުމެން ވަނީ އިތުރު 4 ކުދިންނަށް (ބޭރަށް އައުމުގައި) އެހީތެރިވެދީފައި" ނަރޮންގްސަކް ބުންޏެވެ. ބާކީ ތިބި މީހުން ސަލާމަތްކުރުމުގެ މަސައްކަތް މިއަދު ފަށާނެކަންވެސް އޭނަ ކަށަަވަރުކޮށްދިނެވެ.
އާދީއްތަ ދުވަހު ކާމިޔާބު ކަމާއެކު 4 ކުދިން ހޮހޮޅައިން ނެރުމަށް ހޯމަ ދުވަހުވެސް ތައި ޑައިވަރުންނާއި، އެހެން ގައުމުތަކުން ބައިވެރިވާ ޑައިވަރުން މަސައްކަތްކުރީ 4 ކުދިން ސަލާމަތްކުރާށެވެ. އެމީހުންނަށް އިއްޔެ އެކަން ކާމިޔާބުކަމާއެކު ނިންމާލެވުނެވެ.
ތަފާތު ގައުމުތަކުން ގޮސް ތިބި 50 ޑައިވަރުންނާއި، ތައިލޭންޑުގެ 40 ޑައިވަރުން ދަނީ ތާށިވެފައި ތިބި ކުދިންނާއި، އެކުދިންގެ ކޯޗު ސަލާމަތްކުރުމަށް ވަރުބަލިކަމެެއް ނެތި މަސައްކަތްކުރަމުންނެވެ.
ފާއިތުވި ޖޫން މަހުގެ 23 ވަނަ ދުވަހު 12 ކުދިންނާއި ކޯޗު ތައިލޭންޑާއި ބަރުމާ ގުޅޭ ސަރަހައްދީ ރޮނގު ކައިރީގައި ހުންނަ އެ ހޮހޮޅަށްއަށް ވަނީ ފުޓުބޯޅަ ފަރިތަކުރުމަށް ފަހު އެނބުރި އައި މަގުމަތީގައެވެ. އެމީހުން އެތަނުގައި ތިއްބާ ބޯކޮށް ވާރޭ ވެރި ހޮހޮޅައަށް ވަންނަ މަގުގައި ފެންބޮޑުވީއެވެ. އެމީހުން އެތަނުގައި ވެއްޖެކަން އެެނގުނީ އެމީހުންގެ ބައިސިކަލުތަައް ހޮހޮޅައިގެ ބޭރުގައި ހުރީމައެވެ.
