ހުޅަނގު އުތުރު ތުރުކީގައި ރޭލެއް ދަނގަނޑުން ނެއްޓި ފުރޮޅާލައިގެން 10 މީހުން މަރުވެ 73 މީހުން ޒަޚަމްވެެއްޖެއެވެ. ތުރުކީގެ ޓީވީ ޗެނެލަކުން ޚަބަރުދިން ގޮތުގައި ރޭލު ފުރޮޅާލަން ދިމާވީ ބޯކޮށް ވާރޭވެހި ބިންގަނޑު ކަނޑައިގެން ދިއުމުގެ ސަބަބުންނެވެ.
ޓްރާންސްޕޯޓް މިނިސްޓްރީން ނެރުނު ބަޔާނެއްގައި ވާގޮތުން، 362 މީހުންނާއިގެން ކަޕިކުލޭއިން އިސްތަންބޫލަށް ދަތުރުކުރަމުން ދިޔަ ރޭލުގެ ފަސް ބައި ދަނގަޑުން ނައްޓާފައި ވެއެވެ. 100 އަށްވެރެ ގިނަ އެންބިއުލާންސް އެ ސަރަހައްދުގައި ހަރަކާތެރިވަމުން ދާތަން ފެނިފައި ވެއެވެ.
ރޭލު ދަގަނޑުން ނެއްޓިފައިވަނީ ތެކިރްދާގު ސަރަހައްދުގެ ސަރީލާރު އަވަށުގައެވެ. އެ ސަރަހައްދުގެ ގަވަރުނަރާ ހަވާލާދީ އަނަޑޯލޫ ނިއުސް އެޖެންސީން ބުނި ގޮތުގައި، ރޭލު ފުރޮޅާއި ސަރަހައްދުގައި ވަނީ ބޯކޮށް ވާރޭ ވެހުމުގެ ސަބަބުން ޗަކަ ހެދިފައެވެ.
ރައީސު ރަޖަބް ޠައްޔިބު އެރްދޮޣާންގެ ވެރިކަމުގައި ތުރުކީ ޒަމާންވީ ރޭލުވޭ ނިޒާމު ޒަމާނީކޮށް ހައި ސްޕީޑް ރޭލު ތައާރަފުކޮށްފައި ވެއެެެވެ.
ތުރުކީގައި ހިނގި އެންމެ ނުރައްކާތެރި ރޭލު އެކްސިޑެންޓު ހިނގާފައި ވަނީ 2004 ވަނަ އަހަރުއެވެ. އެއީ ސަކަރްޔާ ސަރަހައްދުގައި ދަތުރުކުރަމުން ދިޔަ ހައި ސްޕީޑް ރޭލެއް ދަގަނޑުން ނެއްޓި ފުރޮޅާލައިގެންނެވެ. އެ ހާދިސާގައި 41 މީހުން މަރުވެ 80 މީހުން ޒަޚަމްވެފައި ވެއެވެ.
