ބުރާސްފަތި ދުވަހުއްސުރެ ޖަޕާނަށް ކުރަމުންދާ ގަދަ ވިއްސާރައިގައި ބޯކޮށް ވާރޭ ވެހި، ފެންބޮޑުވެ، ބިންގަނޑު ކަނޑައިގެން ދިއުމުގެ ސަބަބުން ގިިނަ ބަޔަކު މަރުވެ، އެތައް ބަޔަކަށް ވީނުވީއެއް ނޭނގި ގެއްލިއްޖެއެވެ.
ޖަޕާނުގެ ޚަބަރުފަތުރާ ވަސީލަތްތަކުން ބުނާ ގޮތުގައި 50 އަށްވުރެ ގިނަ މީހުން މަރުވެ 48 މީހުން ވީނުވީ ތެނެއް ނޭނގި ގެއްލިފައި ވެއެވެ. އަދި 1.9 މިލިއަން މީހުން ގެދޮރު ދޫކޮށް ދާން ޖެހިފައި ވެއެވެ.
އާދަޔާ ޚިލާފަށް ބޯކޮށް ވާރޭ ވެހުމުގެ ސަބަބުން އެހިމޭ، އޮކަޔާމާ، ހީރޯޝީމާ އަދި ކިޔޯޓޯގައި ފެންބޮޑުވެ، ބިންގަނޑު ކަނޑައިގެން ގޮސްފައި ވެއެެެވެ. މީގެ އިތުރަށް ގިފޫ ސަރަހައްދުގައި ފެން ބޮޑުވެދާނެ ކަމުގެ އިންޒާރު ވަނީ ދީފައެވެ.
"އަހަރުމެން މައުލޫމާތު އެއްކުރަމުން ދާތީ، މަރުވި މީހުންގެ އަދަދު އަދި އިތުރުވެގެން ދާނެކަމަށް ބެލެވޭ" އެހިމޭ ސަރަހައްދުގައި މީހުން ސަލާމަތްކުރުމުގެ މަސައްކަތުގައި ހަރަކާތެރިވާ ޔޮޝިނަބޫ ކަޓްސުއުރާ އެންއެޗްކޭ ޓީވީގައި ވާހަކަދައްކަމުން ބުނެފައި ވެއެވެ.
ޖަޕާން ސެލްފް ޑިފެސް ފޯހާއި، ފުލުހުންނާއި، އަލިފާންނިވާ މީހުން 48 ހާހަށްވުރެ ގިނަ މީހުން ދަނީ ހާލުގައި ޖެހިފައިވާ މީހުންނަށް އެހީވުމުގެ މަސައްކަތުގައި ހަރަކާތެރިވަމުންނެވެ. ޑިފެންސް މިނިސްޓަރު އިޓްސުނެރީ އޮނޮޑޭރާ ވިދާޅުވި ގޮތުގައި ބޭނުން ޖެހިގެން އަންގާލާއިރަށް ނުކުންނަން ތައްޔާރުވެގެން 21 ހާސް ސިފައިން އެބަތިއްބެވެ.
އޮކަޔާމާގައި ފެންބޮޑުވުމުގެ ސަބަބުން އުމުރުން ދުވަސްވީ މީހުން ބަަލަހައްޓާ ތަނެއްގައި 120 މީހުން ތާށިވެފައި ތިބިއިރު، ގިފޫ ސަރަހައްދުގައި ބިންގަނޑު ކަނޑައިގެންގޮސް މަގު ބަންދުވުމުގެ ސަބަބުން އެތައް ސަތޭކަ ބަަޔަކު އެހެންމީހުންނާ ވަކިވެފައި އެބަތިއްބެވެ.
ބޮޑުވަޒީރު ޝިންޒޯ އަބޭ ވިދާޅުވީ "ހާލަތު އާދަޔާއި ޚިލާފަށް ނުރައްކާތެރި" ކަމުގައެވެ. އޭނާ ވަނީ "ކުރެވުނު ހުރިހާ މަސައްކަތެއް ކޮށްގެން" ހާލުގައި ޖެހިފައިވާ މީހުން ސަލާމަތްކުރެއްވުމަށް އޭނާގެ ވަޒީރުންނަށް އަންގަވާފައެވެ.
ބައެެއް ހިސާބުތަކަށް އެެއް މީޓަރުގެ ވާރޭ ވެހިފައި ވާއިރު، 16 ވަރަކަށް ފޫޓަށް ފެންބޮޑުވެފައިވާ ކަމުގައި ޚަބަރުތައް ބުނެއެވެ.
