އިސްލާމްދީނަށް ހަޖޫޖަހައި ރާސޫލާއަށް ފުރައްސާރަ ކުރަމުންދާ މީހުން ރާއްޖޭގައި އެބައުޅޭ ކަމަށާއި އެފަދަ މީހުންނަށް ހަރުކަށި އަދަބު ދެއްވާނެ ކަމަށް ވެސް އެމަނިކުފާނު ވިދާޅުވިއެވެ.
ރައީސް ވިދާޅުވީ ރާއްޖޭގައި ޚިޔާލު ފާޅުކުރުމުގެ މިނިވަންކަން ނެތްކަމަށް ބުނެ ވާހަކަ ދެއްކިޔަސް އެފަދަ ކަންކަމަށް މިނިވަންކަން ނުދެއްވާނެ ކަމަށެވެ. އަދި އެފަދަ މީހުންނަށް ދެވޭ އަދަބު ވެސް ބޮޑުވާނެ ކަމަށެވެ.
އެމަނިކުފާނު ވިދާޅުވީ ބައެއް މީހުންގެ ފޭސްބުކު ޕޭޖާއި ޓްވިޓަރފަދަ އެއްޗެހި ބެލުމުން މިކަންކަން ވަރަށް ރަނގަޅަށް ފެންނަން ހުންނާނެ ކަމަށެވެ. އަދި އެފަދަ މީހުން ގުޅިފައިވަނީ ކޮންޕާޓީއަކަށްތޯ ބަލާލަން ޖެހޭ ކަމަށްވެސް ވިދާޅުވިއެވެ. އަދި ރާއްޖޭގައި އިސްލާމްދީން ނޫން އެހެން ދީނަކަށް ފުރުސަތު އޮތްތޯ ބެލުމަށް ކުރީގެ ސަރުކާރުން (ނަޝީދުގެ ސަރުކާރު) އޭރުގެ އިސްލާމިކް މިނިސްޓްރީއަށް ސިޓީއެއް ފޮނުއްވި ކަމަށް ވެސް ވިދާޅުވިއެވެ.
ރާއްޖޭގައި ހިނގާ މިފަދަ ކަންކަމުގެ ވާހަކަ ދެއްކުމަކީ ސިޔާސީ ވާހަކަތަކެއް ނޫން ކަމަށާއި އެފަދަ ވާހަކަ އެމަނިކުފާނު ދައްކަވަނީ އިސްލާމްދީނާއި ރަސޫލާއަށް އޮންނަ ޝައުގެއްގެ ސަބަބުން ކަމަށްވެސް ވިދާޅުވިއެވެ.
ރައީސް ޔާމީން ވިދާޅުވީ ޑިމޮކްރަސީގެ ވާހަކަ ދައްކަވާ ބޭފުޅުންނަށް ވެރިކަން ކުރައްވަން ލިބިވަޑައިގެންނެވުމުން އަމަލުކުރެއްވިގޮތް ވެސް ރައްޔިތުންނަށް ފެނިފައިވާނެ ކަމަށެވެ.
ރާއްޖޭގައި ޑިމޮކްރަސީ ނެތިގެން އެންމެ ބޮޑަށް ދައްކަން އޮންނަނީ ދެވާހަކައެއް ކަމަށާއި އެއީ ބައެއްކަންކަން ކުރުމާއި ޚިޔާލުފާޅު ކުރުމުގެ މިނިވަންކަން ނެތުމުގެ ވާހަކަ ކަމަށް ރައީސް ވިދާޅުވިއެވެ. އެކަމަކު އެމިނިވަންކަން ނެތިގެން ނުދައްކާކަށް ވާހަކައެއްނެތް ކަމަށްވެސް ވިދާޅުވިއެވެ.
"އަޅުގަނޑުމެން ދެކެފީމު ދިވެހިރާއްޖޭގައި އިސްލާމްދީން ނޫން އެހެންދީންތަކަށް ޖާގަ އޮންނާނެތޯ ވިދާޅުވެ އޭރު އިސްލާމިކް މިނިސްޓްރީގައި ހުންނެވި ދީނީ އިލްމުވެރިޔާއަށް ރަސްމީ ސިޓީއެއް ރައީސް އޮފީހަށް ފޮނުއްވިތަން. ރައްޔިތުންގެ މަޖިލީހަށް އެސިޓީ ގެނެސް ސުވާލު ވެސް ކުރިން. ރާއްޖޭގައި ޗާޗު ހެދުމާބެހޭ ގޮތުންވެސް އެފަރާތްތަކުން ވާހަކަ ދައްކައިފައިވާ ކަމަށް އެމަނިކުފާނު ވިދާޅުވިއެވެ. އެކަމަކު "އަޅުގަނޑު މިބުނަނީ ދިވެހިރާއްޖޭގައި އިސްލާމްދީން ނޫންދީނަކަށް ޖާގައެއް ނޯންނާނެޔޭ،" ރައީސް ވިދާޅުވިއެވެ.
އެމަނިކުފާނު ވިދާޅުވީ ޣައިރު މުސްލިމުން ނުކުރާވަރަށް ވެސް ދިނާއި ރަސޫލާއަށް މުސްލިމް ދިވެހި ބައެއް ކުދިން ހަޖޫޖަހަމުންދާ ކަމަށެވެ.
"އަޅުގަނޑުގެ ސަރުކާރެއްގައި އަޅުގަނޑު ބޭނުންވަނީ ގާނޫނީ ގޮތުން ދެވެންއޮން އެންމެ ހަރުކަށި އަދަބު މިފަދަ މީހުންނަށްދޭން. ގޫނޫނު ނެތްކަމަށްވާނަމަ ހަދައިގެން އެކަން ހުއްޓުވަންވެސް ޖެހޭ،" ރައީސް ވިދާޅުވިއެވެ. އެފަދަ މީހުންނަށް ދިވެހިރާއްޖެއިން އެއްވެސް މަންފާއެއް ލިބެންޖެހޭނެ ކަމަށް ގަބޫލުފުޅު ނުކުރައްވާ ކަމަށްވެސް ވިދާޅުވިއެވެ. "ސެޕްޓެމްބަރު ތޭވީސްވަނަ ދުވަހު އޮންނަ ވޯޓާ ހަމައަށްދާއިރު މިއީ އަޅުގަނޑުމެން ޚިޔާލަށް ގެންނަންޖެހޭ ކަންކަން،" ކަމަށް ވެސް ރައީސް ވިދާޅުވިއެވެ.
