ތައިލޭންޑްގެ ހޮހޮޅައަކަށް ވަދެ ތިއްބާކޮށް ބޯކޮށް ވާރޭވެހި ހޮހޮޅައިގައި ފެންބޮޑުވުމުގެ ސަބަބުން އެތަނުގައި ތާށިވެ ނުނުކުމެވިފައި ތިބި ބާރަ ކިޔަވާކުދިންނާ އެކުދިންގެ ފުޓުބޯޅަށް ކޯޗު ދިރިތިއްބާ ސަލާމަތުން ތިއްބާ ފެނިއްޖެއެވެ. އެމީހުން އިއްޔެ ހަވީރުގެ ވަގުތެއްގައި މި ފެނުނީ އެތާނގައި ހައްޔަރުވެފައި ތިބޭތާ ނުވަ ދުވަސް ފަހުންނެވެ.
ފާއިތުވި ހަފުތާގެ ހޮނިހިރު ދުވަހު 11 އަހަރާ 16 އަހަރާ ދެެމެދުގެ އެ ކުދިންނާއި އެކުދީންގެ 25 އަހަރުގެ ކޯޗު ހޮހޮޅައިގެ ތެރެއަށް ގެއްލުނު ފަހުން އެއްވެސް ގޮތަކަށް އެމީހުންނާ ގުޅިފައި ނުވެއެވެ.
ތައިލޭންޑުގެ އުތުރުގައިވާ ތަމް ލުއާންގ ހޮހޮޅައިގައި ތާށިވި ކިޔަވާކުދިންނާއި ކޯޗު ސަލާމަތްކުރަން ހިންގި އޮޕަރޭޝަނަށް އެންމެ ބޮޑަށް ހުރަސް އެޅުނީ އެސަރަހައްދަށް ވެހެމުން ދިޔަ ބޯވާރޭގެ ސަބަބުން ހޮހޮޅައިގެ އަނގަމަތީގައި ފެންބޮޑުވުމުގެ ސަބަބުންނެވެ.
އެހެންނަމަވެސް ހޯމަދުވަހުގެ ހަވީރުގެ ވަގުތެއްގައި ޗިއާންގ ރާއީ ޕްރޮވިންސްގެ ގަވަރުނަރު މޮޅިވަރުކަމުގެ ތެރޭގައި އޮތް ގައުމަށް ދިން އުފާވެރި ޚަބަރަކީ ތައިލޭންޑުގެ ކަނޑުގެ ސިފައިންގެ ޑައިވަރުން އެމީހުން ސަލާމަތްކުރި ޚަބަރެވެ.
"އަހަރުމެންނަށް އެ 13 މީހުން ސަލާމަތުން ތިއްބާ ފެނިއްޖެ. އެމީހުންނަށް އެތަނުން ބޭރަށް ނުކުމެވެންދެން އަހަރުމެން އެމީހުންނަށް އަޅާލައި، އެމީހުންގެ ކަންތައް ބަލަހައްޓާނަން." ނޫސްވެރިންނާ ވާހަކަދައްކަވަަމުން ގަވަރުނަރު ނަރޮންގްސަކް އޮސޮަޓަނަކޯން ވިދާޅުވިއެެވެ. އަަހަރުމެން އެމީހުންނަށް ކާބޯތަކެތި ގެނެސްދޭނަން. އަދި ޑައިވްކުރަން އެނގޭ ޑޮކްޓަރަަކު ގެންނާނަން.
ބިމުގެ އަޑީގައި އެތައް ދުވަހަކު ތިބުމަށް ފަހު އެމީހުން ހާލު މިހާރު ހުރި ގޮެތެއް ސާފު ނުވެއެވެ. އެހެންނަމަވެސް، އެތައް ދުވަހެއް ވަންދެން ހޮހޮޅައިގެ ވަށައިގެން ތިބި އާއިލާ މީހުން އެއް ބަޔަކު އަނެއް ބަޔަކަށް ބައްދައި އުފާފާޅުކޮށް ހެދިއެވެ.
ޑައިވަރުން އިއްޔެ ހެނދު ހޮހޮޅައިގެ އެެތެރެއަށް ވަނީ މޫސުން ތައްކޮޅެއް ރަނގަޅުވެ، ވާރޭވެހުން މަދުވެ، ހޮހޮޅައިގެ އަނގަމަތީގައި އޮތް ފެންގަނޑު ތިރިވާން ފެށުމުންނެވެ.
10 ކިލޯމީޓަރު ދިގު ތަމް ލުއާންގ ހޮހޮޅައަކީ ތައިލޭންޑްގެ އެންމެ ދިގު އެންމެ ދަތުރުކުރަން އުނދަގޫ ހޮހޮޅައެވެ.
