މިއަހަރު ސެޕްޓެމްބަރު 23 ވަނަ ދުވަހު ބާއްވާ ރިޔާސީ އިންތިޚާބުގައި ވޯޓު ދިނުމުގެ ހައްގު ލިބިފައިވާ މީހުންގެ ރަޖިސްޓަރީ އިސްލާހު ކުރެއްވުމަށްފަހު ދިވެހި ސަރުކާރުގެ ގެޒެޓުގައި ޝާއިއު ކުރައްވައިފިއެވެ.
ވޯޓާސް ލިސްޓް ގެޒެޓުގައި ޝާއިއު ކުރެއްވީ އެއަށް ހުށަހެޅުނު ޝަކުވާތަކާ ގުޅިގެން 734 އިސްލާހީ ބަދަލުގެނައުމަށްފަހުގައެވެ. ވޯޓާސް ލިސްޓަށް އެމްޑީޕީންވެސް ވަނީ 800 އެއްހައި އިސްލާހު ހުށަހަޅައިފައެވެ. އަދި އެހެނިހެން ފަރާތްތަކުންވެސް ވަނީ އިސްލާހު ހުށަހަޅައިފައި ކަމަށް އިލެކްޝަންސް ކޮމިޝަނުން ވަނީ ވިދާޅުވެފައެވެ.
އިންތިޚާބުތަކާބެހޭ އާންމު ގާނޫނުގެ 10 ވަނަ މާއްދާގެ (ބ)ގެ ދަށުން އިލެކްޝަންސް ކޮމިޝަނުން މި ބަދަލުތައް އާންމުކޮށްފައިވާއިރު، އިލެކްޝަންސް ކޮމިޝަނުންވަނީ މި ބަދަލުތަކަށް 10 (ދިހައެއް) ދުވަހުގެ ތެރޭގައި އަލުން ޝަކުވާ ހުށަހެޅުމުގެ ފުރުސަތު ހުޅުވާލައިފައެވެ.
މި އަހަރުގެ ރިޔާސީ އިންތިޚާބަކީ މިނިވަން، އިންސާފުވެރި އަދި ކާމިޔާބު އިންތިޚާބަކަށް ހެދުމަށްޓަކައި އެންމެހައި ފަރާތްތަކުން ކުރައްވާ މަސައްކަތްތަކަށް ދިވެހި ސަރުކާރުން ވަނީ މަރުހަބާ ވިދާޅުވެފައެވެ.
