ކުރިޔަށް އޮތް ރިޔާސީ އިންތިޚާބުގައި އިދިކޮޅު އެމްޑީޕީން ނުކުންނާނެ ރިޔާސީ ކެންޑިޑޭޓަކީ ކުރީގެ ރައީސް މުޙަންމަދު ނަޝީދު ކަމަށް ނިންމައި، އެމަނިކުފާނުގެ ކެމްޕޭނު ކުރިޔަށް ގެންދިޔަ ނަމަވެސް އިންތިޚާބުގެ ވޯޓު ކަރުދާހުގައި ރައީސް ނަޝީދުގެ ނަންފުޅު ބޭއްވުމުގެ ފުރުޞަތު އިލެކްޝަން ކޮމިޝަނަށްވެސް ނުދެއްވާނެ ކަމަށް ރައްޔިތުންގެ މަޖިލީހުގެ ނައިބު ރައީސް އަދި އެމްޑީޕީގެ ކުރީގެ ޗެއާޕާސަން ރީކޯ މޫސާ މަނިކު ވިދާޅުވެއްޖެއެވެ.
މަޖިލީހުގެ ޖަލްސާގައި ވާހަކަ ދައްކަވަމުން މޫސަ ވިދާޅުވީ އެކަމަށް ޗެލެންޖް ކުރައްވާ ކަމަށެވެ.
"އަޅުގަނޑު ޗެލެންޖުކޮށްފައި މިބުނަނީ ކުރިޔަށް އޮތް އިންތިޚާބުގައި ކުރީގެ ރައީސް ނަޝީދުގެ ނަމެއް ނޯންނާނެ، އިލެކްޝަންސް ކޮމިޝަނަށްވެސް އެފުރުސަތެއް އަޅުގަނޑުމެން ނުދޭނަން" މޫސަ ވިދާޅުވިއެވެ.
އިންތިޚާބެހޭ ގާނޫނުތަކަށް ބޮޑެތި އިސްލާހުތަކެއް މަޖިލިސް ތެރެއިން ގެންނަމުންދާ މިދަނޑިވަޅުގައި މޫސަ ވިދާޅުވީ ރައީސް ނަޝީދުގެ ނަންފުޅު މިފަހަރު އިންތިޚާބުގައި އޮންނާނެ ކަމަށް ބަޔެއް ފަރާތްތަކުން އަދިވެސް ހީކުރަމުން އަންނަ ކަމަށާއި ނަމަވެސް އެއީ ވާނެކަމެއް ނޫން ކަމަށެވެ.
އެމްޑީޕީން ދާދިފަހުން ބޭއްވި އެޕާޓީގެ ޕްރައިމަރީގައި ރައީސް ނަޝީދު ރިޔާސީ ކެންޑިޑޭޓެއްގެ ގޮތުގައި ހަމަޖައްސައި އެޕާޓީން ވަނީ ރިޔާސީ ޓިކެޓުވެސް ދީފައެވެ. ނަމަވެސް 13 އަހަރުގެ ޖަލު ޙުކުމާހުރެ ޤާނޫނީ ގޮތުން އަދި އެމަނިކުފާނަށް ވަނީ އިންތިޚާބުގައި ވާދަކުރެއްވުމުގައި ހުރަސްތަކެއް ކުރިމަތި ވެފައެވެ. ނަމަވެސް އެމްޑީޕީން އަދި ރިޔާސީ ކެންޑިޑޭޓެއްގެ ގޮތުގައި ހުންނެވީ ރައީސް ނަޝީދެވެ.
