އެފް-16 އަސްކަރީ މަތިންދާބޯޓު ބަހުރައިނަށް ވިއްކަން އެމެރިކާއިން ނިންމައިފި
އެމެރިކާގެ އަސްކަރީ މަތިންދާބޯޓުތަކުގެ ތެރެއިން ޓެކްނޮލޮޖީގެ ގޮތުން އެންމެ ކުރީގައިވާ އެއް ބޯޓު ކަމުގައިވާ އެފް-16 މަތިންދާބޯޓު ބަހުރައިނަށް ވިއްކަން އެމެރިކާއިން އެއްބަސްވެއްޖެއެވެ.
އިއްޔެ އެމެރިކާގެ ދިފާއީ ވުޒާރާ ޕެންޓަގަން އިން ބުނިގޮތުގައި މަތިންދާބޯޓު އުފައްދާ ކުންފުނި ލޮކްހީޑް މާޓިންއާ ހަވާލުކޮށްގެން އުފައްދާ މި މަތިންދާބޯޓުތަކު އެއްބަސްވުމުގައި ސޮއިކޮށްފައިވަނީ ފާއިތުވި އޮކްޓޯބަރު މަހުގެ ތެރޭގައެވެ.
ލޮކްހީޑް މާޓިންއިން އުފައްދާ އެފް-16 ބްލޮކް 70 މަރުކާގެ 16 މަތިންދާބޯޓު ބަހުރައިނަށް ވިއްކަން ނިންމާފައިވާއިރު މި އެއްބަސްވުމުގެ އަގު 1.12 ބިލިއަން އެމެރިކާ ޑޮލަރަށް އަރައެވެ. ޕެންޓަގަން އިން ބުނިގޮތުގައި މިބޯޓުތައް ހަވާލުކުރެވޭނީ 2023 ވަނަ އަހަރުގެ ޖުލައި މަހާ އޮކްޓޯބަރު މަހާ ދެމެދުގައެވެ.
މި މަތިންދާބޯޓުތައް އުފައްދާނީ ލޮކްހީޑް މާޓިން އިން ސައުތުކެރޮލައިނާގެ ގްރީންވިލްގައި ހިންގާ ކާރުޚާނާގައްޔާއި، ޓެކްސަސްގެ ފޯޓްވާތުގައި ހިންގާ ކާރުޚާނާގައެވެ.
މި އެއްބަސްވުމާއެކު ބަހުރައިން ވެގެން ގޮސްފައިވަނީ ގަލްފު ސަރަހައްދުގައި މި މަރުކާގެ މަތިންދާބޯޓު އެންމެ ކުރިން ލިބޭނޭ އެއް ގައުމަށެވެ.
2011 ވަނަ އަހަރު 'އަރަބި ރަބީއު' ގެ ހަރަކާތްތަކާ އެކު ބަހުރައިނުގައި ވެސް ހަމަނުޖެހުންތައް ފެށި، އަދިވެސް ދޭތެރެ ދޭތެރެއިން ބޮޑެތި ހަމަނުޖެހުމަށް ބަދަލުވެއެވެ. ގައުމުގެ އަޣުލަބިއްޔަތު އޮންނަ ޝީއީން ދަނީ މިހާރު ބަހްރައިންގައި އޮތް ވިރާސީ ރަސްކަން ދަސްތޫރީ ރަސްކަމަކަށް ގޮވާލުންނެވެ. އަނެއްކޮޅުން ބަހުރައިނަކީ ޤަޠަރު ހިސާރުކުރުމުގައި ސައޫދީ އަރަބިއްޔާއާއި ޔޫއޭއީއާ ބައިވެރިވާ ގައުމެކެވެ.
ބަހުރައިން ވައިގެ ބާރުގައި މިހާރު 25 މަތިންދާބޯޓު އޮވެއެވެ.
