ސެޕްޓެމްބަރު މަހު 23 ވަނަ ދުވަހު ބާއްވާ ރިޔާސީ އިންތިޚާބުގައި ވޯޓުލުމުގެ ހައްގު ލިބިފައިވާ މީހުންގެ ލިސްޓް އިލެކްޝަން ކޮމިޝަނުން އާންމު ކުރިފަހުން މިހާތަނަށް 16 ޝަކުވާއެއް އެ ލިސްޓާމެދު ހުށަހަޅާފައިވާ ކަމަށް އެ ކޮމިޝަނުން ބުނެފިއެވެ.
ކޮމިޝަނުގެ މެމްބަރު އަޙްމަދު އަކްރަމް ވިދާޅުވީ ވޯޓާސް ލިސްޓު ނެރުނު ފަހުން އައި 16 ޝަކުވާގެ ތެރޭގައި ހިމެނެނީ މައިގަނޑު ދެކަމެއްގައި ކަމަށެވެ. އޭގެތެރެއިން އެއްކަމަކީ މަރުވެފައިވާ ބަޔެއް މީހުންގެ ނަން ވޯޓުލާ ލިސްޓުގައި އޮތުމާއި 18 އަހަރު ނުފުރޭ ބަޔެއް ކުޑަކުދިންގެ ނަން ލިސްޓުގައި ހިމެނޭ ކަމަށް ބުނެ ކޮށްފައިވާ ޝަކުވާ ތަކެކެވެ.
ލިސްޓު ނެރުމަށް ފަހު ކޮމިޝަނުންވެސް ބުނެފައި ވަނީ އެފަދަ މައްސަލަތަކެއް ހުރެދާނެ ކަމަށާއި އެފަދަ ކަމެއް އޮތް ނަމަ ޝަކުވާ ހުށަހެޅުމަށެވެ. ސަބަބަކީ ވޯޓާސް ލިސްޓު ހަދާފައި ވަނީ ނޭޝަނަލް ރަޖިސްޓްރޭޝަންގައި ހުރި މައުލޫމާތުގެ އަލީގައި ކަމަށްވުމުން ރާއްޖެއިން ބޭރުގައި މަރުވެފައިވާ މީހެއްގެ މައުލޫމާތު ޑީއެންއާރަށް ނާންގައި އޮވެއްޖެނަމަ އެފަދަ މައްސަލައެއް ލިސްޓުން ފެނިދާނެތީއެވެ.
ކޮމިޝަނުން ނިންމާފައި ވަނީ މިހާރު އާންމުކޮށްފައިވާ ވޯޓާސް ލިސްޓަށް ޝަކުވާ ހުށަހަޅައި ނިމުމުން އަލުން ވޯޓާސް ލިސްޓެއް އިސްލާހުކޮށް ނެރުމަށެވެ. މިހާރު އޮތް ވޯޓާސް ލިސްޓަށް ޝަކުވާ ހުށަހެޅުމަށް ކޮމިޝަނުން ދީފައިވާ އެންމެ ފަހު ތާރީޚަކީ މިމަހުގެ ވިހި ވަނަ ދުވަހެވެ.
