ޕާޓީތަކުން ބާއްވާ ކޮންގްރެސް ވެސް ގާނޫނާއި ގަވާއިދާ އެއްގޮތަށް ނުބާއްވާ ކަމަށްވާނަމަ އެ ކޮންގްރެސްއެއް ބަލައި ނުގަންނާނެ ކަމަށް އިލެކްޝަންސް ކޮމިޝަނުން ވިދާޅުވެއްޖެއެވެ.
ޕީއެސްއެމްގެ "ރާއްޖެ މިއަދު" ޕްރޮގްރާމުގައި މިރޭ ވާހަކަ ދައްކަވަމުން އިލެކްޝަންސް ކޮމިޝަންގެ މެންބަރު އަދި ތަރުޖަމާނު އަހުމަދު އަކުރަމް ވިދާޅުވީ ކޮންމެ ޕާޓީއަކުންވެސް އެތެރޭގެ އިންތިޚާބެއްވެސް އަދި ކޮންގްރެސްއެއް ބޭއްވިޔަސް ބާއްވަން ޖެހޭނީ ސިޔާސީ ޕާޓީތަކުގެ ގާނޫނާއި އެހެނިހެން ގާނޫނުތަކާއި ގަވާއިދު ތަކުގެ ތެރެއިން ކަމަށެވެ.
ރާއްޖޭގެ ސިޔާސީ ޕާޓީތަކުގެ ތެރެއިން ދެން އެންމެ އަވަހަށް ކޮންގްރެސް ބާއްވަން ތައްޔާރުވަމުން ގެންދަނީ އެމްޑީޕީއާއި ޖޭޕީއެވެ. އެމްޑީޕީން އެންމެފަހުން ބޭއްވި ރިޔާސީ ޕްރައިމަރީވެސް ބައިނުގަންނަ ކަމަށް އިލެކްޝަންސް ކޮމިޝަނުން ވަނީ ވިދާޅުވެފައެވެ. އެއީ އޭގައި ރައީސް ނަޝީދު ވާދަކުރެއްވުމުންނެވެ.
ކޮންގްރެސް ބާއްވާއިރުވެސް ޝަރުއީ ކޯޓަކުން ހުކުމެއް ކުރައްވައި ހުކުމް ތަންފީޒު ކުރަމުންދާ ފަރާތްތައް ބައިވެރިކޮށްގެން ބާއްވާ ކޮންގްރެސްތައް ބަލައި ނުގަންނާނެ ކަމަށް އަކުރަމް ވިދާޅުވިއެވެ.
"ޖަލުތަކާއި ޕެރޯލްގެ ގާނޫނުގެ 62 ވަނަ މާއްދާގައި މިއޮންނަނީ ސިޔާސީ ޕާޓީތަކާއި ޖަމިއްޔާތަކަށް އާންމު މެންބަރެއްގެ ހައިސިއްޔަތުން ނިސްބަތް ވުން ފިޔަވައި އެއިންތަނެއްގެ މަސްއޫލު ފަރާތެއްގެ ގޮތުގައި ހުރުމާއި އެތަންތަނުން ހިންގާ އެހެން ހަރަކާތެއްގައި ބައިވެރިވުމުގެ ހައްގު ހުކުމް ތަންފީޒު ކުރަމުންދާ މުއްދަތުގެ ތެރޭގައި ލިބިގެން ނުވާކަމަށް. އެހެންވީމާ އަޅުގަނޑުމެން މިދަންނަވަނީ ގާނޫނުން ހައްގު ލިބިފައި ނުވާކަމެއް އެފަދަ ފަރާތްތަކަށް ހޯދައި ދިނުމަށްޓަކައި ހަރަކާތްތަކެއްވެސް ސިޔާސީ ޕާޓީތަކުން ނުހިންގާށޭ. މީގައި ކޮންމެހެން ކުރީގެ ރައީސް ނަޝީދެއް އެހެން ފަރާތަކަށް ބެލުމެއްނެތް،" އަކުރަމް ވިދާޅުވިއެވެ.
އޭނާ ވިދާޅުވީ އިލެކްޝަމްސް ކޮމިޝަން އަބަދުވެސް މަސައްކަތް ކުރައްވަމުން ގެންދަވާނީ ގާނޫނާއި ގަވާއިދާއި، ކޯޓު އަމުރެއް އޮތްނަމަ އެއާ އެއްގޮތަކަށް ކަމަށެވެ. އެހެން ކަމުން ޕެރޯލްގެ ގާނޫނޫގެ 62 ވަނަ ބާއްދާ ބުނާ ހައްގުތައް ގެއްލިފައިވާ ފަރާތެއް ބައިވެރިކޮށްގެން އެއްވެސް ޕާޓީއަކުން ކޮންގްރެސް ނުބާއްވާނެ ކަމަށް އުންމީދު ކުރައްވާ ކަމަށް އޭނާ ވިދާޅުވިއެވެ.
"ޕެރޯލް ގާނޫނުގެ 62 ވަނަ މާއްދާގައި ބުނެފައިވާ ހައްގުތައް ގެއްލިފައިވާ ފަރާތްތަކަށް ކޮންގްރެސްގައި ބައިވެރި ނުވެވޭނެ. އަޅުގަނޑު ޔަގީން ކުރަނީ ސިޔާސީ ޕާޓީތަކުން ކޮންގްރެސް ކުރިއަށް ގެންދާއިރު އެފަދަ ފަރާތްތައް ބައިވެރިކޮށްގެން ކުރިއަށް ނުގެންދާނެ ކަމަށް. އެހެންވީމާ އެފަދަ ގޮތަކަށް ކޮންގްރެސް ބާއްވައިފިނަމަ އެ ކޮންގްރެސްއެއް އަޅުގަނޑުމެން ބަލައެއް ނުގަންނާނަން،" އަކުރަމް ވިދާޅުވިއެވެ.
ކޮންގްރެސް އެންމެ އަވަހަށް ބާއްވަން ތައްޔާރުވަމުންދާ ޖޭޕީއާއި، އެމްޑީޕީގެ އެންމެ އިސް ދެބޭފުޅުން ކަމަށްވާ ގާސިމް އިބްރާހީމާއި، ރައީސް ނަޝީދަކީ ޖަލު ހުކުމެއް ތަންފީޒު ކުރައްވަން ޖެހިވަޑައިގެންފައިވާ ދެބޭފުޅުންނެވެ. އެހެންނަމަވެސް ބޭސް ފަރުވާއަކަށް ބޭރަށް ވަޑައިގެންނެވި ގޮތަށް އެދެ ބޭފުޅުންވެސް އެނބުރި ރާއްޖެ ވަޑައެއް ނުގަންނަވައެވެ. ގާސިމަކީ ޖޭޕީގެ ލީޑަރެވެ. ރައީސް ނަޝީދަކީ އެމްޑީޕީގެ ރައީސެވެ.
