އިންޑިޔާގެ ސިޔާސީ މައިދާނުގައި ބާރަތިޔާ ޖަނަތާ ޕާޓީ (ބީޖޭޕީ) އާ ވާދަކުރެވޭ ވަރުގެ ޕާޓީއެއް މިވަގުތު ނެތްކަން އެނެއްކާވެސް އެޕާޓީން ސާބިތުކޮށްދީފިއެވެ. ރާޖިޔާސަބާ (ގާނޫނުހަދާ މަޖިލީހުގެ މަތީގެ) އަށް 7 ސްޓޭޓަކުން 26 ގޮނޑިއަށް މެންބަރުން އިންތިޚާބުކުރަން އިއްޔެ ނެގި ވޯޓުގައި ބީޖޭޕީން ވަނީ 12 ގޮނޑި ކާމިޔާބުކޮށްފައެވެ. އެންމެ ބޮޑު އިދިކޮޅު ޕާޓީ، އިންޑިޔަން ނޭޝަނަލް ކޮންގްރެސް (ކޮންގްރެސް ޕާޓީ) އަށް ލިބުނީ 5 ގޮނޑިއެވެ. ބާކީ ހުރި ގޮނޑިތައް ކާމިޔާބުކުރީ ސަރަހައްދީ ކުދި ޕާޓީތަކުންނެވެ. އިރުއުތުރުގެ ސަރަހައްދީ ޕާޓީއެއް ކަމުގައިވާ އޯލް އިންޑިޔާ ޓްރިނަމޫލް ކޮންގްރެސް އިން 4 ގޮނޑި ކާމިޔާބުކުރިއެވެ. އިންޑިޔާގެ އެންމެ ބޮޑު ސްޓޭޓް ކަމުގައިވާ އުއްތަރު ޕްރަދޭޝް އިން ބީޖޭޕީ ވަނީ 9 ގޮނޑި ހޯދާފައެވެ.
ބީޖޭޕީގެ މިކާމިޔާބީއާކުވެސް، ވެރިކަންކުރާ އެންޑީއޭ ކޯލިޝަނަކީ އަދިވެސް ރާޖިޔާސަބާގައި މައިނޯރިޓީއެވެ. މެޖޯރިޓީ އޮތީ އިދިިކޮޅު ފަރާތްތަކަށެވެ.
"ތަފާތު ސްޓޭޓްތަކުން ރާޖިޔާ ސަަބާއަށް ހޮވުނު އެންމެންނަށް މަރުހަބާ ކިޔަން. އަދި އެމީހުންގެ ޕާލަމެންޓަރީ މަސައްކަތަށް ކާމިޔާބީއަށް އެދެން. އެމީހުން ހޮވި ސްޓޭޓްތަކުގެ އުއްމީދުތައް ހާސިލްކޮށްދޭން އެމީހުން މަސައްކަތްކުރާނެ ކަމަށް އަހަރެން އުއްމީދުުކުރަން." ބޮޑުވަޒީރު ނަރެންްދްރަ މޯދީ ކުރެއްވި ޓްވީޓެއްގައި ވިދާޅުވެފައި ވެއެވެ.
2019 ވަނަ އަހަރު ބާއްވާ އާއްމު އިންތިީޚާބު ގާތްވަމުން އަންނައިރު، އިންތިޚާބުތަކުގައި ބީޖޭޕީ ހޯދަމުންދާ ކާމިޔާބީތަކުގެ ސަބަބުން އިދިކޮޅު ކޮންގްރެސްއަށް އަންނަ އާއްމު އިންތިޚާބުގައި ބޮޑުކާމިޔާބީ އެއް ލިބިދާނެކަމުގެ އުއްމީދެއް އަދި ނެތެވެ. ކުރިއަށް ދުވަސްތަކުގައި އިންޑިޔާގެ ސިޔާސީ މަސްރަހަށް ބޮޑު ލޮޅުމެެއް ނާންނަކަމުގައި ވަނީނަމަ، އިތުރު ދައުރަކަށް ބީޖޭޕީ އިންތިޚާބު ވުމަކީ ގާތް ކަމެކެވެ.
