( 3 އޯގަސްޓް 2025 ގައި ޝާއިޢުކުރި ބަޔާގުޅޭ )
މުރުތަސިމާ ނުގުޅިގެން ، މީރަބް ހާސްވެފައި ހުއްޓާ ، ރޮހޭލްގެ ފޯނެއް މީރަބްގެ ފޯނަށް އައެވެ. އެއީ ރޮހޭލްގެ ފޯނެއްކަން އެނގުމާއެކީ ފޯނު ކަނޑައިލިނަމަވެސް އަނެއްކާވެސް ، ރޮހޭލް ގުޅިއެވެ. ދެތިން ފަހަރަށް ރޮހޭލްގެ ފޯނު ކަނޑައިލިތަނުން ، ދެން އައީ ރޮހޭލްގެ މެސެޖެކެވެ. އެންމެ ފަހަރަކުނަމަވެސް ، އޭނާއާ ވާހަކަ ދައްކައިލުމަށް ރޮހޭލްގެ މެސެޖްގައި ލިޔެފައި އޮތެވެ. ރޮހޭލަކީ އޭނާގެ ވަރަށް ގާތް ރަޙުމަތްތެރިޔެކެވެ. މީހުން ބުނާގޮތުގައި ، ފިރިހެންކުއްޖަކަށް ، އަންހެންކުއްޖެއްގެ އެންމެގާތް ރަޙުމަތްތެރިޔެއްގެ ގޮތުގައެއް ނުހުރެވޭނެއެވެ. އެފަދަ ގުޅުމެއް ކިތަންމެ ގާތްކަމުގައިވިޔަސް ، ގޯސްތަކެއް ހިނގާނެއެވެ. އެހެންނަމަވެސް ، މީރަބް ޤަބޫލުކުރާގޮތުގައި ، ރޮހޭލަކީ ތަފާތު މީހެކެވެ. ރޮހޭލަކީ ، ދުވަހަކުވެސް އެދެމީހުންގެ ރަޙުމަތްތެރިކަމުގެ ގުޅުމަށް ގޯސްވިސްނުމެއް ގެންގުޅުނު މީހެއްނޫނެވެ. މީރަބްގެ ހިތުގައި ރޮހޭލްގެ މައްޗަށް އޮތީ އުޚުއްވަތްތެރިކަމުގެ މާތް ގުޅުމެވެ.
ދެންއައި ފޯނު ، ނުނަގަންހުރެފައިވެސް މީރަބް ނެގިއެވެ. އޭނާއާ ވާހަކަ ދެއްކުމަކީވެސް އަދި ބައްދަލުކުރުމަކީވެސް މީރަބަށް އެވަގުތު ކުރެވެން ނެތްކަމެއްކަމުގައި މީރަބް ބުންޏެވެ. އަޙްމަދުއާބާދަށް ރޮހޭލް އެއައީ ، މީރަބަށްޓަކައެވެ. މީރަބް ދެކިލުމަށެވެ. މީރަބް ހޯދަމުންގޮސް އޭނާގެ ގެޔަށްވެސް ރޮހޭލް ދިޔަކަމަށް ބުންޏެވެ. ހަމަ އެންމެ ފަހަރަކު ، އޭނާއާ މީރަބް ބައްދަލުކޮށްލުމަށް ރޮހޭލް އާދޭސްކުރަމުން ގެންދިޔައެވެ. އެ ދެމީހުންގެ ރަޙްމަތްތެރިކަމުގެ ޙައްޤުގައެވެ.
ގޭގެ އެއްވެސް މީހަކަށް ނާންގައި ، ރޮހޭލްއާ ބައްދަލުކުރުމަށް މީރަބް ދިޔައެވެ. މީރަބް ލޯބިނުވާމީހަކާ ހިތާ ދެކޮޅަށް ކައިވެނިކުރީތީ ރޮހޭލް އިނީ ހިތްހަމަ ނުޖެހިފައެވެ. ދެމީހުންގެ ވާހަކަ ވަކި ހިސާބަކަށް ދިޔަތަނާ ، މީރަބްދެކެ ރޮހޭލް ލޯބިވާ ވާހަކަ ރޮހޭލް ބުންޏެވެ. ރޮހޭލްގެ އެވާހަކަ މީރަބަކަށް ޤަބޫލެއް ނުކުރެވުނެވެ. އެކަހަލަގޮތަކަށް މީރަބަށް އެއްވެސް އެއްޗެއް ވިސްނޭނެހެން ، ދުވަހަކުވެސް ރޮހޭލް ވާހަކަ ދައްކާފައެއް ނުވެއެވެ. އެހާ ގިނަދުވަހު އެކުގައި އުޅުނު އިރުވެސް ، ރޮހޭލްގެ ފަރާތުން އެކަހަލަ އެއްވެސް ޢިޝާރާތެއް މީރަބަކަށް ލިބިފައެއް ނެތެވެ.
" މީރަބްގެ އުފަންދުވަހުގެ ޕާޓީ އަހަރެން ރޭވީ ، އަހަރެން މީރަބްދެކެ ލޯބިވާ ވާހަކަ ބުނުމަށެވެ. އެވާހަކަ ނުބުނެވިގެން އުޅެނިކޮށް ، އެތަނަށް މުރުތަސިމް އައިސް ، ޖަނަވާރެއްހެން ޖަހައިގަނެގެން މީރަބް އެތަނުން ގެންދިޔައީއެވެ. މުރުތަސިމާ ކައިވެނި ކުރިއިރު ، އެންމެފަހަރަކުވެސް އަހަރެންގެ މަތިން މީރަބް ހަނދާންކޮށެއް ނުލައެވެ. އަހަރެންނަށް ލިބޭނެ ތަކްލީފާއި ހިތްދަތިކަން އިޙްސާސްކޮށެއް ނުލައެވެ. މި އަނގޮޓިޔަކީ ، އަހަރެން މީރަބްދެކެ ލޯބިވާ ވާހަކަބުނެ ، މީރަބްގެ އިނގިލީގައި އަޅުވަން ގެންގުޅުނު އަނގޮޓިއެވެ. " ރޮހޭލް ބުންޏެވެ.
ރޮހޭލްގެ ޖީބުން ކުޑަފޮށްޓެއް ނަގައި ، އޭގައިވާ އަނގޮޓި މީރަބަށް ދައްކައިލިއެވެ. ރޮހޭލް އަބަދުވެސް އެއަނގޮޓި ބާއްވަނީ އޭނާގެ ޖީބުގައެވެ. އޭނާގެ ހަށިގަނޑާ އެއަނގޮޓި ވަކިކޮށެއް ނުލައެވެ. މީރަބް އިނީ ބުނާނެ އެއްޗެއްވެސް ނޭނގިފައެވެ. ރޮހޭލް ގެ ހިތަށް ތަދުކުރެވުނީތީ ، މީރަބް މަޢާފަށް އެދުނެވެ. މިހާރު ދެން ކުރެވޭނެ އެއްވެސްކަމެއް ނެތެވެ. ހުރިހާކަމެއް މިހާރު އެއޮތީ ނިމިފައެވެ. މީރަބަކީ ، މީހެއްގެ އަނތްބެކެވެ. އެހެންނޫނަސް ، އޭނާ އަބަދުވެސް ބަލަނީ ރޮހޭލަކީ އޭނާގެ އެންމެ ގާތް ރަޙުމަތްތެރިޔާ ކަމުގައެވެ. އަދި ، ކުރިޔަށް އޮތްތާނގައިވެސް އޭނާ ބަލާނީ އެގޮތަށެވެ. މީރަބްގެ ހިތުގައި ރަޙްމަތްތެރިކަން ފިޔަވައި ، ރޮހޭލްގެ މައްޗަކަށް އެއްވެސް އިޙްސާސެއް ނެތެވެ.
އެވަގުތު ، އަންވަރަށް އައިސް އެ ހޮޓަލަށް ވަދެވެއެވެ. މީރަބާއި ރޮހޭލްތިބީ ، ރިސެޕްޝަންގައި ހުރި މޭޒެއްގެ ދެފަރާތުގައި އިށީނދެލައިގެންނެވެ. މީރަބް ފެނިފައި ، އަންވަރު ދިޔައީ ސިއްސައިގެންނެވެ. އެ ޙާލަތުގައި މީރަބް ގެއިން ބޭރަށް ނުކުމެގެން ނުވާނެއެވެ. ޚާނަމް އޮތީ ، އެނދުން ތެދުވަންވެސް މީރަބަށް މަނާކޮށްފައެވެ. އެކަހަލަތާކުން މީރަބާ ދިމާވުމަކީ ، މީރަބްގެ ގޮތް އޭނާއަށް ސާފުކޮށް އެނގެން މެދުވެރިވި ޙާލަތެއްކަމަށްވެސް ވެދާނެއެވެ. ފިރިހެންކުއްޖަކު އައިސް ، މީރަބްދެކެ ލޯބިވާ ވާހަކަ ބުނިކަމަށް ، ވައްޤާސް އޮތީ އަންވަރުގާތު ބުނެފައެވެ. މި ފިރިހެންކުއްޖާއަކީ ، އަނެއްކާ ވައްޤާސް އެބުނި ކުއްޖާ ބާވައެވެ ؟ އަންވަރު އެތާކު ގިނައިރަކު މަޑެއް ނުކުރެއެވެ. މީރަބަށް އޭނާ ނުފެންނަނިސް އެތަނުން ނުކުތެވެ. އޭނާ ބައްދަލުކުރަންދިޔަ މީހަކާ ބައްދަލުކުރާކަށްވެސް ނޫޅެއެވެ.
ރޮހޭލްއާ ބައްދަލުކުރުމަށްފަހު ، މީރަބް އައިސް ގެޔަށް ވަތްތަނުން ޚާނަމްއާ ދިމާވިއެވެ. މީރަބް ބޭރަށްގޮސް އައިމަ ޚާނަމް އެހާ ހިތްހަމައެއް ނުޖެހުނެވެ. އެކަމަކު ރުޅިއައިސްގެން އެއްޗެއް ބުނާކަށް ބޭނުމެއް ނުވިއެވެ. އެއީ ، މީރަބް މިހާރުއިން ޙާލަތަށް ބަލާއިރު ، ރަނގަޅުކަމެއްނޫނެވެ. އެހެންނަމަވެސް ، މީރަބް ބޭރުން އެއައީ ކޮންތާކަށް ގޮސްތޯ ، ތަންކޮޅެއް ބާރަށް ޚާނަމަށް އަހައި ލެވުނެވެ. ކުއްލިޔަކަށް ދޭނެ ޖަވާބެއް ނޭނގި ، މީރަބް ހާސްވެފައި ހުއްޓާ ، އެތަނަށް އަންވަރު އައެވެ. މީރަބް އެއައީ ، ހޮސްޕިޓަލަށް ގޮސްފައިކަމަށް ބުނެ މީރަބަށް ދޯ އެއްލައި ، އެކަން އަންވަރު ހަމަޖައްސާލަ ދިނެވެ. އަދި ، މީރަބް ޑޮކްޓަރަށް ދާން ޖެހޭނެނޫންހޭ ބުނެ ، ޚާނަމްގެ ކަންބޮޑުވުން ކުޑަކޮށްލަ ދިނެވެ. އެކަމަކުވެސް ، ޚާނަމްގެ ހިތަކަށް ހަމަޖެހުމެއް ނުލިބުނެވެ. މީރަބް އެކަނި ހޮސްޕިޓަލަށް ދިޔުމުގެ ސަބަބުންނެވެ. މީރަބް އެކަނި އެއްވެސް ތާކަށް ބޭރަށް ގޮސްގެން ނުވާނެކަމަށް ބުނެ ، މީރަބް ދާންބޭނުންވާ ތާކަށް ގެންދާނީ އޭނާކަމަށް ބުނަމުން ގޭތެރެޔަށް ވަނެވެ.
" މީރަބް ތިޔައީ ހޮސްޕިޓަލުންނޭ ބުނެ ، އަހަރެން ދޮގުހެދީ ކީއްވެތޯ ނާހާނަން ހެއްޔެވެ ؟ " އަންވަރު އަހައިލިއެވެ.
އަންވަރު ދޮގުހަދައި ، މީރަބް ސަލާމަތްކޮށްދިން ސަބަބެއް ބަލަން މީރަބްވެސް ބޭނުން ވިއެވެ. ހޮސްޕިޓަލްކައިރީ ހުރި ހޮޓަލުގައި ފިރިހެން ކުއްޖަކާ ވާހަކަ ދައްކަން ދެންމެ މީރަބް އިންތަން ފެނުނު ވާހަކަ އަންވަރު ބުންޏެވެ. ދޮގުހެދީ ، އެކަމުން މީރަބް ސަލާމަތް ކޮށްދޭން ވެގެންނެވެ.
" މީރަބާއެކީ ކޮލެޖްގައި ކިޔަވަންއުޅުނު ކުއްޖަކީ އެއީ ނޫންހެއްޔެވެ ؟ " އަންވަރު ބުންޏެވެ.
މީރަބް އެކަމަށް އެއްބސްވުމާއެކީ ، އޭނާއަށް ގުޅައިގެން އަޙްމަދުއާބަދަށް ގެނައީ މީރަބްތޯ ، އަންވަރު ސުއާލު ކުރިއެވެ. ނޫނެކެވެ. މީރަބް ހޯދަމުން ، އަޙްމަދުއާބާދަށް އައީ އޭނާކަމުގައި މީރަބް ޖަވާބު ދިނެވެ. މީރަބެއް އޭނާއަކަށް ނުގުޅައެވެ. ރޮހޭލާބެހޭގޮތުން ، މީރަބާއި އަންވަރާ ދެމެދު ކޮންމެވެސް ވަރަކަށް ބަހުސް ހިނިގިއެވެ. އެއީ ، މީރަބްގެ ކޮލެޖްގެ ރަޙުމަތްތެރިއެއްކަމަށް ވާތީ ، އޭނާއާ ބައްދަލުކޮށްލުމަށް މީރަބް ދިއުމުގައި މައްސަލައެއް އޮތްކަމަކަށް މީރަބަކަށް ޤަބޫލެއް ނުކުރެވުނެވެ. އަންވަރު ހިތްހަމަ ނުޖެހުނީ ، ރޮހޭލް ގެޔަށް ގެނައުމުގެ ބަދަލުގައި ، އޭނާއާ ބައްދަލު ކުރުމަށް ، އޭނާހުރި ހޮޓަލަށް މީރަބް ދިއުމުންނެވެ. ރަޙުމަތްތެރިއެއްކަމަށް ވަންޏާ ، ގެޔަށް ގެނައުމަކީ ، މައްސަލައެއްނޫންކަމަށް އަންވަރު ބުންޏެވެ. އޭރަށް ގޭގެ އެންމެންނަށްވެސް އޭނާއާ ބައްދަލުކޮށް ލެވޭނެއެވެ.
" އެއީ ، މީރަބާއެކީ ދިރިއުޅެން ބޭނުންވާކަމަށް ބުނެ ، އަދި މީރަބްދެކެ ލޯބިވާކަމަށްބުނެ ، ވައްޤާސްމެންގެޔަށް ދިޔަ ކުއްޖާ ނޫންހެއްޔެވެ ؟ މީރަބް މީހަކާ އިނދެގެން ހުރިކަން އެނގިހުރެމެ ، މީރަބާ ލޯބީގެ ވާހަކަ ދެއްކުން އެއީ ރަނގަޅުކަމެއް ހެއްޔެވެ ؟ މީރަބަކީ މިހާރު މީހެއްގެ އަމާނާތަކަށްވެ ، މީހެއްގެ ބެލުމުގެ ދަށުގައިވާ މީހެކެވެ. އިޙްތިރާމް ލިބިގެންވާ ޤަދަރުވެރި ޢާއިލާއެއްގެ ޅީދަރިއެކެވެ. އަހަރެންގެ ދަރިފުޅު ( މީރަބް ) އަކީ ، މީހުންނާ ޖަދަލުކުރާ ، މީހުންނަށް ދޫނުކުރާ ހިތްވަރުގަދަ ، މިނިވަން ޚިޔާލަށް ލޯބިކުރާ ކުއްޖެއްކަން ، އަހަރެންނަށް އެނގެއެވެ. އެކަމަކު ، އަޚްލާޤީގޮތުން ދަށް ކުއްޖެއްކަމެއް އަހަރެންނަކަށް ނޭނގެއެވެ. އެކަން އެގޮތަށް ޤަބޫލުކުރާކަށްވެސް އަހަރެން ބޭނުމެއް ނެތެވެ. އެގޮތަށް އެކަން އޮތްނަމަ ، އަހަރެމެންނަށް އިސްއުފުލާލައިގެން މަގުމަތީ ހިނގާކަށް ނުކެރޭނެއެވެ. " އަންވަރު ބުންޏެވެ.
މީރަބާ ދިމާލަށް އޑުހަރުކޮށް އެއްވެސް ވާހަކައެއް ބުނާކަށް އަންވަރު ބޭނުމެއް ނޫނެވެ. އެހެންނަމަވެސް ، އޭނާއަށް އެފެނުނު މަންޒަރަކީ ، ރަނގަޅު މަންޒަރެއް ނޫންކަން ، މީރަބަށް ވިސްނައިދޭން އަންވަރު ބޭނުންވިއެވެ.
" އަހަރެންނަކީ ، އަޚްލާޤެއްނެތް މީހެއްނޫނެވެ. އަހަރެންގާތު ރޮހޭލް ދެއްކި ހުރިހާ ވާހަކައަކަށް އަހަރެން އިންކާރު ކުރީމެވެ. އަހަރެންނަކީ މީހެއްގެ އަނތްބެއްކަމުގައިވެސް ބުނީމެވެ. އަދި ، އަހަރެން ރޮހޭލްދެކެނީ ހަމައެކަނި ރަޙުމަތްތެރިއެއްގެ ގޮތުގައި ކަމަށް ބުނީމެވެ. ރޮހޭލްދެކެ އަހަރެން ލޯބިނުވާކަމަށްވެސް ބުނީމެވެ. ރޮހޭލްގެ ހިތުގައި އަހަރެންގެ މައްޗަށް އޮތް އިޙްސާސަކީ އަހަރެންގެ ބާރުގެ ދަށުގައިވާ އެއްޗެއް ނޫނެވެ. އަހަރެންނަކީ ބޯހަރު މީހެކެވެ. ޒުވާބުވެސް ކުރާ މީހެކެވެ. އެކަމަކު ، އަހަރެންނަކީ އަޚްލާޤެއްނެތް މީހެއް ނޫނެވެ. އެކަމަކު ބުނަން ހެއްޔެވެ ؟ އަހަރެން މިގެޔަށް ގެނެސް ، އަހަރެންގެ ނުރުހުމުގައި މީހަކާދެވާފަ ، މިގޭތެރޭގައި ބަންދުކޮށް ބެއިންދުމުގެ ސަބަބުން ، އަހަރެންވެސް މިހުންނަނީ ، އިސްއުފުލާލައިގެން މަގުމަތީ ، ހިނގާލަން ނުކެރޭ ވަރަށް ލަދުގެންފައެވެ. ރޮހޭލްވެސް އަހަރެންނަށް އެކަމާ މަލާމާތްކޮށް ލަދުގަންނުވައިލިއެވެ. އެކަމަކުވެސް ، އަހަރެންނަކީ ، ލަދެއް ޙަޔާތެއްނެތް މީހެއްނޫނެވެ. އެކަން ހަނދާން ކުރައްޗެވެ. " މީރަބް ބުންޏެވެ.
މީރަބް އެކިޔައިދިނީ ، ބައްޕަޔަކާ މުޚާތަބުކޮށް ދަރިޔަކު ދައްކާ ކަހަލަ ވާހަކައެއް ނޫނެވެ. އެ ވާހަކަ އެގޮތަށް އެދެއްކުނީ މީރަބްގެ ބޯހަރުކަމުންނެވެ. މީރަބުގެ ބޮލުގައި އެޅުވޭ އިލްޒާމަށް ، އޭނާ މަޑުން ނުހުންނާނެކަން އަންގާލަ ދިނުމަށް ޓަކައެވެ. އޭނާއަކީ ކޮންކަހަލަ ކާކުކަން ، އަންވަރަށް ސާފުކޮށްދިނުމަށެވެ.
މީރަބަށް މުރުތަސިމް ލޮލަށް ނުފެންނަތާ މިހާރު ދެދުވަސް ވެއްޖެއެވެ. މުރުތަސިމް ދިޔައީ ދަނޑުބިމަށްކަން މީރަބަށް އެނގުނީ ނޯކަރެއްގެ ފަރާތުންނެވެ. ޙަޔާވެސް މުރުތަސިމާއެކީ ދިޔަކަން މީރަބަށް އެނގިއްޖެއެވެ. މުރުތަސިމްގެ ކަންކަން ބެލެހެއްޓުމަށްޓަކައި ، މުރުތަސިމާއެކީ ޙަޔާ ފޮނުވީ ޚާނަމްކަންވެސް މީރަބަށް އެނގުނެވެ. އޭރު ރޭގަނޑު ނުވައެއް ޖަހައިފިއެވެ. ލަސްވެފައި ހުއްޓަސް ، އެރެއިން އެރެޔަށް ދަނޑުބިމަށް ދާން މީރަބް ނިންމިއެވެ. އަދި ، ޑްރައިވަރަށް އަންގައިގެން ކާރު ތައްޔާރު ކުރުމަށް ނޯކަރަކަށް އަންގައިގެން ވަގުތުން ނައްޓައިލިއެވެ.
ރޭގަނޑުގެ ދަންބަޔަށް އެޅިއިރުވެސް މުރުތަސިމެއްވެސް ނުނިދައެވެ. އަދި ޙަޔާ ގާތަކަށްވެސް ނިންޖެއް ނާދެއެވެ. ބަނގަލޯގެ ބޭރުގައި ހުރިއިރު ، މުރުތަސިމާ ގާތްވުމަށްޓަކައި ، ލިބިފައި އޮތް ފުރުޞަތުގެ ބޭނުންހިފާނެ ގޮތެއް ޙަޔާ ރާވަމުން ދިޔައެވެ. މުރުތަސިމް ނިދާފަ އޮތިއްޔާ އެއް އެނދުގައި މަޑުމަޑުން އޮށޯވެ ، އިރުއަރަންދެން މުރުތަސިމްގެ މޫނަށް ބަލަހައްޓައިގެން އޮންނާނީއެވެ. ޙަޔާ އައީ ، އެއްވެސް ހެދުމެއްވެސް ނުލައެވެ. އެހެންކަމުން މީރަބްގެ ހެދުމެއް ލައިގެން ހުއްޓާ ، މުރުތަސިމަށް ފަހަތުން އައިސް މީރަބްއޭ ކިޔާފައ ގޮވައިވެސް ލެވިއްޖެއެވެ. އެނދުގައި ، މުރުތަސިމްގާތު އޮއްވައި މީރަބްކަމަށް ހީކޮށް މުރުތަސިމަށް ޙަޔާގެ ގައިގާ ބައްދާވެސް ލެވިދާނެއެވެ. މިކަހަލަ ފުރުޞަތެއް ލިބޭނީ ހާލަކުން ފަހަރަކުއެވެ.
ޙަޔާ ، މަޑުމަޑުންގޮސް ، މުރުތަސިމް ނިދިތޯ ބަލައިލިއިރު ، މުރުތަސިމް ހުރީ ދެކޮޅަށްދެކޮޅަށް ހިނގާލަހިނގާލައެވެ. ޙަޔާ ރާވައިގެން އައި ރޭވުން ކުއްލިޔަކަށް ބަދަލު ކޮށްލިއެވެ. ޕްލޭން ބީ އަށެވެ. ލޮލަށް އެއްޗެއް ވެއްޓިގެން ކަމަށް ހަދާފައި ، ތަދުވެގެން ރޯގޮތަށް ، މުރުތަސިމަށް ގޮވަމުން ، ޙަޔާ ވަނެވެ. މުރުތަސިމްވެސް އައިސް ، ޙަޔާގެ ލޯ ބަލައިލަން ބޭނުންވިއެވެ. މުރުތަސިމް ހުރީ ޙަޔާގެ މޫނުގައި ހިފަހައްޓާލައިގެން ، ޙަޔާގެ ލޮލަށް ބަލާށެވެ. ޙަޔާހުރީ މުރުތަސިމްގެ އަތުގައި ހިފަހައްޓައިގެން ، މުރުތަސިމްގެ ލޮލަށް ބަލަހައްޓައިގެން ، ލޯބީގެ ޖަޒުބާތީ ސިގްނަލްތައް ފޮނުވަފޮނުވައެވެ.
ދޮރުހުޅުވައިލާފައި ، އެތަނަށް ކުއްލިޔަކަށް އެވަނީ މީރަބެވެ. މީރަބަށް އެފެނުނު މަންޒަރުން އަނގަހުޅުވި ދެލޯ ބޮޑުވިއެވެ. ފަހަތުގައިހުރި މީރަބް ، އެމީހުންގެ ކުރިމަތީހުރި ދޮރުގެ ބިއްލޫރިގަނޑުން ، މުރުތަސިމަށް ފެނުނެވެ. ކުއްލިޔަކަށް ޙަޔާގެ ގައިން އަތްދޫކޮށްލައި މީރަބަށް ގޮވަމުން ، މީރަބާ ދިމާލަށް މުރުތަސިމް ހިނގައިގަތެވެ. މީރަބްވެސް ބާރު ހިނގުމުގައި އެތަނުން ނުކުންނަން ހިނގައިގަތެވެ. މީރަބްގެ ފަހަތުން މުރުތަސިމް ދުއްވައިގަތެވެ. އަދި ، މީރަބަށް އެފެނުނު މަންޒަރަކީ ، މީރަބް އެހީކުރާގޮތަށް އޮތް ކަމެއްނޫންކަމަށް ބުނަމުން ގެންދިޔައެވެ. މުރުތަސިމްގެ އަތް އޭނާގެ ގައިން ފޮޅުވައިލާ ، އެންމެ އިރުކޮޅަކުވެސް ، މުރުތަސިމް ފެންނަ ހިސާބުގައި ހުންނަން ބޭނުންނުވާކަމަށް މީރަބް ބުނަމުން ގެންދިޔައެވެ. އަދި ، ޙަޤީޤަތް ސާފުކޮށްދިނުމަށް ޙުއްޖަތް ދެއްކުމުގެ ބޭނުމެއް ނެތްކަމަށާއި ، އޭނާއަށް ފެނުނު މަންޒަރު ފުދޭކަމަށް މީރަބް ބުންޏެވެ.
އޭނާއަށް އިތުބާރުކުރުމަށް މުރުތަސިމް އާދޭސްކުރަމުން ގެންދިޔައެވެ. އެހެންނަމަވެސް ، މީރަބަށް މުރުތަސިމާ ދިމާއަށް އެންމެ ފިޔަވަޅެއްވެސް ކުރިޔަށް އެޅޭނީ ކިހިނެއްތޯ މީރަބް ސުއާލު ކުރިއެވެ. ކޮންމެ ފަހަރަކުވެސް ، މުރުތަސިމްގެ ފަރާތުން މީރަބަށް އެލިބެނީ ތަކްލީފެވެ. މީރަބްގެ ހިތުގައި މުރުތަސިމްގެ މައްޗަށް އޮންނަންޖެހޭ އިތުބާރަށް ހުރަސްއެޅޭފަދަ ޙާލަތްތަކެވެ.
މީރަބް އެތަނަށް އެއައީ ، މުރުތަސިމަކީ އޭނާގެ ޙައްޤެއްކަމަށް ބަލައިގެން މުރުތަސިމް ގާތަށެވެ. އެކަމަކު ، މުރުތަސިމަކީ އެހެންމީހެއްގެ ޙައްޤެއްކަން އެރޭވެސް ، މުރުތަސިމް ސާބިތުކޮށްދީފިއެވެ.
މީރަބަށް ހުރީ ރޮވިފައެވެ. މުރުތަސިމް އޭނާގެގާތަށް ޖެހިލުމާއެކީ ، އޭނާގެ ގައިގާ އަތްނުލުމަށް ، މުރުތަސިމަށް އެންގިއެވެ. އެވަގުތު ، މީރަބާ ވަރަށްގާތް ނޯކަރަކު އައިސް ، ނާއިލާގެ ފިރިމީހާ މަރުވެއްޖެކަމުގައި މީރަބްގާތު ބުންޏެވެ. އެޚަބަރު ލިބުމާއެކީ މީރަބްގެ ހިތުގައި ނާއިލާއާމެދު ހަމްދަރްދީ އުފެދުނެވެ. ނާއިލާގެ ފިރިމީހާ މަރުވީކީނޫނެވެ. އޭނާ މަރައިލީ ޒުބޭރެވެ. އެކަން ހިނގިގޮތް މުރުތަސިމް ކިޔައިދިނުމާއެކީ ، ނާއިލާއާ ބައްދަލުކުރުމަށް މީރަބް ގޭތެރެޔަށް ވަނެވެ.
މީރަބް ދިޔަތަނުން ، ޙަޔާވެސް މުރުތަސިމްގާތަށް އައެވެ. މީރަބަށް އެފެނުނު މަންޒަރަކީ ، އޭނާ ރާވައިގެން ކުރިކަމެއްނޫންކަމަށް ޙަޔާ ބުނުމާއެކީ ، މީރަބްގާތަށްގޮސް ވީގޮތް ކިޔައިދިނުމަށް ބުނެ ، ޙަޔާއާ ދިމާލަށް މުރުތަސިމް ހަޅޭއްލަވައިގަތެވެ. އަމިއްލަޔަށް ކެހިކަނޑުލުގެ ހިތި ، ޙަޔާ އަމިއްލަޔަށް ފިލުވަން ޖެހުމާއެކީ ، ރޮމުންރޮމުން ޙަޔާ ގޭތެރެޔަށް ވަނެވެ. މުރުތަސިމްވެސް މީރަބް ހޯދުމަށް ގޭތެރެޔަށް ވަނެވެ. މީރަބާއި މުރުތަސިމާ ދެމީހުން ، ނާއިލާ އޮތް ކޮޓަރީގެ ދޮރުމަތީ ތިއްބާ ، ޙަޔާގޮސް ، މީރަބަށް ފެނުނު މަންޒަރު ހިނގިގޮތް ސާފުކޮށްދިނެވެ. އެވަރުންވެސް ޙަޔާއަށް ހެދުނީ ހުސްދޮގެވެ. ޙަޔާ ބުނިގޮތުގައި ، އެތަނުން ކަރަންޓްގޮސް އަނދިރިވީ ވަގުތު ، އޭނާގެ ލޮލަށް އެއްޗެއް ވެއްޓުނީއެވެ. މީރަބަށް އެތަނަށް އާދެވުނީ ، އެއެތިކޮޅު ލޮލުން ނަގައިދޭން މުރުތަސިމް ހުއްޓައެވެ. އެއީ މީރަބް އެހީކުރާގޮތަށް ދިމާވިކަމެއް ނޫނެވެ. ޙަޔާގެ ވާހަކަ ޤަބޫލުކުރާކަށް މީރަބް ބޭނުމެއްނޫނެވެ. ޙަޔާއަކީ ، ދުވަހަކުވެސް އޭނާއަށް ތެދެއް ހަދާނެ މީހެއްނޫންކަން މީރަބަށް އެނގެއެވެ. އެކަމަކު ، އެކަމާބެހޭގޮތުން ، މީރަބް އިތުރަކަށް އެއްވެސް އެއްޗެއް ނުބުނެއެވެ. ( ނުނިމޭ )
ހައްތާވެސް ވިހަތީރު މުރުތަސިމުގެ ދެމައިން ޙަޔާގެކަންތައް ހުއްޓުވަން
ނޫޅޭތީވާހާގޮތް
ޙަޔާގެ ކަންތައް ތަންކޮޅެއްް ބޮޑުވޭ އެބަ. މީރަބަށް ޙަޔާގެ ކިބައިން ސަލާމަތްވާނެހެންނެއް ހިއެއްނުވޭ. އެވަރަށް އެހުންނަނީ ވިއްދާފަ.
V.reethi shukuran