( 7 މާރިޗު 2025 ގައި ޝާއިޢުކުރި ބަޔާގުޅޭ )
ކުރާޖެއްސުމެއް އޭނާއަށް ކޮށް ، ބުނަންބޭނުންވާ އެއްޗެއް އޭނާއާ ދިމާލަށް ބުނުމަށް ، ޙައިދަރު ބުންޏެވެ. އެއްވެސް ޙާލެއްގައި މަންމަގެ އިޙްތިރާމް ކުޑަކުރެވޭނެ އެއްވެސްކަމެއް ، ދިލްނަޝީންގެ ފަރާތުން ވާކަށް ޙައިދަރެއް ނޭދެއެވެ.
ޙައިދަރަށް އޭނާ އެއްވެސް ޖެއްސުމެއް ނުކުރާކަމަށް ދިލްނަޝީން ބުންޏެވެ. އެކަމަކު އޭނާގެ މަންމަޔަށް ޖެއްސުންކުރިކަމަށް ޙައިދަރު ބުނުމާއެކީ ، މަންމަޔަށްވެސް އެއްވެސް ޖެއްސުމެއް ނުކުރާކަމަށް ދިލްނަޝީން ބުންޏެވެ. ދިލްނަޝީންގެ ވާހަކަ ޤަބޫލުކުރާކަށް ޙައިދަރު ބޭނުމެއްނޫނެވެ. މަންމަޔާ ދިމާލަށް ހެނދުނު ދިލްނަޝީން އެބުނި ވާހަކައެއް ބުނީ މަލާމާތްކޮށްފައި ، ޙައިދަރުގެ ކުރިމަތީގައެވެ. ނޯކަރުވެސް އެތާ ހުއްޓައެވެ. އޭގެފަހުން ، މަންމަކުރި އެއްވެސް ސުއާލަކަށް ، ދލްނަޝީން ޖަވާބެއް ނުދެއެވެ. އެއީ އޭނާގެ މުސްކުޅި މަންމަޔަށް ، ދިލްނަޝީންގެ ފަރާތުން ލިބުނު ތަކުލީފެއްކަން ޙައިދަރު ހާމަކުރިއެވެ.
" އަނގަހިމޭނުންލައިގެން ހުރުން އެއީ ޖެއްސުންކުރުމެއްކަމަށް ޙައިދަރަށް ފެންނަންޏާ އެކަމުގައި އަހަރެން ކުރާނެކަމެއް ނެތެވެ. އަހަރެންނަކަށް އެކަމުގައި ތަފާތެއް ނުފެނެއެވެ. " ދިލްނަޝީން ބުންޏެވެ.
ދިލްނަޝީން ފުންމައިގެން އެނދުން ތެދުވެ އެތަނުން ދުރަށްދާން ހިނގައިގަތުމާއެކީ ، އެކަމުގައި ދިލްނަޝީނަށް ތަފާތު ފެންނަން ޖެހޭނެކަމަށް ޙައިދަރު ބުންޏެވެ. މަންމަޔަށް ކުރެވޭ ޖެއްސުމެއްފިޔަވައި އެހެން ހުރިހާކަމެއް އޭނާ ތަޙައްމަލު ކޮށްފާނެއެވެ. އެކަމަކު ، އެއްވެސްމީހެއްގެ ފަރާތުން މަންމަޔަށް ލިބޭ ތަކުލީފެއް ، އޭނާ ބަރުދާސްތެއް ނުކުރާނެއެވެ.
" އަހަރެންވެސް ، މިއަދުންފެށިގެން އަހަރެންގެ ޒާތަށް އަމާޒުކުރެވޭ ކަންކަން ބަލައެއް ނުގަންނާނަމެވެ. " ދިލްނަޝީން ބުންޏެވެ.
ދިލްނަޝީނުގެ ޒާތަށް އަމާޒުކުރެވޭ ކަންކަމަށް އޭނާ ޒިންމާވާންޖެހޭނެކަމަށް ނުފެންނަކަމުގައި ޙައިދަރު ބުންޏެވެ.
" ދެން ކާކު ހެއްޔެވެ ؟ ޙައިދަރާއި ޙައިދަރުގެ މީހުން ފިޔަވައި އެހެން ކޮންބައެއް ހެއްޔެވެ ؟ " ޙައިދަރާ ދިމާލަށް ދިލްނަޝީން ހަޅޭއްލަވައިގަތެވެ.
ޒާތާއި އުޅުމާ ގުޅުވައިގެން ، އެއީ ދިލްނަޝީނަށް އެއްޗެތިކިޔޭ ފުރަތަމަ ފަހަރުކަމަށް ނުބަލާށޭ ޙައިދަރު ބުންޏެވެ. ޙައިދަރަށް އެކަން ޔަޤީންވާކަމުގައި ބުންޏެވެ. ދިލްނަޝީން ހިންގައިގެން އެއުޅޭ ގުޅުމުގެ ޚަބަރު ، ފިރިހެންކުއްޖާގެ މައިންބަފައިންނާ ހަމަޔަށް އޮންނާނީ ގޮއްސައެވެ. ދިލްނަޝީނަކީ ހުދުކާފޫރުކޮޅަކަށް ހަދައިގެންނެއް އެމީހުންނެއް ނުތިބޭނެއެވެ. އެކަމުގައި ، އެއްފަހަރަށްވުރެ ގިނަފަހަރަށް ، އެމީހުންގެ ބަދުބަސްތަކާ ޒާތަށް ދެވޭ ޙަމަލާތަކާ ދިލްނަޝީން އޮންނާނީ ކުރިމަތިލާފައެވެ. އެފިރިހެންކުއްޖާ ، ބޮލުރޮދިކެނޑިގެން ތިގެޔަށްގޮސް ، ދިލްނަޝީންގެ މަންމަމެންނަށްވެސް އޮންނާނީ ކުޅިވަރު ދައްކައިލާފައެވެ.
" އެއްޗެތި ކިޔުމުގައި ޙައިދަރަކީ އަރާހުރިމީހެއްކަން މިއެނގުނީ މިއަދުއެވެ. މިހާރު ތިޔަފެންނަނީ ޙައިދަރުގެ އަސްލު ސިފައެވެ. އިންސާނާގެ އަސްލު ސިފަ ފެންނާނީ މީހަކާމެދު ހިތްހަމަ ނުޖެހުނީމައެވެ. ރުޅިއައިމައެވެ. މެހެމަލްގެ އުނިކަމެއް ޙައިދަރަށް ނުފެނިގެން ތިއުޅެނީ ، އަދި މެހެމަލްދެކެ ރުޅިއަންނަން ނޭނގިގެން ތިއުޅެނީ ، މެހެމަލްގެ ލޯބި ، ޙައިދަރުގެ ރުޅިޔަށްވުރެ ގަދަވެފައި އޮތީމައެވެ. މެހެމަލްގެ ނަސީބު ގަދައީތާއެވެ. ޙައިދަރު ދެކެ ލޯބިވެފައި ، ކެހިދީފައި ، ޙައިދަރަށްވުރެ މުއްސަނދި އެހެން ފިރިހެނަކު ފެނުނީމާ ގޮސް އެމީހާއާ އިނދެ ، ދަރިޔަކު ވިހައިގެން ގޮވައިގެން އައިމަވެސް ، މެހެމަލް ވަރެއް ނެތެވެ. އަހަރެންނެއް ޙައިދަރާ އިންފަހަކުން ، ޙައިދަރުދެކެ ލޯބިވިފަހަކުން ، އެހެންމީހަކާ ހިތައެއް ނުވަމެވެ. " ދިލްނަޝީން ބުންޏެވެ.
ދިލްނަޝީނާ ދޭތެރޭ ގޯސްކޮށްކަމެއްކުރަން މަޖުބޫރު ނުކުރަން ދިލްނަޝީންގާތު އެބުނަނީ އެހެންވެގެންކަމުގައި ޙައިދަރު ބުންޏެވެ. އޭނާގެ އަސްލު ސިފައިގާ ދިލްނަޝީނާ ކުރިމަތިލާން ޖެހިދާނެތީއެވެ. އެވާހަކަތައް އެހިސާބުން ނިންމާލައި ، އަލުން އާ ފެށުމަކުން ދިރިއުޅުން ފެށުމަށް ދިލްނަޝީނަށް ޙައިދަރު ލަފާދިނެވެ.
" އެ ހުރިހާ ގަނޑެއް ގަނެފައިވެސް ، އަހަރެންނާ ދިމާލަށް ހެޔޮހިތަކައިގެން ދިލްނަޝީން އައުމުން ، އަހަރެންވެސް ހިތްހެޔޮކޮށްފައި ދިލްނަޝީން ތިހުރީ ބަލައިގެންފައެވެ. އަހަރެންގެ މަޤާމުގައި އެހެންފިރިހެނަކު ހުރިނަމަ ، ދިލްނަޝީނާ ދިމާލަށް ބަލައިވެސް ނުލާނެއެވެ. އޮޅުމެއްގެ ތެރެއިން ކައިވެނިކުރެވުނަސް ، ދިލްނަޝީންގެ ލޯބިވެރިޔާގެ ބަދަލުގައި ، ދިލްނަޝީންގެ ދުވަސް ދުއްވައިލާނެއެވެ. " ޙައިދަރު ބުންޏެވެ.
ދިލްނަޝީން އަތްތިލަބަޑި ޖަހައިލިއެވެ. ރަނގަޅު ނަތީޖާޔަކުން ޙައިދަރު ފާސްވެއްޖެކަމަށް ، ދިލްނަޝީން ބުންޏެވެ. ދިލްނަޝީނަށްވެސް ރަނގަޅު މާރކްސްއެއް ދީގެން ފާސްކޮށްދީފިންކަމުގައި ޙައިދަރު ބުންޏެވެ. ދެމީހުން އެކުގައި ފާސްވެގެން ދެން އޮތް ކްލާހަށް ބަދަލުވުމަކީ ، ރަނގަޅަށްވީކަމެއްކަމަށް ޙައިދަރު ބުންޏެވެ.
" އެހާވަރަށް އަބުރުކަތިލައި ، އަނިޔާދީ ހެދުމަށްފަހުގައިވެސް ، ދެމީހުންނަށް އެކުގައި ކުރިޔަށް ދެވިދާނެކަމަށް ޙައިދަރަށް ޤަބޫލުކުރެވޭ ހެއްޔެވެ ؟ އިޙްތިރާމާއި ޤަދަރަކީ ، ހަމައެކަނި ޙައިދަރުގެ މަންމަޔަށް އޮންނަ އެއްޗެއްނޫނެވެ. ކޮންމެ އަންހެނެއްގެވެސް އަބުރަކާއި ޢިއްޒަތެއް އޮންނާނެއެވެ. ތިޔައިން އެކަކީވެސް ، ފެންނަ ފެނުމަށް ރަނގަޅޭ ހީވިޔަސް ، އެހާރަނގަޅުބައެއްނޫންކަން މިހާރު އެއޮތީ ސާބިތު ވެފައެވެ. " ދިލްނަޝީން ބުންޏެވެ.
ހަމަ އެގޮތަށް ، ދިލްނަޝީންމެންނަކީވެސް ، މާ ރަނގަޅުބަޔެކޭ ހީވިޔަސް ، ޙަޤީޤަތަކީ އެއީނޫންކަމަށް ޙައިދަރު ބުންޏެވެ.
" އަހަރެންވެސް ، އަހަރެންގެ ޢާއިލާގެ އެއްވެސްމީހަކަށް އަމާޒުކޮށް ދެވޭ ބަހުގެ ޙަމަލާއަކަށް ކެތެއް ނުކުރާނަމެވެ. " ދިލްނަޝީން ހަޅޭއްލަވައިގަތެވެ.
އަވަސްފިޔަވަޅުތަކެއް އަޅަމުން ، ދިލްނަޝީން ކޮޓަރިން ނުކުތެވެ. ކޮޓަރިން ނުކުތުމުގެ ކުރިން ޙައިދަރާ ދިމާލަށް ބަލައިލިއެވެ. އަދި ނުކުމެގެންދަމުން ، އަތުގައިހުރިބާރެއްލާފައި ދޮރު ޖެހިއެވެ. ދިލްނަޝީން ބޭރަށް ނުކުމެ ، ގޯތިތެރޭގެ ބަގީޗާތެރޭގައިހުރި ގޮނޑިއެއްގައި ޖައްސައިލިއެވެ. މީހަކަށް ނުފެނި އެތާ އިރުކޮޅަކު އިނދެވޭހާ ބޮޑު ބަގީޗާއެކެވެ. އެހެންމީހަކު އެތާ އުޅޭކަމުގެ އިޙްސާސް ދިލްނަޝީންގެ ހިތަށް ލިބި ކޮންމެވެސް ވަރެއްގެ ބިރުވެރިކަމެއް ވެރިވިއެވެ. އަނެއްކާ އެއީ ، ޙަމްޒާ ބާވައެވެ ؟ އެއީ ، ކުޑަކުޑަ ދުލެއް ދޭއިރަށް ދެމިގަންނާނެ އިންސާނެކެވެ. ހިތަށް ކެކުޅުންތަކެއް ލިބުނު ވަގުތު ، ޖަޒުބާތުގައި ޖެހި ، ފޯނުކޮށްލެވި އަދި ދެމީހުން ވާހަކަ ދައްކައިހެދުމަށް އެއްބަސްވެވުނު ތަނުން ، ދިލްނަޝީންގާތަށް ނައިސް ޙަމްޒާއަކަށް ނުހުރެވޭނެއެވެ. އެއީ ، އަބަދުވެސް ކެތްމަދުވެފައި ހުންނަ ފިރިހެނެކެވެ. އިރުކޮޅަކުން ، ފަހަތުން މީހަކު ކަރުކެހިލިއަޑު އިވިގެން ބަލައިލިއިރު ، އެއީ މެހެމަލް އެވެ. މިމުޞީބާތުން ސަލާމަތްވާނީ ކޮންދުވަހަކުން ބާވައެވެ ؟ ދިލްނަޝީންގެ ހިތަށް އެރިއެވެ.
" މީހެއްގެ އަބުރާއި ޢިއްޒަތަށް އަރައިގަނެވޭހިނދު ، އެއީ ހާދަބޮޑު ތަކުލީފެއް ލިބޭނެކަމެކެވެ. ދޯއެވެ ! އަހަރެންނަށް އެކަން އެނގެއެވެ. " މެހެމަލް ބުންޏެވެ.
މެހެމަލްގެ ވާހަކައިން ދިލްނަޝީނަކަށް މާބޮޑު އަސަރެއް ނުކުރެއެވެ. މެހެމަލްގެ ފަރާތުން އަބަދުވެސް ލިބޭނީ ތަކުލީފެވެ. ހިތަށް އުނދަގޫވެ ހިތްހަލާކުވާކަހަލަ ބަހެއްނޫނީ ، އެ ވިހަދުލުން ބޭރެއް ނުވާނެއެވެ. މީހަކު ނުކުރާކަމެއްގައި އެއްވެސް ސަބަބެއްނެތި އިލްޒާމް އެޅުވި ، އަބުރު ދުއްވައިލެވުނީމަ ، ހިތުގައި އަޅާ ވޭނާއި ލިބޭ ތަކުލީފު ވަކިންބޮޑުކަމަށް ދިލްނަޝީން ބުންޏެވެ.
" ދިލްނަޝީނަށްޓަކައި ، އަހަރެންނާ ދިމާލަށް އެއްޗެތިކީ މީހަކަށްޓަކައި ، އެންމެ ދެރަވެގެން އަމިއްލަ ނަފްސަށް ތެދުވެރިވެ ބަލާށެވެ ! " މެހެމަލް ބުންޏެވެ.
ދިލްނަޝީން ހެދީ ކޮންދޮގެއްތޯ ސުއާލު ކުރިއެވެ.
" ހަމަ ނޭނގެނީ ހެއްޔެވެ ؟ ތީ ކޮންކަހަލަ އަންހެނެއް ހެއްޔެވެ ؟ އިންސާނަކު އަނެއް އިންސާނަކަށް ޖާނުނުދޭވަރަށް ލޯބިވާ އިންސާނަކު އެބަހުރިކަން ، ދިލްނަޝީންގެ ހިތުގެ އަޑިން ޤަބޫލުކޮށްބަލާށެވެ ! އެމީހަކަށްޓަކައި ، ދިލްނަޝީންގެ ހިތުގައި އެއްވެސް ކަހަލަ އިޙްސާސެއް ނެތީ ހެއްޔެވެ ؟ މައްސަލައެއް ނެތެވެ. އަހަރެމެން ދެމީހުންގެ ގުޅުމަކީ އެކަހަލަ އެއްޗެކެވެ. އަހަރެންގާތު ތެދަށް ، ދިލްނަޝީން ވާހަކައެއް ބުނަންވީ ކީއްކުރަން ހެއްޔެވެ ؟ އަހަރެންގެ ގޮތްދޫކޮށް މިއަދު ތައުބާ ވެއްޖައީމެވެ. އިންސާނެއްގެ ލޯބި ޙާޞިލްކުރުމަށްޓަކައި ، އަމިއްލަ ނަފްސާއި ޢިއްޒަތާ ޤަދަރު ޤުރުބާން ކުރެވޭނީ ކިހާވަރަކަށްކަން އެނގިއްޖެއެވެ. ޙައިދަރު ބޭނުމިއްޔާ ދިލްނަޝީނާއެކީ ދިރިއުޅުނަސް މައްސަލައެއް ނެތެވެ. " މެހެމަލްގެ ވާހަކަ ނންމައިލިއެވެ.
މެހެމަލްގެ ވާހަކަ އެ ނިމުނީތޯ ދިލްނަޝީން ސުއާލު ކުރިއެވެ. އެހާއަވަހަށް މެހެމަލް ، ބަލި ޤަބޫލުކުރީ ހެއްޔެވެ ؟ ތީކީ އެކަހަލަ އަންހެނެއްނޫނެވެ. ވިހަގަދަ ހަރުފަޔަކީ ، މީހަކު ގޯނާއެއް ނުކުރިޔަސް ، ގޯނާއެއް ކޮށްފާނެހެން ހީވާއިރަށް ވިހަލާ ޖަނަވާރެކެވެ. މެހެމަލްއަކީ ، އެއަށްވުރެވެސް ނުރައްކާތެރި އެއްޗެކެވެ. އެ ނިންމުމުގެ ފަހަތުގައިވެސް މަކަރުވެރި ނުބައި ރޭވުމެއް ނެތިނުދާނެކަމަށް ދިލްނަޝީން ބުންޏެވެ.
މެހެމަލްއަށް ހީވީ ، ޙައިދަރާއި ދިލްނަޝީނަށް ދުވަހަކުވެސް އެކުގައި ، އެއްވިސްނުމެއްގައި ނޫޅެވޭނެ ކަމަށެވެ. ދުވަހަކުވެސް އުފަލުގައި ނޫޅެވޭނެކަމަށެވެ. މެހެމަލްއަށްވެސް އުފަލެއް ނުލިބޭނެ ކަމަށެވެ.
" އެންމެފަހުން އަހަރެން މިނިންމީ ، މި އަރަތް ފުރިހަމަ ކުރުމަށެވެ. އަދި ، ހުރިހާމީހުންނަށްވެސް ހަމަޖެހުމާއި އުފާލިބޭނެ ގޮތަކަށް ވިސްނުން ބަދަލު ކުރުމަށް އަހަރެން ނިންމައިފީމެވެ. ( ނުނިމޭ )
ވަރަށް ރީތި ޝުކުރަން
ހާދަ ރީތިވެފައި އަސަރުގަދައޭ މިހާރު. ދެންވާނީ ކިހިނެއްކަން ނޭނގިފަ ތިބެން މިޖެހެނީ. ދުވާލަކު އެއްފަހަރު ގެނެސްދެއްވާތީ ވަރަށް ބޮޑަށް ޝުކުރިއްޔާ