ޝްޕެނިޝްލީގުގައި ރޭ ކުޅުނު މެޗުން ޖިރޯނާ އަތުން 1-6 އިން މޮޅުވެ ބާސެލޯނާ އިން ތާވަލްގެ އެއްވަނައިގައި ލީޑް ފުޅާކުރިއިރު ރެއާލް މެޑްރިޑް ވަނީ 0-4 އިން އަލަވޭސް ބަލިކޮށް ލީގުގައި ވިދިވިދިގެން ފަސްވަނަ މޮޅު ހޯދައި ދެވަނައިގައި އޮތް އެތުލެޓިކޯ މެޑްރިޑާއި ދެމެދު އޮތް ފަރަގު ހަތަރު ޕޮއިންޓަށް ކުޑަކޮށްފައެވެ.
ތާވަލްގެ އެންމެ ކުރީގައި ބާސެލޯނާ 25 މެޗުން 65 ޕޮއިންޓާއިއެކު އޮތްއިރު ދެ ވަނައިގައި އޮތް އެތުލެޓިކޯ މެޑްރިޑަށް 24 މެޗުން 55 ޕޮއިންޓް ލިބިފައިވެއެވެ. ރެއާލް ތިން ވަނައިގައި އޮތީ 25 މެޗުން 51 ޕޮއިންޓް ހޯދައިގެންނެވެ.
ބާސެލޯނާގެ ކޭމްޕް ނޫ ގައި ކުޅުނު މިމެޗުގައި ޖިރޯނާ ގެ ކްރިސްޓިއަން ޕޯރްތޫ ވަނީ ތިންވަނަ މިނެޓުގައި އެޓީމަށް ލީޑް ނަގާދީފައެވެ. ބާސެލޯނާ އަށް އެއްވަރުކޮށްދިނީ އޭގެ ދެމިނެޓުފަހުން ލުއިސް ސުއަރޭޒް އެވެ.
ފުރަތަމަހާފު ނިމުމުގެ ކުރީން ބާސެލޯނާ އިން ވަނި އިތުރު ތިން ލަނޑު ޖަހާފައެވެ. ލިއޮނަލް މެސީ ވަނީ 30 ވަނަ މިނެޓުގައި ބާސެލޯނާ އަށް ފުރަތަމަ ފަހަރަށް ލީޑް ނަގާދީފައެވެ. އޭގެ ހަ މިނެޓުފަހުން މެސީ ވަނީ ލިބުނު ހިލޭ ޖެހުމަކުން ލީޑް ފުޅާކޮށްދީފައެވެ. މިއީ ލީގުގައި އޭނާ ޖެހި 22 ވަނަ ލަނޑެވެ.
ފުރަތަމަހާފު ނިމެން މިނެޓަކަށްވެފައިވަނިކޮށް ސުއަރޭޒް ވަނީ ބާސެލޯނާގެ ހަތަރުވަނަ ލަނޑު ކާމިޔާބުކޮށްދީފައެވެ. ބާސެލޯނާގެ ފަސްވަނަ ލަނޑު 66 ވަނަ މިނެޓުގައި ކުޓީނިއޯ ޖަހައިދިންއިރު ސުއަރޭޒް ވަނީ 76 ވަނަ މިނެޓުގައި ބާސެލޯނާގެ ފަހު ލަނޑު ކާމިޔާބުކޮށްދީ ހެޓްރިކް ފުރިހަމަ ކޮށްފައެވެ.
"އަހަރެމެން ހީކުރީ ޑިފެންސިވް ވޯލް މަތިން އޭނާ ހިލޭޖެހުން ފޮނުވާލާނެކަމަށް އެހެންނަމަވެސް މެސީ ވަނީ ތިރިން އެ ބޯޅަ ފޮނުވާލައި ގޯލްގެ ތެރެއަށް ވައްދާލާފަ. އޭނާ ހިލޭޖެހުން ފޮނުވާލާ ގޮތުން އަހަރެމެންނަށް ހީވަނީ އެއީ ވަރަށް ފަސޭހަކަމެއްހެން. އަސްލު އެއީ އެހައި ފަސޭހައިން ކުރެވޭނެކަމެއްނޫން." މެސީ ފޮނުވާލި ހިލޭޖެހުމާއި ބެހޭގޮތުން ވަލްވާޑޭ ބުންޏެވެ.
ރެއާލްގެ ސަންޓިއާގޯ ބެރުނަބޮއާ ގައި އަލަވޭސް އާއި ދެކޮޅަށް ކުޅުނު މެޗުގައި ރެއާލްގެ ފުރަތަމަ ލަނޑު 44 ވަނަ މިނެޓުގައި ޖަހައިދިނީ ކަރީމް ބެންޒެމާ ދިން ވަރަށް ރީތި ބޯޅައަކުން ކްރިސްޓިއާނޯ ރޮނާލްޑޯ އެވެ.
ދެވަނަހާފު ފެށިތާ މާގިނައިރުތަކެއް ނުވަނީސް ރެއާލްގެ ދެވަނަ ލަނޑު ކާމިޔާބުކޮށްދިނީ ގެރެތު ބޭލް އެވެ. މި ލަނޑު ޖަހައިދިނުމަށް އެހީތެރިވީވެސް ބެންޒެމާ އެވެ. ރެއާލްގެ ތިންވަނަ ލަނޑު 61 ވަނަ މިނެޓުގައި ރޮނާލްޑޯ ޖަހައިދިންއިރު އެޓީމުގެ ފަހު ލަނޑު މެޗުނިމެން މިނެޓަކަށް ވެފައިވަނިކޮށް ކާމިޔާބުކޮށްދިނީ ލިބުނު ޕެނަލްޓީއަކުން ބެންޒެމާ އެވެ.
ޕެނަލްޓީ ޖެހުމުގެ ޒިންމާ ޙަވާލުވެފައިވާ ކުޅުންތެރިންގެ ތަރުތީބަށްބަލާއިރު ރޮނާލްޑޯ ކުރީގައިއޮތްއިރު ހެޓްރިކް ފުރިހަމަކުރުމަށް ލިބުނު ފުރުޞަތުގެ ބޭނުންނުކޮށް ބެންޒެމާ އަށް ޕެނަލްޓީ ޖަހަންދިނުމުން މެޗަށްފަހު ވާހަކަދައްކަމުން ރެއާލްގެ ކޯޗް ޒިދާންވަނީ މިމެޗުގައި އެޓީމުގެ ކެޕްޓަންކަންކުރި ރޮނާލްޑޯ އަށް ތަޢުރީފުކޮށްފައެވެ.
"މިމެޗުގައި ބެންޒެމާ ދެއްކި ކުޅުމަށް ބަލާއިރު ގޯލެއް ޖެހުން ޚައްޤު. ރޮނާލްޑޯ މި ދައްކައިދިނީ ވަރަށް ރަނގަޅު ނަމޫނާއަށް. އަހަރެން އެކަމަށް އުފާކުރަން. މީގެއިންވެސް ދޭހަކޮށްދެނީ އެމީހުންގެ މެދުގައި އޮތް ގުޅުން ރަނގަޅުކަމާއި އަދި ޓީމުގައި އޮތް ގުޅުމުގެ ބަދަހިކަން." ޒިދާން ބުންޏެވެ.
ސްޕެނިޝްލީގުގައި ކުޅުނު އެހެން މެޗުތަކުގެ ނަތީޖާއަށްބަލާއިރު އެއިބާ އަތުން ސެލްޓާވިގޯ 0-2 އިން މޮޅުވިއިރު ލެގަނޭސް އާއި ލަސްޕަލްމަސް ބައްދަލުކުރިމެޗު ނިމުނީ ދެޓީމަށް ލަނޑެއްނުޖެހި އެއްވަރުވެގެންނެވެ.
