( 14 ޖުލައި 2024 ގައި ޝާއިޢުކުރި ބަޔާގުޅޭ )
( މަންމަޔާ ސަލާމް ކޮށްލުމަށްފަހު ، އޭނާ ޙަވާލުކުރި މަސައްކަތް ފުރިހަމަކޮށްދިނުމަށް އެދެމުން ، އެއަރޕޯޓަށް ދިއުމަށްޓަކައި ހައިދަރު ނުކުތެވެ. ކުލްސޫމުވެސް ، އޭނާގެ ދަރިފުޅު ޙަވާލުކުރި މަސައްކަތް ފުރިހަމަކުރާނެކަމަށް ވަޢުދު ވިއެވެ.)
ދިލްނަޝީންގެ ގޭތެރޭގައި މިއަދަކީ ވަރަށް ހަލަބޮލި ދުވަހެކެވެ. ކުލްސޫމް އެގެޔަށް އަންނާތީ ގޭތެރެ ސާފުކޮށް ރީތިކުރުމުގައި އެންމެން އަވަދިނެތި އުޅެމުންދާއިރު ، އަނީސާ އިނީ ކަންބޮޑުވެފައެވެ. އެއީ ، އަނީސާއަށް ވަރަށް ބޮޑު ކަމެކެވެ. އެހާ މުއްސަނދިބަޔަކު ، ކުއްލިޔަކަށް އެގެޔަށް އަންނާތީ ، އަނީސާގެ ހިތުގައި ކޮންމެވެސް ވަރެއްގެ ބިރުވެރިކަމެއް އޮތީ އުފެދިފައެވެ. އަނެއްކާ ، ދިލްނަޝީން ކޮންމެވެސް ގަނޑެއްގަތީ ނޫންކަމެއްވެސް ނޭނގެއެވެ.
ދިލްނަޝީނެއް ގެޔަކު ނޫޅެއެވެ. ދިލްނަޝީން މިއަދު ގޮސްއުޅެނީ ، އޭނާގެ ރަޙުމަތްތެރި ރިދާގެ ގޭގައެވެ. ރިދާގެ ކައިވެނި ކޮންމެވެސް މީހަކާއެކީ ކުރާގޮތަށް ނިމިފަ އޮތީމަ ، އެކަމާގުޅުންހުރި ކަންކަމުގައި ، ރިދާއަށް އެހީތެރިވުމަށް ، ދިލްނަޝީނު މިއަދު އުޅެނީ އެގެޔަށް ގޮހެވެ. ދިލްނަޝީން ދިޔައީ ، މަންމަ ގާތު އެވާހަކަ ބުނެ ، ހުއްދަ ހޯދައިގެންނެވެ. ދިލްނަޝީން މިއަދު ގެޔަށް އަންނާނީވެސް ވަރަށް ލަހުންނެވެ.
ގޭގެ ދޮރުގެ ރަނގަބީލުގެ އަޑަށް ، އަނީސާ ދިޔައީ ސިއްސައިގެންނެވެ. ވަރަށް ބިރުންހުރެ ، ގޮސް ދޮރު ހުޅުވައިލިއިރު ، ކުރިމަތީގައި ހުރީ ކުލްސޫމެވެ. ސަލާމް ކޮށްލުމަށްފަހު ، ކުލްސޫމް ގޭތެރެޔަށް ވަނުމަށް އަނީސާ އެދުނެވެ. އަނީސާ ގެޔަށް ވަދެގެން އައިސް މާގިނަ ވަގުތެއް ހޭދައެއް ނުކުރެއެވެ. ހައިދަރުގެ ކައިވެނި ، ދިލްނަޝީނަށް ހުށަހެޅިއެވެ. ކުލްސޫމް މެންނާ ބެހޭގޮތުން ، އަނީސާމެން ބަލަންޖެހޭ ހުރިހާކަމެއް ބެލުމަށްފަހު ، އަނީސާމެން ގޮތެއް ނިންމުމަށް ކުލްސޫމް އެދުނެވެ.
ހައިދަރަކީ ، އަނީސާގެ ފިރިހެންދަރިފުޅު ވަރަށް ރަނގަޅަށް ދަންނަ މީހެކެވެ. އެހެނެއްކަމަކު ، އެކަމަށް ވިސްނައިލުމަށް ކުޑަ ވަގުތުކޮޅެއް އެމީހުންނަށް ބޭނުންވާނެއެވެ. އެއީ ، ދިލްނަޝީންގެ މުސްތަޤްބަލާ ގުޅިފައި އޮތް ކަމެކެވެ. ދިލްނަޝީންގެ ރަޢުޔުވެސް އެކަމުގައި ވަރަށް މުހިންމު ވާނެއެވެ.
ހައިދަރުގެ ކައިވެނީގެ ހުށަހެޅުން ހިފައިގެން ކުލްސޫމް އެގެޔަށް އެއައީ ، ވަރަށް ބޮޑު އުއްމީދަކާ އެކީގައެވެ. ހައިދަރު މިއަދު ފުރައިގެން އެދިޔައީ އިސްލާމްއާބާދަށެވެ. ވިޔަފާރި ދަތުރެއްގައެވެ. ދެން ކުލްސޫމް އެގެޔަށް އަންނާނީ ހައިދަރު ގޮވައިގެންނެވެ. އަނީސާމެން ޚުދު ހައިދަރާ ސީދާސީދާ ވާހަކަ ދައްކައިލުން ވަރަށް މުހިންމު ވާނެއެވެ. އަނީސާމެންނަށް ބޭނުންވާ ވަގުތަކީ ކުލްސޫމަށް މައްސަލައެއް ނޫނެވެ. އެހެނަސް ، ކުލްސޫމަށް ބޭނުންވަނީ ، އެކައިވެންޏަށް ، އެމީހުން އާނއެކޭ ބުނުމެވެ. އޭނާގެ އުއްމީދު ފުރިހަމަވެގެން ދިއުމެވެ.
އަނީސާގެ ފަރާތުން ، ކުލްސޫމުމެން ބޭނުންވާފަދަ ޖަވާބެއް ލިބޭނެއެވެ. ކޮންމެހެން ހައިދަރު އެގެޔަށް ގެނެސް ސުއާލުތަކެއްކޮށް ، ހައިދަރު ލަދުގަންނުވާލާކަށް އަނީސާމެން ބޭނުމެއްނޫނެވެ.
ހައިދަރުގެ ތަޢާރުފެއްދީ ، ތަޢުރީފު ކުރާކަށް ކުލްސޫމް ބޭނުމެއް ނޫނެވެ. އެހެންނަމަވެސް ، ހައިދަރަކީ ، ވަރަށް ކާމިޔާބު ވިޔަފާރި ވެރިޔެކެވެ. ބައްޕަ ނިޔާވުމުން ، ވިޔަފާރީގެ ހުރިހާކަމެއް ބަލަހައްޓަމުން ، އެ ވިޔަފާރި ކުރިއަރުވާފައިވަނީ ، ތަޢުރީފް ޙައްޤު ދަރަޖަޔަކަށެވެ. ހައިދަރުގެ ކޮއްކޮއާއި މަންމަޔަށްވެސް އެހާ އަޅައިލައެވެ. އެއްވެސް ޒިންމާއަކަށް ، މަސްއޫލިއްޔަތަކަށް ފަރުވާކުޑަކޮށެއް ނުލައެވެ. ދިލްނަޝީންގެ ދިރިއުޅުންވެސް ، ހައިދަރުގެ ލޯތްބާއި އަޅައިލުމުން ، ބާއްޖަވެރިވެގެންދާނެކަން ، ކުލްސޫމް ކަށަވަރު ކޮށްދިނެވެ. ދިލްނަޝީންގެ ކައިވެނީގެ އެ ހުށަހެޅުމަށް ވަގުތުން އާނއެކޭބުނަން ، އަނީސާ ބޭނުންވިއެވެ. އެހެންނަމަވެސް ، ދިލްނަޝީން ކުރެން އަހައި ނުލައި އެވަރުގެކަމެއް ނިންމާކަށް އަނީސާއަކަށް ނުކެރުނެވެ.
ރިދާ ރީތިކޮށް ، ތައްޔާރު ކުރުމުގައި ދިލްނަޝީން އަވަދިނެތި އުޅެމުން ގެންދިޔައެވެ. ރިދާއަށް ގޮވަމުން ހައިދަރު އެކޮޓަރިޔަށް ވަނެވެ. އޭނާގެ ލޮލުގައި ފުރަތަމަވެސް އަޅައިގަތީ ދިލްނަޝީނެވެ. ދިލްނަޝީނަށްވެސް ހައިދަރު އައިސް ވަތްތަން ފެނުނެވެ. ދެމީހުންގެ ނަޒަރު ސީދާވިގޮތަށް އިރުކޮޅެއް ވަންދެން ، އެކަކު އަނެކެއްގެ ލޮލަށް ބަލަހައްޓައިގެން ތިބެވުނެވެ.
ދިލްނަޝީން އެގެޔަށް އެއައީ ރިދާ ބުނެގެންނެވެ. އެކަމަކު ، ހަމްޒާއަށްޓަކައެވެ. އެއީ ކިހިނެއްވާނެކަމެއް ހެއްޔެވެ ؟ ރިދާއާއި ހަމްޒާވެސް ، ދިލްނަޝީނާ އެ ސުއާލު ކުރިމަތި ކުރިއެވެ. ދިލްނަޝީން އެގެޔަށް އެއައީ ކާކު ބުނެގެން ހެއްޔެވެ ؟ ދިލްނަޝީން ތެދަށް ބުނުމަށް ދެމީހުންވެސް އެދުނެވެ. އެދެބެންނަށް ދޭނެ އެއް ޖަވާބެއް ދިލްނަޝީނުގެ ވިސްނުމަކަށް ނައެވެ.
" އަހަރެން މިއައީ ، ދައްތަ ، ރިދާގެ މަންމަ ދަޢުވަތުދީގެންނެވެ. " ދިލްނަޝީން ހާސްވެފައި ހުރެ ބުންޏެވެ.
ދިލްނަޝީންގެ ޖަވާބުން ، ހަމްޒާއާއި ރިދާ އެއްފަހަރާ ހީގަތެވެ. އެއީ ދިލްނަޝީނަށް ދޭން އެނގޭނެ ޖަވާބެއްކަމަކަށް އެކަކުވެސް ހިއެއް ނުކުރެއެވެ. ކޮންފަދަ މަޢުޞޫމު ކުއްޖެއް ހެއްޔެވެ ؟
މެހެމާނުން ގެޔަށް އަތުވެއްޖެކަމަށް ބުނަމުން ، ބުޝްރާ އައިސް ކޮޓަރިޔަށް ވަނެވެ. ރިދާ ފެނުމާއެކު ބުޝްރާގެ ލޮލުން ކަރުނަ ފާއްދައިލިއެވެ. ރިދާގެ ރީތިކަމާއި ފުރިހަމަކަމަކީ ، ބުޝްރާ އަބަދުވެސް ފަޚުރުވެރިވާ ކަމެކެވެ. ބުޝްރާއަށް ތަޢުރީފުކުރަމުން އައިސް ކުރިމަތީ ހުއްޓިލިއެވެ. އޭނާގެ ދަރިފުޅު މިހާރު އެހުރީ ބޮޑުވެ ، ފިރިފުރާވަރަށް އަޅާފައެވެ. ވަގުތު ދިޔަގޮތެއްވެސް ނޭނގެއެވެ. ރިދާއާ ޖެހިގެންހުރި ދިލްނަސީނަށް ، ބުޝްރާގެ ލޯ އަމާޒުވިއެވެ. ދިލްނަޝީންގެ ރީތިކަމާއި ފުރިހަމަކަން ވަކިން ކުޑައެއްނޫނެވެ. އެދެކުދިންނަކީވެސް ، އޭނާގެ އަމިއްލަ ކަހަލަ ދެކުދިންނެވެ. ދިލްނަޝީންވެސް ބޮޑުވަމުން އައީ އެގޭތެރޭގައި އުޅެއެވެ. ކުޑައިރުއްސުރެ ، ރިދާއާއެކީ އަބަދުވެސް ދިލްނަޝީން އެގޭތެރެއިން ފެންނާނެއެވެ. އެހެންކަމުން ، ދިލްނަޝީންގެ މައްޗަށް ، ބުޝްރާގެ ހިތުގައި އުފެދިފައިވަނީ މައިވަންތަ ކުލުނެވެ. އެހާ ލޯބިވެއެވެ. ރިދާއަށް ހޯދައިދޭ ކޮންމެ އެއްޗެއް ، ދިލްނަޝީނަށްވެސް ހޯދައިދެއެވެ. އެމީހުންގެ މުއްސަނދިކަމުން ، އެއީ ބުޝްރާއަށް އިތުރަށް ވިސްނައިލަންޖެހޭ ވަރުގެ ކަމެއްނޫނެވެ.
މެހެމާނުންނަށް މަރުޙަބާ ކިއުމަށްޓަކައި ޙަމްޒާ ތިރިޔަށް އައިއިރު ، ކާމޭޒުދޮށުގައި މޭޒުމަތީ ތަށިތައް އަތުރައި ، މާޓުކުރިތަކެއް ބެހެއްޓުމަށް ، ދިލްނަޝީނު އުޅެއެވެ. މަޑުމަޑުން އައިސް ، ދިލްނަޝީނާ ގާތަށް ޙަމްޒާ ޖެހިލިއެވެ.
" އަހަރެމެން ރައްޓެހިވެގެން އުޅޭކަން މިރޭ ، މަންމަގާތު ބުނަން ހެއްޔެވެ ؟ އޭރަށް އަހަރެމެން ދެބެންގެ ކައިވެނި އެއްފަހަރާ ކުރެވޭނެއެވެ. ޚަރަދުވެސް ކުޑަވާނެ އެވެ. އަހަރެމެންގެ އިންތިޒާރަށް ، ތަންކޮޅެއް އަވަހަށް ނިމުމެއްވެސް އަންނާނެއެވެ. އެކަމަކު ، މަންމަމެން އަހަރެމެންގެ ކައިވެންޏާ ނުރުހިއްޖިއްޔާ ވާނީ ކިހިނެއް ހެއްޔެވެ ؟ " ޙަމްޒާ ސުއާލު ކޮށްލިއެވެ.
އޭރަށް ، ޙަމްޒާ އެހެންމީހަކާ އިންނާނީ ނޫންހޭ ބުނެ ، ދިލްނަޝީން ދުރަށް ޖެހިލިއެވެ. ޙަމްޒާ ބޭނުންވީ ދިލްނަޝީންގެ ހިތް ތަޅުވައިލާށެވެ. އެވަރަކުން އަދި ޙަމްޒާ ކުރެއް ނުކުރިއެވެ. ހަމްޒާ އެހެންމީހަކާ އިނަސް ، ދިލްނަޝީނަށް އެންމެ ރަނގަޅުތޯ ސުއާލު ކުރިއެވެ. ދިލްނަޝީނާ ކައިވެނި ނުކުރެވިއްޖިއްޔާ ، ޙަމްޒާއަށް ޖެހޭނީ އެހެން ކުއްޖަކާ ކައިވެނި ކުރާށެވެ. އެދެމީހުންގެ ގުޅުމާ ގުޅުވައިގެން ، ޙަމްޒާ ކުރާ ސަމާސާއިން ބައެއް ފަހަރަށް ، ދިލްނަޝީންގެ ހިތްބިރުގަނެއެވެ. ޙަމްޒާއަށް އެއީ ސަމާސާއަކަށްވިޔަސް ދިލްނަޝީނަށް އެއީ ހެއްވާކަމެއްނޫނެވެ. ޙަމްޒާއަށް އެކަހަލަ ވާހަކަ އެހާ ގިނައިން އެ ދެއްކެނީ ، ޙަމްޒާގެ ހިތުގައި އެކަހަލަ ކަންކަން އޮންނާތީއެވެ. އެދެމީހުންގެ ކައިވެންޏަކީ ، ނުވެ ހިނގައިދާނެ ކަމެއްކަމުގެ ވަސްވާސް ، ދިލްނަޝީނުގެ ހިތަށް ވައްދައިދެނީ ޚުދު ޙަމްޒާއެވެ. ޙަމްޒާއަށް އެ ބުނެވެނީ ، ޙަމްޒާގެ ހިތުގައި ހުންނަ ވާހަކަ ކަމަށް ، ދިލްނަޝީނަށް ޤަބޫލު ކުރެވެއެވެ. ދިލްނަޝީނެއް އެކަހަލަ އެއްވެސް ވާހަކައެއް ނުދައްކައެވެ. އިރުއިރުކޮޅުން ސަމާސާއަކަށް ހަދާފައި ، ޙަމްޒާ އެބުނާ ކޮންމެ ވާހަކަޔަކުން ، ދިލްނަޝީންގެ ހިތް ހަލާކު ވެއެވެ. އެހުންނަނީ ، ސަމާސާއަކަށް ހަދައިގެން ، މީހުން ދައްކާކަހަލަ ވާހަކައެއް ނޫނެވެ.
" މިގޭގައި އަހަރެމެން ދެމީހުންގެ ލޯބި ދިރިއުޅުން އާބާދު ކުރާނެއެވެ. އެކަން އެއްވެސްމީހަކަށް ނުހުއްޓުވޭނެއެވެ. އެކަމަށް އަހަރެން ވަޢުދު ވަމެވެ. އަހަރެންކުރާ ސަމާސާއަކީ ، ދިލްނަޝީންގެ މޫނުމަތިން ތިފެންނަ އުފާވެރި ހިނިތުންވުމުން ، ހިތްފުރާލުމަށްޓަކައި ކުރާ ކަމެކެވެ. އެއީ އެހާ ސީރިއަސް ކޮށް ނަގަން ޖެހޭކަމެއްނޫނެވެ. މީގެ ފަހުން ސަމާސާއަކަށް ނަމަވެސް ، އެކަހަލަ އެއްވެސް ވާހަކައެއް އަހަރެން ނުދައްކާނަމެވެ. " ޙަމްޒާ ބުންޏެވެ.
ޙަމްޒާގެ ޖީބުން ގަޑިއެއްނަގައި ، ދިލްނަޝީންގެ އަތުގައި އަޅުވައިދިނެވެ. އެއީ ވަރަށް އަގުބޮޑު ގަޑިއެކެވެ. އޭނާގެ އަތުގައި އެގަޑި އަޅާފައި އޮންނަތަން މަންމަޔާއި ބޭބެޔަށް ފެނިއްޖިއްޔާ 99 ސުއާލު ކުރާނެއެވެ. އެގަޑިނާޅަން ވެގެން ދިލްނަޝީން އެތައް ވަރަކަށް މަސައްކަތް ކުރިއެވެ. މަންމަ ސުއާލެއް ކޮށްފިއްޔާ ، އެއީ ޙަމްޒާގެ މަންމަ ދިން ހަދިޔާއެކޭ ބުނުމަށް ، ދިލްނަޝީނަށް ހުތްލައިދެމުން ، ދިލްނަޝީންގެ އަތުގައި ، ޙަމްޒާ އެގަޑި އަޅުވައިދިނެވެ. ދިލްނަޝީން ، ބަނޑިބަނޑި ލައްވަމުން ދުރަށް ޖެހިލިއިރު ، ދިލްނަޝީންދެކެ އިންތިހާއަށް ލޯބިވާ ވާހަކަ ، ޙަމްޒާ ބުނަމުން ގެންދިޔައެވެ.
ރިދާއާ ކައިވެނިކުރާ ފިރިހެންކުއްޖާ ތަޢާރުފް ވުމަށް ، އެގޭގައި އޮތް ރަސްމިއްޔާތު ނިމިގެން ، ދިލްނަޝީނަށް އެރޭ ގެޔަށް އާދެވުނީ ކުޑަކޮށް ލަސްވި ފަހުންނެވެ. ދިލްނަޝީން ހީކުރީ ، އެންމެން ތިބޭނީ ނިދާފައި ކަމަށެވެ. ގެޔަށް އައިސް ވަތްއިރު ، އެންމެން ރިބީ ހޭލާ ސިޓިންގރޫމުގައެވެ. އެއީ އޭނާއަށް ލިބުނު ޙައިރާން ކަމެކެވެ. ދިލްނަޝީން އައިސް ގެޔަށް ވަދެ ، ނުނިދާ އެންމެން އެތިބީ ކީއްވެތޯ ކުރި ސުއާލަށް ޖަވާބުދިނީ ، އޭނާގެ މަންމަ އަނީސާއެވެ. އަނީސާ ހުރީ އުފަލުންގޮސް ފޮޅިފައެވެ. ސިޓިންގރޫމަށް އައިސް އެތާ އިށީނުމަށް ދިލްނަޝީނަށް އެންގުނެވެ.
ދިލްނަޝީން އައިސް އިށީނުމާއެކީ ، ބޭބެގެ ދެމަފިރިންނާއި މަންމަމެންނަށް ލިބިފައި އޮތް އުފާ އިޙްސާސް ކުރެވުނެވެ. ދިލްނަޝީން ހީކުރީ އެއިން މީހަކަށް ނަސީބުނަންބަރެއް ލައްވާލީކަމަށެވެ.
އެމީހުންނަށް ލައްވައިލާފައި އެއޮތީ ނަސީބު ނަންބަރެއް އެކަންޏެއް ނޫނެވެ. ނަސީބު ލައްވައިލާފައި އެއޮތީ އަރިހުރަހަށެވެ. ވެގެން އުޅޭގޮތެއް ، ދިލްނަޝީނަކަށް އަދިވެސް ނޭނގެއެވެ. އެހާވަރަށް އެމީހުން ގާތަށް ހިނިއައިސް ، އެވަރަށް އުފާވެފައި އެތިބީ ކީއްވެތޯ އަނެއްކާވެސް ދިލްނަޝީން ސުއާލު ކުރިއެވެ. އެގެޔަށް ސާރާ އައިވާހަކަ ބުނީ ދިލްނަޝީންގެ ފަހަރި ޢާފިޔާއެވެ. އެވާހަކަ ފެށްޓީވެސް ޢާފިޔާއެވެ. ސާރާ އައީ މަންމަ ، ކުލްސޫމުވެސް ގޮވައިގެންކަމަށް ބުނެއެވެ. ކުލްސޫމް ދައްތަ ގޮވައިގެން ސާރާ އައީ ، ދައްތަގެ ދަރިފުޅުގެ ކައިވެނީގެ ހުށަހެޅުން ހިފައިގެންނެވެ. ދިލްނަޝީނަށް އިނދެވުނުތަންވެސް ނޭނގުނެވެ. ޙައިރާންވެގެންގޮސް ދެލޯ ބޮޑުވެ، ތަންމިނަށް އަނގަ ހުޅުވުނެވެ. އެއީ އޭނާގެ ކައިވެނި ނޫންކަން ޔަޤީންކުރުމަށްޓަކައި ، ކައިވެނި ހުށަހެޅެނީ ކާކަށްތޯ ، ދިލްނަޝީން ސުއާލު ކުރިއެވެ. ކައިވެނި ހުށަހެޅެނީ އޭނާއަށް ކަމަށްބުނެ ، ދިލްނަޝީންގެ ބޭބެ ، ސަމާސާ ކޮށްލިއެވެ. އަދި ، އެމީހަކަށްވާނީ ދިލްނަޝީނަށް ނޫން އެހެންކާކަށްތޯ ސުއާލު ކުރިއެވެ. ދިލްނަޝީން ނޫނީ އެގޭގައި ހުސްހަށިބަޔަށް މީހަކު ނެތެވެ. ދިލްނަޝީނަށް ލިބުނު ޙައިރާންކަން އިތުރަށް ބޮޑުވިއެވެ. ފައިދަށުން ބިންގަނޑު ދެމިގެންދިޔަހެން ހީވިއެވެ. އަދި އެއީ ، ކީއްވެތޯ ދިލްނަޝީނަށް ސުއާލު ކުރެވުނެވެ. ކުލްސޫމް އައިސް ، އެވާހަކަ ބުނި ވަގުތު ، އަނީސާއަށްވެސް ވީ އެހެންނެވެ. އަނީސާއަކަށްވެސް ކުލްސޫމުގެ ވާހަކަ ޤަބޫލެއް ނުކުރެވުނެވެ. ދިލްނަޝީނަށްވެސް ވެފައި އެއިނީ ހަމަ އެގޮތެވެ. ކުލްސޫމް މެންނަކީ އެހާ މުއްސަނދި ބަޔެކެވެ. އަނީސާމެންނަކީ ފަޤީރު ނިކަމެތި ބަޔެކެވެ. އެދެބައިމީހުން އުޑާބިމާހާ ތަފާތެވެ.
އެވާހަކަ އިވުމުން ، އަނީސާގެ ހިތް އުފަލުން ފޮޅިގެން ދިޔައެވެ. އެކަމަކު ، އޭނާގެ ހިތުގައި އުފެދުނު އެ އިޙްސާސްތައް އޮބިއަޅައި ހިފެހެއްޓިއެވެ. އެކަން ، އަނީސާއަށް އިޙްސާސް ވިޔަކަ ނުދެއެވެ. ކުލްސޫމަކީ ހެޔޮލަފާ ހިތްހެޔޮ މީހެކެވެ. އަފްޝީގެ ކައިވެނީގެ ރަސްމިއްޔާތުގައި ، ކުލްސޫމް އިށީނދެ އިނީ ، އަނީސާއާ ޖެހިގެންނެވެ. އެއީ ، ވަރަށް ހިތްހެޔޮ މީހެކެވެ. މުއްސަނދިކަމާއި ބޮޑާކަމުގެ އެއްވެސް އަސަރެއް އަނީސާގެ ކިބަޔަކުން ނުފެނެއެވެ. އެރަސްމިއްޔާތުގައި އަނީސާއަށް އޮތީ ހައިދަރުވެސް ފެނިފައެވެ. ދިލްނަޝީނާ ބެހޭގޮތުން ، އެދުވަހު ، ޢާޞިމްއާ ކުލްސޫމް ސުއާލުވެސް ކުރިއެވެ. އެމީހުން ދެއްކި ވާހަކަ އަޑުނީވުނެއްކަމަކު ، ކުލްސޫމް ސުއާލުކުރީ ، ދިލްނަޝީނާ ބެހޭގޮތުންކަން އަނީސާއަށް އެނގުނެވެ.
އަނީސާއަށް އެއީ ، ނުލިބޭފަދަ ނަސީބެކެވެ. ﷲ ގެ ރަޙުމަތުން ، ހައިދަރުފަދަ ރަނގަޅު ކުއްޖަކު ދިލްނަޝީނަށް ލިބިއްޖެނަމަ ، ދިލްނަޝީންގެ ދިރިއުޅުން ބާއްޖަވެރިކަމުން ފުރިގެންދާނެއެވެ. ނޭނގި ހުއްޓާ އިންސާނުންނަށް ކަންކަން ހިންމަވައިދެއްވުން އެއީ ﷲ ގެ ކުޅަދުންވަންތަ ކަމެވެ.
މަންމަ އެވާހަކަ ދެއްކި ދެއްކިހެން ، ދިލްނަޝީންގެ ހިތް ތެޅެމުން ދިޔައެވެ. އަދި ، އެމީހާއާ ދިލްނަޝީނާ ދެމެދު އެދުވަހު އެހިނގި ކަންކަން އޭނާގެ ލޯމައްޗަށް ފެންނަމުން ދިޔައެވެ.
" ދަރިފުޅު ކަންބޮޑުވާނެ ކަމެއްނެތެވެ. އެއީ ، ހަރުދަނާ ރަނގަޅު އަޚުލާޤެއްގެ ވެރިއެކެވެ. އެކަން މަންމަމެން އެކިގޮތްގޮތުން ބަލައިފީމެވެ. އެއީ ޢާޞިމްވެސް އަދި ސާރާވެސް ދަންނަ ކުއްޖެކެވެ. އެއްވެސް ކަމަކާ ކަންބޮޑުވާނެކަމެއް ނެތެވެ. " އަނީސާ ބުންޏެވެ.
ދިލްނަޝީން އިނީ ބުނާނެ އެއްޗެއް ނޭނގިފައެވެ. މަންމަގާތު ޙަމްޒާގެ ވާހަކަ ބުނާކަށް ނުކެރޭނެއެވެ. ކައިވެނިން ސަލާމަތްވުމަށްޓަކައި ހަދާނެ ގޮތެއް ނުވިސްނުނެވެ. އެންމެ ފަހުން ، ދިލްނަޝީނަށް ބުނެވުނީ ، އޭނާ އިތުރަށް ކިޔަވަން ބޭނުންވާ ވާހަކައެވެ. މިހާރު އެ ފުރިހަމަ ކުރަނީ އެންމެ ފަހުގެ ސެމިސްޓަރ އެވެ. ގޭގައި ހުރެގެންވެސް އެ ސެމިސްޓަރ ފުރިހަމަ ކުރެވިދާނެއެވެ. ސެމިސްޓަރ އިން ފެއިލް ވިޔަސް އަދި ފާސްވިޔަސް ، އެކަމަކުން ވާނެ ތަފާތެއް އަނީސާއަކަށް ނުވިސްނެއެވެ. މުއްސަނދި މަހުޖަނެއްގެ އަނތްބަކަށްވުމުގެ ފަޚުރަށްވުރެ ކިޔެވުމުން ލިބޭ ޝަރަފް ވަކި މައްޗެއް ނުވާނެއެވެ.
އަނީސާ ބޭނުންވީ ، ދިލްނަޝީނު ވަގުތުން އާނއެކޭ ބުނުމަށެވެ. އެހެނަސް ، ދިލްނަޝީނު އެކަމާމެދު ވިސްނުމަށް ފުރުޞަތެއް ދިނުމަށް ޢާޞިމް އެދުނެވެ. އެ ފުރުޞަތު ލިބުނު ނަމަވެސް ، އެ ހުށަހެޅުމަށް ދިލްނަޝީނުގެ އާނބަސް ބުނުން އެއީ ޢާޞިމްގެވެސް އެދުމެކެވެ. ބޭބެއަށްޓަކައިވެސް އެކަން ކޮށްދިނުމަށް ޢާޞިމް އެދުނެވެ. އެހެނީ ، އެގޭގެ އެންމެންވެސް އެ ކައިވެންޏަށް އެތިބީ ހިތުން ރުހުމުން އާނއެކޭ ބުނުމަށް ކެތްމަދުވެފައެވެ. ދިލްނަޝީނަށް ލިބޭ އެކަހަލަ ނަޞީބުވެރި ފުރުސަތަކަށް ، އެއިން އެކަކުވެސް ހުރަސް އަޅާކަށް ބޭނުމެއް ނުވެއެވެ.
" އެކަމަކު ، އަހަރެން ކައިވެންޏެއް ކުރާކަށް އަދި ބޭނުމެއް ނުވެއެވެ. އަހަރެން ބޭނުމީ އިތުރަށް ކިޔަވާށެވެ. ކައިވެންޏަކާމެދު ، އަހަރެން އަދިއެއް ނުވިސްނަމެވެ. އަހަރެންގެ ފަރާތުން އެހުށަހެޅުމަށް ބުނަންއޮތީ ނޫނެކެވެ. ތި ކައިވެންޏަށް އަހަރެން އެއްބަހެއް ނުވާނަމެވެ. " ދިލްނަޝީން ބުންޏެވެ.
ދިލްނަޝީން ، ތެދުވެގެން އަވަސް އަވަހަށް އޭނާގެ ކޮޓަރިޔާ ދިމާއަށް ހިނގައިގަތެވެ. ބޭބެއާއި މަންމަ މަޑުކުރާށޭ ބުނަމުން އޭނާއަށް ގޮވަމުންދިޔަ އަޑެއް ދިލްނަޝީނަކަށް ނީވެއެވެ. ކޮޓަރިޔަށް ދިޔަގޮތަށްގޮސް ޙަމްޒާއަށް ފޯނުކުރިއެވެ. އަދި ، އޭނާގެ ކައިވެންޏަށް އެދިގެން މަންމަގާތަށް މީހަކު އައިވާހަކަ ބުންޏެވެ. ޙަމްޒާ އެވަގުތު އިނީ ކާރު ދުއްވާށެވެ. ސާރާ ގޮވައިގެން ތަނަކަށް ދާށެވެ. ދިލްނަޝީނުގެ ކައިވެންޏަށް އެދި މީހަކު އައިވާހަކަ ބުނުމާއެކު ، ބުރަކި ޖައްސައި މަގުމެދަށް ކާރު ހުއްޓައި ލެވުނެވެ. ދިލްނަޝީން ތިބުނަނީ ކީކޭ ހެއްޔޭ ބުނެ ، ޙަމްޒާއަށް ހަޅޭއްލަވައި ގަނެވުނެވެ. ( ނުނިމޭ )
ވަރަށް ވަރަށް ރީތި ޝުކުރަން