ޗައިނާ ވިމެންސް ޔުނިވާސިޓީ އާއި ދިވެހިރާއްޖޭގެ ހަޔަރ އެޑިއުކޭޝަން ލޭބަރ އެންޑް ސްކިލްސް ޑިވެލޮޕްމަންޓް ގުޅިގެން ދިވެހި ދަރިވަރުންނަށް އެކި ދާއިރާތަކުން ތަމްރީން ޕްރޮގްރާމްތަކާއި އެކްސްޗޭންޖް ޕްރޮގްރާމްތައް ފެށުމާއި ގުޅޭގޮތުން މަޝްވަރާ ކުރައްވައިފިއެވެ.
މި މަޝްވަރާތައް ކުރިޔަށް ގެންގޮސްފައިވަނީ މިނިސްޓަރ މަރްޔަމް މާރިޔާ، "ޗައިނާ-ސައުތް އޭޝިޔާ ޕޮލިޓިކަލް ލީޑާރސް ޕްރޮގްރާމް" ގައި ބައިވެރިވެވަޑައިނެވުމަށް ޗައިނާއަށް ކުރެއްވި ދަތުރުފުޅުގައި، ޗައިނާ ވިމެންސް ޔުނިވާސިޓީގެ ދައުވަތަކަށް، އެޔުނިވާސިޓީއަށް ކުރެއްވި ޒިޔާރަތުގެ ތެރެއިންނެވެ.
"ޗައިނާ-ސައުތް އޭޝިޔާ ޕޮލިޓިކަލް ލީޑާރސް ޕްރޮގްރާމް" އިންތިޒާމުކުރެއްވުމުގައި ހިއްސާވާ ޗައިނާ ވިމެންސް ޔުނިވަރސިޓީއަކީ އޯލް-ޗައިނާ ވިމެންސް ފެޑެރޭޝަންއާއި ގުޅިގެން ހިންގާ ޔުނިވަރސިޓީއެކެވެ. 75 އަހަރު ވެފައިވާ މި ޔުނިވަރސިޓީއަކީ ދުނިޔޭގެ އެކި ޤައުމުތަކުގެ އަންހެނުންގެ ތަޢުލީމީ ނިޒާމް ވަރުގަދަކޮށް، އަންހެނުން ބާރުވެރިކުރުވުމާއި އަންހެނުންގެ ހައްޤުތައް ހިމާޔަތްކުރުމުގެ އިތުރުން އެތަށް މަޢުލޫއަކާއި ގުޅިގެން ރިސާޗްކުރުންތައް ކުރިއަށްގެންދާ ޔުނިވާސިޓީއެކެވެ.
މިނިސްޓްރީ އޮފް ހަޔަރ އެޑިއުކޭޝަން، ލޭބަރ އެންޑް ސްކިލްސް ޑިވެލޮޕްމަންޓްގެ ދަށުން ހިންގަމުންދާ މޯލްޑިވްސް ޕޮލިޓެކްނިކް އާއި އެމްއެންއެސްޑީއޭ އިން އަންނަނީ ތަފާތު މަސައްކަތްތެރިކމުގެ ހުނަރުތަކުން ދިވެހިން ތަމްރީން ކުރުމުގެ މަސައްކަތް ކުރަމުންނެވެ. އެގޮތުން ޤައުމީ ލެވެލް ސަނަދުގެ ތަފާތު އެކި ކޯސްތައް ހިންގުމުގެ މަސައްކަތްވެސް އަންނަނީ ކުރަމުންނެވެ. އެހެންކަމުން ޗައިނާ ވިމެންސް ޔުނިވާސިޓީއާއި ގުޅިގެން ދިވެހި ރާއްޖޭގެ ދަރިވަރުންނަށް އެކި އެކި ދާއިރާތަކުން ތަމްރީންވުމުގެ ފުރުޞަތާއި، އެކްސްޗޭންޖް ޕްރޮގްރާމްތައް ފެށުމަކީ ރާއްޖޭގެ މަތީތަޢުލީމަށް ލިބިގެންދާނެ އިތުރު ކުރިއެރުމެއްކަން މިނިސްޓަރ މަރްޔަމް މާރިޔާ ފާހަގަކުރެއްވިއެވެ.
މި ބައްދަލުވުމުގައި، ޗައިނާ ވިމެންސް ޔުނިވާރސިޓީގެ ދަޢުވަތަށް ވަޑައިގަންނެވި ބޭފުންނަށް، ޔުނިވާސިޓީގެ ބައެއް ޙާއްސަ ތަންތަން ދައްކަވައި، މި ޔުނިވާސިޓީއާއި ގުޅޭ ތާރީޙް ބަޔާންކޮއްދެއްވިއެވެ.
