( 11 ޖުލައި 2024 ގައި ޝާއިޢުކުރި ބަޔާގުޅޭ )
( " އެހެންވިއްޔާ ، އަހަރެންގެ ލޯބިވާ މަންމަވެސް ބޭނުންވަނީ ، އެ ފިރިހެން މީހާއާ އަހަރެން ރައްޓެހިވާން ތާއެވެ . " ދިލްނަޝީން އޭނާގެ މަންމައާ ސަމާސާ ކޮށްލިއެވެ. އަދި އަޑުގެ ނެތްތަނަށް ހީގަތެވެ. )
ދިލްނަޝީނަށް މިއަދު އެކުރެވުނު ކަމަކާމެދު ، ޚުދު އޭނާވެސް ވިސްނައިލިއެވެ. އެ ފިރިހެނާ ގައިގާ ލައިގަތްތަނުން އޭނާއާ ހަތަރުކަޅި ހަމަކޮށްލައިގެން ހުރެވުނު ކަން އިޙްސާސް ވިއެވެ. އޭނާގެ ލޮލަށް ބަލަހައްޓައިގެން އެތައް އިރަކު ހުރެވުނެވެ. އެ ލޮލުގައިވާ ޖަޒުބާތުތައް ، ލޯބިވެރިއެއްފަދައިން އިޙްސާސް ކުރެވުނެވެ. އަދި ކޮޓަރިތެރޭ ބަންދުވެފައި ދެމީހުން ތިބިއިރު ، ދިލްނަޝީނާ ދިމާއަށް އެ ފިރިހެނާ ބަލަހައްޓައިގެން ހިނިތުންވެފައި ހުރި މަންޒަރު ހިތަށް ސިފަކޮށްލެވުނެވެ. އެއީ ހިތްސާފު ، މާތް އިންސާނެކެވެ. ފުރުޞަތުގެ އެއްވެސް ނާޖާއިޒް ފައިދާއެއް ނަގަން އޭނާގެ ވިސްނުމުގައި ނެތްކަން ، ދިލްނަޝީނަށް ކަށަވަރު ވިއެވެ. އޭގެ ބަދަލުގައި އޯގާތެރިކަމާއެކީ ، އޭނާ ބޭނުންވީ ދިލްނަޝީންގެ ކަންބޮޑުވުން ކުއިކޮށްދިނުމަށެވެ. ޚުދު އޭނާވެސް ، ދިލްނަޝީނާއެކީ އެކޮޓަރިތެރޭ ހުންނާކަށް ބޭނުމެއް ނުވިއެވެ. އޭނާގެ އަބުރާއި ޢިއްޒަތާމެދު ވިސްނި ފަދައިން ، ދިލްނަޝީންގެ ކަންބޮޑުވުމާއި އަބުރާ އަދި ޢިއްޒަތަށް އެ ފިރިހެނާ އިޙްތިރާމް ކުރިއެވެ. ޚިޔާލީ ދުނިޔެއަށް ގެއްލިފައިހުރެ ، ދިލްނަޝީން އޭނާގެ ސޫރަޔަށް ލޯގަނޑުން ބަލައިލާ ، ހިތްހަމަ ޖެހުމުގެ ލަދުރަކި ނޭވާޔަކާއެކީ ހިނިތުން ވެލިއެވެ.
ހެނދުނު އޮފީހަށް ދިއުމުގެ ކުރިން މަންމައާ އެއްމޭޒެއްމަތީ ، ހެނދުނުގެ ނާސްތާ ކުރުމަކީ ، ހައިދަރުގެ އާދައެކެވެ. ކުލްސޫމް އިނީ ނޫސް ކިޔާށެވެ. ހައިދަރު އޭނާގެ ސައިތަށި ގިރައިލުމަށްފަހު ، މަންމަގެ ސަމާލުކަން ހޯދުމަށްޓަކައި ސަމުސަލުން ދެތިންފަހަރު ، ޖޯޑުގައި ޖަހައިލިއެވެ. މަންމަޔަކަށް ޚަބަރެއް ނުވިއެވެ. ކަރުކަހައިލިއެވެ. ޚަބަރެއް ނުވިއެވެ. ކަހާތަން ހިރުވައިވެސް ނުލިއެވެ. އެންމެފަހުން ، ހައިދަރު އޭނާގެ މަންޔަށް ގޮވައިލިއެވެ.
ޢާންމުގޮތެއްގައި އަންހެންކުދިން އެތަނެއްގައި އެއްވެ އުޅޭ ކައިވެނީގެ އެކި ރަސްމިއްޔާތުތަކުން ނިމިގެން ގެޔަށް އައިސް ، ހައިދަރާ ސުއާލުކުރުމަކީ ، ކުލްސޫމުގެ އާދައެކެވެ. ގަޔާވާ ކަހަލަ ކުއްޖަކު ފެނުނުތޯ އަހައި ، އެތައް ސުއާލެއް ކުރާނެއެވެ. އެންމެފަހުން އެއޮތް ރަސްމިއްޔާތުން އައިސް ، އޭނާގެ މަންމަ އެއްވެސް ސުއާލެއް ނުކުރީތީ ހައިދަރުހުރީ ޙައިރާން ވެފައެވެ. އެއީ އެހެންނޫނީ ، ނުވާ ކަމެކެވެ. ރޭގެ ރަސްމިއްޔާތާ ގުޅިގެން އެކަހަލަ އެއްވެސް ކަމެއް ނެތެވެ.
ކުލްސޫމް އޭނާގެ ދަރިފުޅާ ދިމާލަށް ބަލައިލިއެވެ. އޭނާގެ ހުރި ހަމައެކަނި ފިރިހެންދަރިފުޅު ، އޭނާގާތު މުހިންމު ވާހަކައެއް ބުނަން އެބައޮތޭ ބުނޭތޯ ، އިންތިޒާރު ކުރަމުންގެންދާތާ އެތައް ޒަމާނެއް ވެއްޖެއެވެ. އޭނާގެ ދަރިފުޅަށް އަންހެންކުއްޖަކު ކަމުދިޔަ ވާހަކަ ބުނެ ، އެކުއްޖަކާ ކައިވެނިކުރަން ބޭނުންވާ ވާހަކަ ބުނެލާ އަޑުއަހާލަން ބޭނުންވެފައި އިންނަތާ ޒަމާންތަކެއް ވެއްޖެއެވެ. އޭނާގެ ދަރިފުޅާއެކު ، އެކުއްޖާގެ ގެޔަށްގޮސް ކައިވެނީގެ ވާހަކަ ދައްކަން ބޭނުންވާ ވާހަކަ އެއީ ، ކުލްސޫމުގެ ކަންފަތަށް އިވެން ، ބޭނުންވެފައި އޮތް އެންމެ މުހިންމު ވާހަކައެވެ.
ކުލްސޫމް އިތުރު ވާހަކައެއް ނުދައްކައެވެ. އަނެއްކާވެސް ނޫސްކިޔަން ފެއްޓިއެވެ. އޭނާ އެބުނީ އޭނާގެ ދަރިފުޅުގެ އަނގައިން ނުކުމެދާނެ ވާހަކަތަކެއްކަމަކަށް ، ކުލްސޫމަކަށް މިހާރު ޤަބޫލެއް ނުކުރެވެއެވެ. އެކަމަށް އޭނާ މިހާރު އެހުރީ އާދަވެފައެވެ.
" މަންމާއެވެ ! މަންމަގެ ހުވަފެން ޙަޤީޤަތަކަށް ވެއްޖެއެވެ. މަންމަޔާ ވަރަށް މުހިންމު ވާހަކައެއް ދައްކަން އަހަރެން ބޭނުން ވެއްޖެއެވެ. އަހަރެންނަށް ކުއްޖަކު ކަމުހިނގައްޖެއެވެ. " ލަސްލަހުން ، ހައިދަރު ވާހަކަ ދެއްކިއެވެ.
ކުލްސޫމަށް ލިބުނު ޙައިރާންކަމުގައި ދެލޯބޮޑުވިއެވެ. އެއިނދެވެނީ ހުވަފެނެއްގައިތޯ ބަލައިލަން އަތުގައި އަމިއްލަޔަށް ވިކައިގަތެވެ.
ހައިދަރު ، ކައިވެނިކުރާނީ ހަމައެކަނި އެކުއްޖާއާއެވެ. އެކުއްޖާގެ ގެޔަށްގޮސް ، އޭނާގެ މައިންބަފައިން ، އެކުއްޖާއާ އޭނާ ކައިވެނިކުރަން ރުހޭތޯ ބަލައިދިނުމަށް ، ހައިދަރު އެދުނެވެ.
ކުލްސޫމަށް ހީވީ ، ހައިދަރު އޭނާއާ ސަމާސާ ކުރަނީ ކަމަށެވެ. އޭނާގެ ދަރިފުޅު އެބުނި ވާހަކައެއް ކުލްސޫމަކަށް ޤަބޫލެއް ނުކުރެވުނެވެ. ހައިދަރަށްވެސް އެކަން އިޙްސާސް ވިއެވެ. އޭނާ އެދެއްކި އެއްވެސް ވާހަކައެއް މަންމަޔަކަށް ޤަބޫލެއް ނުކުރެވޭނެއެވެ. އޭނާ އެވާހަކަ ދެއްކީ ހިތުގެ އަޑިންކަން ޔަޤީންކޮށްދިނުމަށްޓަކައި ، އިންތަނުން ތެދުވެގެންގޮސް ، މަންމަގެ ބޮލުގައި ބޮސްދިނެވެ. އަދި ގުދުވެލައި މަންމައާ ހަތަރުކަޅި ހަމަކޮށްލައި ، އޭނާ އެބުނީ ތެދެއްކަން ލޮލުން ހާމަކޮށްލިއެވެ. އެއީ ހަމަ ހިތުގެ އަޑިން އެދޭ އެދުމެކެވެ. އެކަން ކޮށްދިނުމަށް މަންމަގެ ކިބައިން ހައިދަރު އެދެއެވެ.
ދިލްނަޝީން ، ރިދާގެ ގެޔަށްގޮސް އުޅުނު ދުވަހެކެވެ. ކޮންމެވެސް ގޮތަކުން ފުރުޞަތު ހޯދައިގެން ، ހަމްޒާއާއެކީ ރެސްޓޯރެންޓަކަށް ޖައްސައިލިއެވެ.
" އަހަރެމެންގެ ކައިވެނީގެ ހެދުމުގެ ކުލަޔަކީ ، މިއޮތީއެވެ. " ދިލްނަޝީން އަށް ފޯނުން ، ހަމްޒާ ފޮޓޯއެއް ދައްކައިލިއެވެ.
ހަމްޒާ އެބުނި ވާހަކަޔަކުން ދިލްނަޝީން ސިހިގެން ދިޔައެވެ. ލަދުރަކި ކަމާއެކު އެފޮޓޯއަށް ދިލްނަޝީން ބަލައިލިއެވެ. ދިލްނަޝީން އެއަކަށް ވަކި އެއްޗެއް ނުބުނެ އޭނާގެ އަމިއްލަ ފޯނާ ކުޅެން ފެށްޓިއެވެ. އެހެންނަމަވެސް ، އެ ކުލަތަކަކީ ދިލްނަޝީނަށް ކަމުދިޔަ ކުލަތަކެއްކަން ، އޭނާގެ މޫނުމަތިން ހަމްޒާއަށް އެނގެއެވެ. ދިލްނަޝީނަކީ ހަމްޒާއާ މާގިނަ ވާހަކަ ދައްކާމީހެއްނޫނެވެ. ކުރާ ސުއާލަކަށް ޖަވާބެއްވެސް ނުދޭނެއެވެ. ދިލްނަޝީންގެ ޖަވާބު ، ހަމްޒާއަށް އަބަދުވެސް ހޯދަންޖެހެނީ ، ދިލްނަޝީންގެ މޫނުމަތިންނެވެ. ދިލްނަޝީންގެ ލޮލުގެ އެތެރެޔަށް ފީނައިގަނެގެންނެވެ. އެއީ ހަމްޒާއަށް އެއްވެސް މައްސަލައެއް ނޫނެވެ. އެކަމަށް އޭނާހުރީ އާދަވެފައެވެ. ދިލްނަޝީނުދެކެ ހަމްޒާ ލޯބިވާ އެންމެ ބޮޑު ސަބަބަކީ އެއީއެވެ. ދިލްނަޝީންގެ މަޢުޞޫމިއްޔަތު ކަމެވެ.
އެކަމަކު ، އެމީހުން ހަނީމޫނަށް ދާނީ ކޮންތާކަށްތޯ ހަމްޒާކުރި ސުއާލަށް ދިލްނަޝީން ޖަވާބު ދިނެވެ. އެހާކުރިން އެކަމާ ވިސްނުމުގެ ބޭނުމަކީ ކޮބައިތޯ ދިލްނަޝީން ސުއާލުކުރިއެވެ. އޭނާއާއި ދިލްނަޝީންގެ ކައިވެނީގެ ، އެތައްކަމަކާމެދު ވިސްނައި ޚިޔާލުކޮށް ، ހަމްޒާވަނީ ވަރަށްގިނަ ކަންކަން ރާވާފައެވެ. އެހުރިހާކަމެއް އަދި ، ދިލްނަޝީން ގާތަކު ނުބުނެއެވެ.
ދިލްނަޝީން ހަމްޒާއަށް ގޮވައިލިއެވެ. އެދެމީހުންނަށް ، ކައިވެނިވުމުގެ ފުރުޞަތު ނުލިބިއްޖިއްޔާ ވާނީ ކިހިނެއްތޯ ސުއާލު ކުރިއެވެ. ދިލްނަޝީންގެ އެ ސުއާލުން ، ހަމްޒާގެ މޫނުމަތީގެ ކުލަވަރު ބަދަލުވެގެން ދިޔައެވެ. އެފަދަ ދުވަހެއް އަތުވެއްޖިއްޔާ އޭނާ ދުނިޔެއަކު ނުހުންނާނެއެވެ. ހަމްޒާގެ އެ ޖަވާބުން ، ދިލްނަޝީންގެ ހިތަށް ބިރުވެރިކަން ލިބިގެންދިޔައެވެ. އެދެމީހުންގެ ކައިވެނި ކުރެވިދާނެކަމެއް އަދި ނުކުރެވޭނެކަމެއް ދިލްނަޝީނަކަށް ނޭނގެއެވެ. ހުރިހާ ގޮތަކުންވެސް އެދެމީހުންނަކީ އުޑާއި ބިމާހާ ތަފާތު ދެމީހުންނެވެ. ދިލްނަޝީންގެ އަމިއްލަ ޙާލާއި ފެންވަރަށް ވިސްނައި ، ފިކުރުކޮށްލުމުން ، ހިތަށް އުނދަގޫވެގެންގޮސް ހާސްވާވަރަށް ދިލްނަޝީން ކަންބޮޑު ވެއެވެ. ހަމްޒާދެކެ ކިތަންމެ ލޯބިވިޔަސް ، ދިލްނަޝީންގެ ހިތުގައި އެ ބިރުވެރިކަން އަބަދުވެސް އޮވެއެވެ. އެއީ ހަމްޒާދެކެ ލޯބިވުމުގެ ކުރިން ، ދިލްނަޝީން ވިސްނަންޖެހޭނެ ކަމެކެވެ. އެކަމަކު ، އެކަމަށް އޮތް ވަޤުތު މިހާރު އެވަނީ ފާއިތުވެފައެވެ.
އޭނާ އެންމެ ފަހުން އެދިޔަ ޕާޓީން ފެނިގެން އޭނާގެ ލޮލުގައި އަޅައިގަތް ކުއްޖާގެ ނަމެއް ، ހައިދަރަކަށް އަދިވެސް ނޭނގެއެވެ. އެހެނަސް ، އެކުއްޖާގެ ގެޔަށްގޮސް ، އޭނާގެ ކައިވެނި ހުށަހެޅުމަށް ، މަންމަގެ ކިބައިން އެއޮތީ އެދިފައެވެ. ވިޔަފާރީގެ މުޢާމަލާތަކަށް އިސްލާމްއާބާދަށް ދިއުމަށްޓަކައި ހައިދަރު އެހުރީ ތައްޔާރުގައެވެ. ފްލައިޓްގެ ގަޑިވެސް ޖެހެނީއެވެ. ކައިވެނިކުރަން ބޭނުންވާ ކުއްޖާގެ ގެޔަށްގޮސް ހުރިހާކަމެއްކުރަން އެޖެއްސީ މަންމައާއެވެ. ހައިދަރަކަށް ، މަންމަޔާއެކީ އެގެޔަށް ދެވޭކަށް ނެތެވެ. އޭނާގެ ދަރިފުޅަކީ ކޮންކަހަލަ މީހެއް ބާވައޭ ކުލްސޫމުގެ ހިތަށް އެރިއެވެ. ހައިދަރަކީ ، ކާމިޔާބު ވިޔަފާރި ވެރިޔެކެވެ. އެހެނަސް ، ދިރިއުޅުމަކާމެދު އޭނާގެ ވިސްނުން ހުރިގޮތުން ، ކައިވެންޏެއްކޮށްގެން ޙަޔާތުގައި ދިމާވާ ގޮންޖެހުންތައް ހައިދަރަށް ޙައްލު ކުރެވޭނީ ކިހާވަރަކަށް ބާވައޭ ކުލްސޫމުގެ ހިތަށް އަރައެވެ. އެހުރިހާ ވަހުމަކާއެކުވެސް ، ހައިދަރު މީހަކާ ދެވުމަކީ ، ކުލްސޫމުގެ ޙަޔާތުގައި ، މިހާރު އެންމެ ބޭނުންވާ މުހުތާދެވެ.
ހައިދަރަށް އެފެނުނު ކުއްޖާ ، އޭނާގެ މަންމަޔަށް ސިފަކޮށްދިނީ މަންޒަރުންނެވެ. އެ ދުވަހުގެ އެޕާޓީގައި އެކުއްޖާގެ ޙަރަކާތްތައް ހުރިގޮތާއި ދިމާވި ކަންކަމުންނެވެ. އެ ހުރިހާ ކަމަކީވެސް ، ކުލްސޫމަށްވެސް ފާހަގަ ކުރެވުނު ކަންކަމެވެ. އެހެންކަމުން ، އެއީ ކޮންކުއްޖެއްކަން ވަރަށް ފަސޭހައިން ކުލްސޫމް ދެނެގަތެވެ. އެއީ ބަލައި ފޫހިނުވާވަރަށް ، ރީތި ކުއްޖެކެވެ. ޕާޓީއަށްދިޔަ އަންހެންވެރިންވެސް އެކުއްޖާގެ ރީތިކަމަށް ތަޢުރީފް ކުރިއަޑު ، ކުލްސޫމަށް އޮތީ އިވިފައެވެ. އެ ކުއްޖާގެ ނަން ނޭނގުނަސް ، އެއީ ޢާފިޔާގެ ކުއްޖެއްކަން ، ޢާޞިމްގެ ފަރާތުން ކުލްސޫމަށް އޮތީ އެނގިފައެވެ. ޢާޞިމަކީ ، ކުލްސޫމުގެ އަންހެންދަރިފުޅު ، ސާރާގެ ފިރިމީހާއެވެ. އެހެންވީމާ ޢާޞިމަށް އެކުއްޖާ ރަނގަޅަށް އެނގޭނެއެވެ. އެ ކުއްޖާއަކީ ، މުއްސަނދި ކުއްޖެއްތޯ ނުވަތަ ފަޤީރު ޢާއިލާއަކަށް ނިސްބަތްވާ ކުއްޖެއްތޯ ބަލާކަށް ކުލްސޫމް ބޭނުމެއް ނޫނެވެ. ހަމައެކަނި ބޭނުންވަނީ ، ހައިދަރާ ކައިވެނިކުރަން ، އެކުއްޖާގެ ޢާއިލާގެ ރުހުމެވެ.
އިސްލާމްއާބާދަށް ދިއުމަށް ތައްޔާރުވެގެން މަންމަ ކުރިމަތީ ހައިދަރު ހުއްޓިހުރިއިރު ، އޭނާގެ މޫނުމަތިން ފާޅުވަމުންދިޔަ ނުތަނަވަސްކަން ، ކުލްސޫމަށް ފާހަގަ ކުރެވިގެން ، ހައިދަރުގެ ޚިޔާލު ބަދަލުވީކަމަށް ހީކޮށް ، އެކަމާ ސުއާލު ކުރިއެވެ.
އެކައިވެންޏާމެދު ، ހައިދަރުގެ ޚިޔާލު ބަދަލެއް ނުކުރެއެވެ. ކައިވެންޏެއްކުރާއިރު ، އަނެއް ބައިވެރިޔާއާމެދު ، ކޮންމެ މީހަކުވެސް ވިސްނާނެއެވެ. ހައިދަރުގެ ކަންބޮޑުވުމަކީ ، ހައިދަރަށްވުރެ ، އެކުއްޖާ ، މާބޮޑަށް ޢުމުރުން ޅަވުމެވެ. ކުލްސޫމް އެކަމަކަށް އެއްބަހެއް ނުވެއެވެ. އެ ކުއްޖާޔަކީ ، ހައިދަރަށްވުރެ އެހާބޮޑުތަން ޢުމުރުން ތަފާތުވާ ވަރަށްވުރެ ހަރު ކުއްޖެކެވެ. އެންމެ މިޒަމާނުގެ ޒުވާނެއް ނޫނެވެ. އެންމެ ގިނަވެގެންވެސް ވާނީ ވިއްސަކަށް އަހަރެވެ. ޢުމުރު ތަފާތުވިޔަސް ، އެކުއްޖާއަށް ހައިދަރު ހިތްކިޔުމުން އެކަނިވެސް ކުލްސޫމަށް ފުދެއެވެ.
އެއީ ހައިދަރަށް ރީތި ކުއްޖެކެވެ. ސާދާވެފައި ސަމާސާ މިޒާޖެކެވެ. އޭނާގެ ކޮއްކޮ ، ސާރާއާވެސް ރައްޓެހި ކުއްޖެކެވެ. އެ ފަރިފަރި ނަލަ ހިނިތުންވުން އެއީ އެންމެ ފުރަތަމަ ފެނިލިހިނދުވެސް ހައިދަރު އަޅައިގަތް އެއްކަމެވެ. ހައިދަރަށް އެންމެ ހިތްގައިމުވި ކަމަކީ ، އެކުއްޖާގެ މަޢުޞޫމިއްޔަތު ކަމެވެ.
ކުއްޖަކު ފެނިލުމުން ހިތްކިޔައިލުން އެއީ ކައިވެންޏަކަށް ފުދޭނެ މިންވަރެއްނޫނެވެ. އެހާ ގިނަދުވަހު އެކަނިވެރިކަމުގައި ހިތްހުސްކޮށްގެން ހުރި ، ހައިދަރުފަދަ ، ކާމިޔާބު ވިޔަފާރިވެރިޔަކަށް ، ލޯތްބާ ނުލައި ހުސް ހިތަކައިގެން ކައިވެންޏެއް ކުރުމަކީ އެހާ ފަސޭހަކަމެއްނޫނެވެ. ހައިދަރު ، ކައިވެންޏަކާ ކުރިމަތި އެލަނީ ، މަންމަގެ ހިތްހަމަޖައްސާލަ ދިނުމަށް އެކަންޏެއްނޫނެވެ. އޭނާއަށްވެސް އަންހެނެއްގެ ލޯބި ބޭނުން ވެއެވެ. ކުރިން ލިބުނު ލޯބި ގެއްލި ދިއުމުން ، އެކަމާ ހިތާމަކޮށްކޮށް ޢުމުރު ހުސްކޮށްލާކަށް ހައިދަރުވެސް ބޭނުމެއް ނޫނެވެ. އެހެނަސް ، އަލުން ލޯތްބެއް ލިބި އެލޯބި ބީވެގެން ހިނގައިދާނެކަމުގެ ބިރު ، ހައިދަރަށް އިޙްސާސް ކުރެވެނީއެވެ. އަދި އޭނާގެ ހިތުގައިވާ މެހެމަލްގެ ލޯބި ، ހިތުން ފިލުވައި ނުލެވިދާނެކަމުގެ ބިރުވެސް އޭނާގެ ހިތުގައި އޮންނަނީއެވެ. އެހާ ދުވަސް ވަންދެން މެހެމަލްގެ ލޯބި އޭނާގެ ހިތުން ފިލުވައި ނުލެވި ، އެހެން އަންހެންކުއްޖަކާމެދު ވިސްނައިލަން އެހިތް ނޭދުނީ ، އަންހެންކުދިންނަށް ކުރެވޭ އިތުބާރު ، ހައިދަރުގެ ހިތުން ފިލައި ގޮސްފައި ވާތީކަމަށް ވެދާނެއެވެ. ފުރަތަމަ ލޯބީގެ ހިތި ތަޖުރިބާއިންނެވެ.
ކުލްސޫމު ބޭނުންވަނީ ، އޭނާގެ ޅީދަރިފުޅު ، ހައިދަރުދެކެ ލޯބިވަމުންގޮސް ، ހުރިހާކަމެއް ހައިދަރުގެ ހިތުން ފިލުވައިލެވޭވަރަށް ލޯބިވުމެވެ. ހައިދަރުގެ ޙަޔާތުގައި ހުސްކޮށްދިޔަ ހުރިހާ ދުވަސްތަކެއްގެ އުފާވެރިކަން ، އެކުއްޖެއްގެ ލޯބިން ހައިދަރަށް ލިބުމެވެ. މަންމަ ކަމަށްވިޔަސް ޚުދު އޭނާގެ މަތިންވެސް ، ހައިދަރަށް ހަނދާން ނައްތައިލެވޭވަރަށް ، އެކުއްޖަކު ހައިދަރު ދެކެ ލޯބިވުމެވެ. ހައިދަރުވެސް ލޯބިންގޮސް މަރުވާވަރަށް އެކުއްޖަކު ދެކެ ލޯބިވުމެވެ. މެހެމަލްގެ ހަނދާނުން ހައިދަރުގެ ހިތަށް ލިބިފައިވާ އަނިޔާގެ ޒަޚަމާއި ތަކުލީފުތަކުން ސަލާމަތްވެ ، ހައިދަރު އުފަލުގައި ހުރުމެވެ. އެއީ އެހާ ފަސޭހަކަމެއްނޫނެވެ. މާއަވަހަށް ވެދާނެކަމެއްވެސް ނޫނެވެ. ކެތްތެރިކަމާއި މަޑުމައިތިރިކަން ، އިސްކުރަންޖެހޭނެއެވެ.
މަންމަ ބޭނުންވަނީ ، އޭނާ އުފަލުގައި ހުރެވޭނެފަދަ ކައިވެންޏަކުން އޭނާގެ ޙަޔާތް ، ބާއްޖަވެރިވެގެންދިއުންކަން ހައިދަރަށްވެސް އެނގެއެވެ. ހައިދަރު އޭނާގެ މަންމަގެ ހިތްހަމަ ޖެހުމާއި އުފަލަށްޓަކައި ، ނުކޮށް ދޫކޮށްލާފައިވާ އެއްވެސްކަމެއް ދުނިޔެއަކު ނެތެވެ. އެހެނަސް މިއަދު ، އެ މަންމަގެ މޫނުމަތިން ފާޅުވަމުންއެދާ އުފާވެރިކަމުގެ ތަޞައްވުރަކީ ދުވަހަކުވެސް މަންމަގެ މޫނުމަތިން ހައިދަރަށް ފެނިފައިވާ އަސަރެއްނޫނެވެ. އޭނާގެ ކައިވެންޏަކީ ، މަންމަޔަށް ކިހާ މުހިންމުކަމެއްކަން ، އެކަމުން އެކަނިވެސް ހައިދަރު ވިސްނައިގަތެވެ.
ކައިވެންޏަކާމެދު ނުވަތަ އަންހެންކުދިންނާމެދު ، ހައިދަރުގެ ވިސްނުމާއި ފިކުރު ހުންނަގޮތް ކުލްސޫމަށް ވަރަށް ސާފުކޮށް އެނގެއެވެ. އަންހެންކުއްޖަކު ކަމުދިއުމަކީ ، ހައިދަރަށް އެހާ ފަސޭހަ ކަމަކަށް ނުވާނެކަން ކުލްސޫމަށްވެސް އެނގެއެވެ. ހައިދަރަށް އަންހެންކުއްޖަކު ކަމުހިނގައްޖެނަމަ ، އެއީ ހައިދަރުގެ ހިތުގެ އަޑިން އެކުއްޖަކު ކަމުދިޔައީއެވެ. އެއީ ވަރަށް އާދަޔާ ޚިލާފު ކުއްޖަކަށް ވާނެއެވެ.
ދެމައިން ވާހަކަދައްކަން ތިއްބާ ، ހައިދަރު އެއަރޕޯޓަށްދާންޖެހޭ ގަޑި ޖެހިއްޖެއެވެ. ކިތަންމެ އިރަކުވެސް އެދެމައިންނަށް ވާހަކަ ދައްކަން ތިބެވިދާނެއެވެ. މަންމަޔާ ސަލާމް ކޮށްލުމަށްފަހު ، އޭނާ ޙަވާލުކުރި މަސައްކަތް ފުރިހަމަކޮށްދިނުމަށް އެދެމުން ، އެއަރޕޯޓަށް ދިއުމަށްޓަކައި ހައިދަރު ނުކުތެވެ. ކުލްސޫމުވެސް ، އޭނާގެ ދަރިފުޅު ޙަވާލުކުރި މަސައްކަތް ފުރިހަމަކުރާނެކަމަށް ވަޢުދު ވިއެވެ. (ނުނިމޭ)
ވވވ.ރީތި ޝުކުރަން