(11 ޑިސެމްބަރ 2023 ގައި ޝާއިއުކުރި ބަޔާ ގުޅޭ)
ކޮޓަރިޔަށްވަދެ ، ނޫރުގެ އޮފީހުގެ ވަރަށް ގާތް ބަޔަކާ ވާހަކަދައްކައި ، ރޭވުންތަކެއް ރޭވިއެވެ. އޭރު ، އެގޭތެރޭގެ ސިޓިންގރޫމުގައި ނޫރުގެ ބައްޕަ ވަޞީމާއި ބޭބެ ހާރިސް ވާހަކަ ދައްކަމުން އެގެންދަނީ ، ނޫރުއާ ބެހޭގޮތުންނެވެ. ނޫރު އުޅެންބޭނުންވާ ކޮންމެގޮތަކަށް އުޅެން ދޫކޮށްލަމުން ގެންދާތީ ، ހާރިސްހުރީ ބައްޕައާމެދު ހިތްހަމަ ނުޖެހިފައެވެ. އަންހެންކުއްޖަކަށްވީތީ ، ނޫރުއާމެދު ބައްޕަ ވިސްނަންޖެހޭ ކަންތައްތަކެއް ހުންނަން ޖެހޭނެކަމަށް ހާރިސް ބުނަމުން ގެންދިޔައެވެ. ނޫރު އެއުޅެނީ ، މީހަކާ ނީނދެހުރި ހުސްހަށިބައި އަންހެންކުއްޖަކު އުޅެން ކަމުދާގޮތަކަށްނޫނެވެ. ނޫރު ބޭނުންހާ ގޮތަކަށް އުޅެން އެމީހުން ދޫކޮށްލައިފިއްޔާ ، އެމީހުންގެ ލޯމަތިން ނޫރު ގެއްލިދާނެއެވެ. އެއީ ކުރަން ހެޔޮވާވަރުގެ ކަމެއްނޫނެވެ.
ނޫރު ބޭނުންވީމާ ، އޮފީހުގެ މީހުންނާ މަސްހުނިވެގެން އުޅުމަށް ތިންހަތަރު ދުވަހަށް ދަތުރު ދިއުމަށް ހުއްދަދިނުން އެއީ ހާރިސްއަށް ފެންނަކަމެއްނޫނެވެ. ބައްޕަ ކަންތައް އެކުރިގޮތުން ، ބައްޕާއާ ދިމާއަށް އެއްޗެކޭ ބުނަން ޖެހުނީތީ ހާރިސް މަޢާފަށް އެދުނެވެ. އެހެނަސް ، އެދަތުރު ދިއުމަށް ނޫރުއަށް ބައްޕަ އެދިން ހުއްދަޔަކީ ހާރިސް ޤަބޫލުކުރާނެ އިޒުނައެއްނޫނެވެ.
ވަޞީމަށް ބުނެވެން އޮތްގޮތަކަށް ، ބުނެވެން އޮތް އެއްޗެއްބުނެ ، އެކަމަށް ހުރަސް އެޅުމަށް މަސައްކަތްކުރިއެވެ. މަނާކުރުމަށް ކުރެވެން އޮތްކަމެއް ކުރިއެވެ. އެހެންނަމަވެސް ، ނޫރުހުރީ ގޮތްދޫކުރާ ގޮތަކަށްނޫނެވެ. އެކަމަށް ހުރަސް އެޅުމަށް ޢާޞިމްކުރި ހުރިހާކަމެއް ބޭކާރުވީއެވެ. ނޫރުއަކީ ، އެހާ ފަސޭހައިން ގޮތްދޫކުރާ މީހެއްނޫނެވެ. ގޭގެ އެންމެން އޭނާއާ ދެކޮޅަށް ތިބިނަމަވެސް ، އޭނާކުރަން ބޭނުންވާކަމެއް ، ބޭނުންވާގޮތަކަށް ކުރާނެއެވެ.
" މާ މޮޅަށް ކިޔެވިގެން ލާރިހޯދުމަށް މަސައްކަތްކުރިޔަސް ، ގޭގެ ބޮޑެތިމީހުންގެ ވިސްނުމާ އަމުރާ ދެކޮޅަށް އަމްދުން އަންހެންކުއްޖަކު އުޅެގެންނުވާނެއެވެ. ނޫރު އެކުރަނީކީ ރަނގަޅުކަމެއްނޫނެވެ. ޢާއިލާ ބަދުނާމުވުން ނޫންކަމެއް އެކަމަކުން ނުވާނެއެވެ. " ރައިދާވެސް އެމީހުންނާ އެއްބައި ވިއެވެ.
މަތީބުރިން ފައިބައިގެން އައިއިރު ، ނޫރުއަށް އެމީހުން އެދައްކާ ހުރިހާ ވާހަކައެއްގެ އަޑު އިވެއެވެ. ނޫރު އެއައީ އެވާހަކަތައް އަޑުއަހަމުން މަޑުމަޑުން ސިޑިން ފައިބައިގެންނެވެ. އެމީހުންގެ ކުރިމައްޗަށް އައިސްހުއްޓިފައި ، ރައިދާއާ މުޚާތަބުކޮށް ނޫރު ބުންޏެވެ.
" ދައްތާއެވެ ! ދުނިޔެ މިއޮތީ ވަރަށްބޮޑަށް ބަދަލުވެފައެވެ. މިއީ ، އެކަކު އަނެކަކަށް އިތުބާރުކޮށް ގުޅިގެން މަސައްކަތްކޮށް ދުނިޔެ އާބާދުކުރުމުގެ ޒަމާނެވެ. ބޯދާ މުސްކުޅި ދުވަހެއްނޫނެވެ. ދުނިޔެ ހޯދަމުން އެގެންދާ ކާމިޔާބީގެ އަސްލަކީ އެއީއެވެ. އެއާ އިދިކޮޅު ވިސްނުމުގެ މީހުން ދިރިއުޅެމުން ގެންދާނީ ، ކޮށްޓެއްގައި ބަންދުކޮށްފައި އިންނަ ގުރައެއްގެ މިސާލުގައެވެ. މިނިވަންކަމުގެ ކުޑަވެސް އިޙްސާސެއް އެއަކަށް ނުލިބޭނެއެވެ. ގެއިން ބޭރަކަށް ނުދެވޭނެއެވެ. ކާނީވެސް އެހެން މީހުން އެއްޗެއް ދިނިއްޔާއެވެ. ކިތަންމެ ވަރަކަށް ހަޅޭއްލެވިޔަސް ، މީހުން އެއީ އެއްޗަކަށް ހަދާނީ މަދުފަހަރަކުއެވެ. އޭތި އެގޮވާ ގޮވެލިތަކުން އެހެންމީހުންނަށް ވާނީ ބޮޑު އުނދަގުލަކަށެވެ. އެހެންމީހުންގެ ދިރިއުޅުން ތަކުލީފަކަށް ހަދާނެއެވެ. އެކަމަކު ، ދޫވެގެން މަގުމަތީ އެއުޅޭ ގުރަޔަކީ މިނިވަންކަމާއެކު ބޭނުންގޮތަކަށް ދިރިއުޅޭ އެއްޗެކެވެ. އެއްވެސް މީހެއްގެ ފަރާތުން ތަކުލީފެއް ނުލިބޭނެއެވެ. އަދި އޭތީގެ ފަރާތުންވެސް އެއްވެސްމީހަކަށް ތަކުލީފެއް ނުލިބޭނެއެވެ. ދައްތަމެން ތި ގެންގުޅެނީ ވަރަށް ބޯދާ ވިސްނުމެކެވެ. "
" ވިސްނައިގެން ވާހަކަ ދައްކާށެވެ ! މިހާރަކަށް އައިސް މީހުންނާ ވާހަކަ ދައްކާއިރު ، ނޫރުގެ އެއްވެސް އަދަބެއް ސަދަބެއް ނުހުންނަކަން އަހަރެންނަށް އެބަ ފާހަގަ ކުރެވެއެވެ. މަތީ މަޤާމެއް ލިބުމަކީ ، ބޮޑެތި މީހުންނަށް އިޙްތިރާމް ކުރުން ހަނދާން ނައްތާލައި ، އެހެންމީހުންނާދިމާއަށް އަދަބެއް ނެތި ހިތަށް އެރިހާ އެއްޗެއް ގޮވަންލިބޭ ލައިސަންސެއްނޫނެވެ. ރައިދާއަށްވެސް އަދި ނޫރުއަށްވެސް އެކަން ހަނދާންކޮށްދޭން އަހަރެން ބޭނުމެވެ. މިއަދުން ފެށިގެން ނޫރުގެ ބަސްމަގު ރަނގަޅުކުރާށެވެ ! ޙައްދު ފަހަނަޅައި ނުދާށެވެ ! " ހާރިސް ، ނޫރުއާ ދިމާއަށް ދެލޯ ބޮޑުކޮށްގެން ، އިނގިލި ދިއްކުރަމުން ، ރުޅިއައިސްފައިހުރެ ، ހާރިސް ހަޅޭއްލަވައިގަތެވެ. އޭނާގެ އަނބިމީހާއާ މުޚާތަބުކޮށް ނޫރު އެދެއްކި ވާހަކަތަކަކީ ، ހާރިސްއަށް އަޑުއަހަން ފަސޭހަ ވާހަކަ ތަކަކަށް ނުވިއެވެ. އޭގެފަހުން އެގޭތެރެއިން އެއްވެސް އަޑެއް ނީވެއެވެ.
ފިޔާކޮށަން ބަދިގޭތެރޭ ހުރެފައި ޠާހިރާ އޭނާގެ މަންމަޔަށް ގޮވައިލިއެވެ. އަދި ، ވަޒީފާއެއް އަދާކުރަން ބޭނުންވާ ވާހަކަ މިއަދުވެސް ތަހުނިޔާ އޭނާގާތު ބުނިވާހަކަ ބުނެލިއެވެ. ޙަފުޞާއަށް އެއީ މައްސަލައެއްނޫނެވެ. ގޭގެ އެންމެންގެ ކަންކަމާ ގޭތެރޭގެ ކަންކަން ނިންމާފައި ވަގުތުލިބޭނަމަ ، ވަޒީފާއެއް އަދާކުރުމަކީ ޙަފުޞާއަށް މައްސަލައެއްނޫނެވެ. އެކަމަކު ގޭތެރެއިން ލިބޭ ހަމަޖެހުން ދޫކޮށްލާފައި ، ވަޒީފާއެއް އަދާކުރުމަށް އޮފީހަށްގޮސް ބޯހާސްކުރުން އެއީ ޙަފުޞާއަށް ކަމުދާކަމެއްނޫނެވެ.
ޠާހިރާއަށް ވިސްނޭގޮތުގައި ތަހުނިޔާގެ ވިސްނުމާއި ފިކުރު އެހުރީ ، ނޫރުލްޢައިނުއާ އެއްގޮތަކަށެވެ. އެވާނީ ނޫރުލްޢައިނުގެ ބަސް ޤަބޫލުކޮށްގެން ، ގޭތެރޭގެ މަސައްކަތުން ރެކެންވެގެން އޮފީހަކަށްދާން ދައްކާ ބަހަނާ އަކަށެވެ. އެއީ ނޫރުލްޢައިނުވެސް އުޅެން ބޭނުންވާ ގޮތެވެ. ޙަފުޞާވެސް އެކަމަށް އެއްބަސް ވިއެވެ. އެކަން އެހެން ދިމާވެދާނެކަން ކުރިންވެސް ޙަފުޞާއަށް އެނގެއެވެ. ނޫރުލްޢައިނާ ދުރުގައި ތަހުނިޔާ ގެންގުޅުމުގެ މުހިންމުކަން ކުރިންވެސް ޙަފުޞާ އޮތީ ފާހަގަ ކޮށްފައެވެ. ނޫރުލްޢައިނާ އެކުގައި އުޅޭކަމަށްވަންޏާ ، ތަހުނިޔާވެސް އުޅެން ބޭނުންވާނީ ނޫރުލްޢައިނު އުޅޭގޮތަކަށެވެ. ނޫރުލްޢައިނު އެކަމަށް ބާރު އަޅައި ތަހުނިޔާގެ ސިކުނޑިއާ ކުޅެނުލައެއް ނުހުންނާނެއެވެ. ވީއެންމެ އަވަހަކަށް ތަހުނިޔާއާއި މުރުތަޟާއާ ދެމީހުންގެ ގުޅުން ބަދަހިވެ ، ނޫރުގެ ކޮޅު ދަށްވެގެން ދިއުން އެއީ ޙަފުޞާގެ އަބަދުގެވެސް ދުޢާއެވެ. އެދެމީހުންގެ ފިކުރާއި ޚިޔާލާތުގައި އެއްގޮތްތަކެއް އެބަހުށްޓެވެ. އެކަން ތަހުނިޔާގެ ސިކުނޑިން ފިލުވައިލުން އެއީ ، ޙަފުޞާމެން ކުރަންޖެހޭ ވަރަށް މުހިންމު ކަމެކެވެ. ތަހުނިޔާއާއި މުރުތަޟާ ހަނީމޫނަށް ފޮނުވަން އެހާބޮޑަށް ބޭނުންވީ ޙަފުޞާގެ ހިތުގައި އެ މަޤްޞަދު އޮތީމައެވެ. ދަތުރު ނިންމާފައި އަންނައިރު ، ފަހަރެއްގައި އެކަމަށް މަގުފަހިވާފަދަ ޚަބަރެއްވެސް ލިބިދާނެއެވެ. އޭރަށް އެއޮތީ ނޫރުލްޢައިނުގެ ވަސް އެގެއިން ފިލުވައިލެވިފައެވެ. އޮފީހަށްދިއުމުގެ ވިސްނުންވެސް އޭރު އޮންނާނީ ތަހުނިޔާގެ ސިކުނޑިން ފުހެލެވިފައެވެ.
ގޭތެރޭގެ އަޑު މަޑުވެފައި އިރުކޮޅަކު އޮތްނަމަވެސް ، އެ ހަމަހިމޭންކަން ކަނޑުވައިލީ ނޫރުއެވެ.
އާދައިގެ ދިރިއުޅުމެއްގައި ނިކަމެތި ޙާލުގައި ދިރިއުޅޭބަޔަކު ، އެއަށްވުރެ ރަނގަޅު ޙާލަތަކަށް އެމީހުންގެ ދިރިއުޅުން ބަދަލުކުރަން ބޭނުންކަމަށްވަންޏާ ، ހިތްވެސް ބަދަލުވާން ޖެހެއެވެ. އުއްމީދުތައް އާކުރަން ޖެހެއެވެ. ވިސްނުމާއި ފިކުރުވެސް ބަދަލުކުރަން ޖެހެއެވެ.
" އެންމެ ފަހު ފަހަރަކަށް ، އަހަރެން ތި އެންމެންގެ ކިބައިން އެދޭ އެދުމެއް ތަކުރާރު ކޮށްލާނަމެވެ. ބައްޕާއެވެ ! އަހަރެންގެ ދިރިއުޅުން ، އަހަރެން ބޭނުންވާގޮތަކަށް ކުރިޔަށް ގެންދިއުމަށް ތަންދޭށެވެ ! އަހަރެންގެ ހިތުގައިވާ އުއްމީދުތަކާ ގުޅިފައިވާ މަންޒިލަށް އަހަރެން ވާޞިލުވާން ދޫކޮށްލަ ދޭށެވެ ! މައްސަލައެއް ނެތެވެ. ބަލިވެގެން ފައިދޮށަށް ވެއްޓޭނީ ނޫންހެއްޔެވެ. އަލުން އަނބުރާ ތެދުވާނީއެވެ. ދުނިޔެއަކީ އެކަހަލަ އެއްޗެކެވެ. އެކަމަކުވެސް ، އަހަރެންގެ ދިރިއުޅުން ، އަހަރެން ބޭނުންވާގޮތަށް އާބާދުކުރަން ދޫކޮށްލަ ދޭށެވެ ! އާދޭސްކޮށްފައި ބުނަމެވެ. " ނޫރު ބުނަމުން ގެންދިޔައެވެ.
އެއްވެސް މީހަކު ނޫރުގެ ވާހަކަޔަށް ޖަވާބެއް ނުދެއެވެ. އެންމެފަހުން ވަޞީމު އޭނާގެ ދަރިފުޅާ މުޚާތަބު ކުރިއެވެ.
ނޫރުއަށް ގޮވާލާފައި ވަޞީމު ބުންޏެވެ. ދަރިފުޅާއެވެ ! ބައްޕަގެ ހަމަ އެންމެ ވާހަކައެއް އަބަދުވެސް ހަނދާން ކުރާށެވެ. އަންހެނުންނަކީވެސް ، ދުނިޔޭގެ ދިރިއުޅުމުގައި މަތީ މަޤާމުތައް ޙާޞިލްކުރާ ބަޔެކެވެ. އެހެނަސް ، ދިރިއުޅެން މަޖުބޫރުވެފައިމިވާ މާޙައުލުގައި އަންހެނުންނަކީ ، ފިރިހެނުންނާ އެއްހަމައެއްގައި ފައިހަމަކޮށްލަން އެހާ ފަސޭހަބައެއްނޫނެވެ. އެކަން އަދިވެސް އެކި މުޖުތަމަޢުތަކުގައި އޮތީ އެގޮތަށެވެ. ފިރިހެނުން އުފައްދަވާފައިވަނީ ، އަންހެނުންނަށްވުރެ ބޮޑެތި ޒިންމާތަކެއް މަތިކުރައްވާފައެވެ. އަންހެނުންނަކީ ވަރަށް ނާޒުކު ބަޔެކެވެ. ފިރިހެނުންނާ ނުލައި އެބައިމީހުންގެ ދިރިއުޅުން އާބާދުކުރުމަކީ ، އަންހެނުންނަށް ދަތި އުނދަގޫ ކަމަކަށް ވާނެއެވެ. އޭގެ އިތުރަށް ، ޒަމާނަށް އައިސްފައިމިވާ ބަދަލުގައި ، އަންހެނަކަށް ކުރިއެރުންލިބި ، އެ އަންހެނާގެ ދިރިއުޅުން ތަރައްޤީވަމުންދިއުމަކީ ، ފިރިހެނުން އެހާ ފަސޭހައިން ބަލައިގަންނާނެ ކަމެއްނޫނެވެ. ނޫރުގެ ދިރިއުޅުން ބައްޓަންކުރަމުން ތިޔަގެންދަނީ ، އަމިއްލަވަންތަ ވިސްނުމެއްގައި ، އެހެން އެއްވެސްމީހަކާ އެއްގޮތް ގޮތަކަށް ނޫނެވެ. ބައްޕަ ބުނަން އޮތްހާވެސް އެއްޗަކީ ، ދަރިފުޅަށް ހުރިހާ ކާމިޔާބީއެއް އެދޭކަމެވެ. ހެޔޮ ހިތުންނެވެ. އެހެނަސް ، ދަރިފުޅަށް ލިބޭ ހަމަ ކޮންމެ ގެއްލުމަކީ އަދި ތަކުލީފަކީވެސް ބައްޕަގެ ހިތުގައިވެސް ވޭން އަޅާނެ ކަމެކެވެ. އަހަރެމެން އެއްވެސްމީހަކު ، ނޫރުއަށް ދެރައެއް ލިބޭކަށް ނޭދެމުއެވެ. ދާން ބޭނުމިއްޔާ ، ދަރިފުޅު ތިޔަދަތުރު ދާށެވެ. ދެން ، އަހަރެމެންގެ ތެރެއިން އެކަކުވެސް ދަރިފުޅެއް ނުހުއްޓުވާނެއެވެ. އެހެނަސް ، ދަރިފުޅު ތިދަނީ ކޮން މަޤްޞަދެއްގައިކަން ބައްޕަޔަށް ވަރަށް ސާފުކޮށް އެނގެއެވެ. ދަރިފުޅު ހުއްޓުވައިފިނަމަ ، އެކަމުން ހިތަށް އުނދަގޫވާނީވެސް އަހަރެމެންނަށެވެ. ދާށެވެ ! އަވަހަށް ދާށެވެ !
ބައްޕަގެ ވާހަކަތަކަށް ނޫރު ، އެއްވެސް އެއްޗެކޭ ނުބުނެއެވެ. ބައްޕަޔާ ދިމާއަށް ބަލަހައްޓައިގެން މަޑުމަޑުން އިނެވެ. ރައިދާ ތެދުވެ ، ހާރިސްގެ ކޮނޑުގައި އަތްއަޅައިލިއެވެ. އެތަނުން ދާން އޭނާ ބޭނުންވެފައިހުރިކަން އަންގައިލުމަށްޓަކައެވެ.
ހާރިސް ، ހިނގައިގަތުމުގެ ކުރިން ، އޭނާގެ ބައްޕަޔާ މުޚާތަބު ކުރިއެވެ.
" ބައްޕާއެވެ ! މީގެފަހުން ، ނޫރުގެ އެއްވެސް ކަމަކާ އަހަރެން އެއްވެސް ވަރަކަށް ނުބެހުމަށް ނިންމައިފީމެވެ. ނޫރުކުރާ އެއްވެސް ކަމަކަށް އަހަރެން ޗުއްޕުވެސް ނުބުނާނަމެވެ. ނޫރު ، ކުރަން ބޭނުންވާ ކޮންމެކަމެއްވެސް ކުރަންވީއެވެ. އަހަރެން އެއިން އެއްވެސްކަމަކާ މީގެފަހުން ނުބެހޭނަމެވެ. " ހާރިސް އޭނާގެ ވާހަކަ ނިންމައިލުމަށްފަހު ކޮޓަރިއާދިމާއަށް ހިނގައިގަތެވެ.
އިސްލާމްއާބާދަށް ތަހުނިޔާ އެދަނީ އަލަކަށްނޫނެވެ. އޭނާ ވަރަށް ކުޑައިރު ، މަންމައާއި ބައްޕައާއެކީ އިސްލާމްއާބާދަށް އައެވެ. މުރުތަޟާއަކީ ، އޮފީހުގެ މަސައްކަތުގައި ކޮންމެ ދެ އަހަރަކުން އެއްފަހަރު އިސްލާމްއާބާދަށް އަންނަންޖެހޭ މީހެކެވެ. އިސްލާމްއާބާދާ ދުރުގައި ދިރިއުޅެން ޖެހުނަސް ، އެތަނަށް އާދެވުމުން ، މުރުތަޟާގެ ހިތަށް ހަމަޖެހުމާއި އުފާވެރިކަން ލިބެއެވެ. އަމިއްލަ ވަޒަނަށް އާދެވޭކަމުގެ ހިތްހަމަޖެހުންފަދަ އުފާވެރިކަމެއް ލިބެއެވެ. ބޯޓުމަތީ ދެމީހުންވެސް ތިބީ ކަންބޮޑުވުމެއްގެ ތެރޭގައެވެ. ތަހުނިޔާއަށް އިރުއިރުކޮޅުން ނިދި ޖެހެއެވެ. ގިނަފަހަރަށް އަނގައިން ބުނަނީ މުރުތަޟާއެވެ. މުރުތަޟާގެ ވާހަކަތަކަށް ، ތަހުނިޔާ ބޯޖަހާލައެވެ. އެއްޗެއް ބުނަން ކޮންމެހެން ޖެހިއްޖިއްޔާ ވާހަކަ ދައްކާލައެވެ. ދަތުރު އެހާ ކުރެއްނޫނެވެ. މުރުތަޟާއާއި ތަހުނިޔާއާ ދެމީހުން ވާހަކަ ދައްކަނީ ވަރަށް މަދުންނެވެ. ދައްކާނެ މާގިނަ ވާހަކަތަކެއްވެސް އެދެމީހުންގެ ދެމެދަކު ނޯންނާނެއެވެ. އެއީ ރަބަރު ބޭންޑެއް އެއްޗެއްގައި އޮޅައިލިހެން ، ކުއްލިޔަކަށް އެއްކޮށްލައި ގުޅިގެންދިޔަ ދެމީހުންނެވެ. އެ ރަބަރަށް ވާންވި ހިސާބެއްގައި އިތުރަށް ވާންނުވެ ދެމި އޮންނާނެއެވެ. ބަނދެވުނު އެއްޗެއް ، ވަކިނުވެ އެކީގައި ހިފެހެއްޓިފައި އޮވެދާނެއެވެ.
އިސްލާމްއާބާދުގެ އެއަރޕޯޓުން ކާރުގައި ނައްޓައިލިފަހުންވެސް ، ބައެއްފަހަރަށް އެކަކު އަނެކަކަށް ކޮންމެވެސް އެއްޗެކޭ ބުނަމުން ، ގިނަފަހަރަށް ތައްބައްދައިގެން ތިއްބާ ، ޑްރައިވަރު ކުއްލިޔަކަށް ކާރު ހުއްޓައިލިއެވެ. އަދި ، އެހިސާބުން އެމީހުން ދެން ދާންޖެހޭނީ ހިނގައިފާކަމުގައި ބުންޏެވެ.
އެއީ ފަރުބަދަމަތީ ހިސާބެކެވެ. ހޮޓާހުރީ ފަރުބަދައެއްގެ ކުންނުމަތީގައެވެ. ފޯވީލް ޑްރައިވް އޭ އެކިޔާ ބިމަށްގަދަ ދުއްވާ އެއްޗިއްސަކަށްވެސް އެހިސާބަކަށް ނޭރެއެވެ. ޑްރައިވަރު ބުނިގޮތުގައި ކުރިން އެތަނަށް އަރަން އުޅުނު ދެތިން އުޅަނދު އެކޮޅުކޮޅުންޖެހި ވެއްޓިފައިވެސް ވެއެވެ. އަރަން ޖެހެނީ ހުރި ސީދަލަށް ތެދަށް ކަހަލަ ގޮތަކަށެވެ. އެއީ ، ހިނގާފައި އަރަންވެސް އުނދަގޫ މަގެކެވެ. އެމީހުން ދާންވާއިރަށް ލަގޭޖްތައް ގެންގޮސްދޭނެކަމަށް ޑްރައިވަރު ބުންޏެވެ. ތަހުނިޔާއާއި މުރުތަޟާ ، ކާރުން ފައިބައިގެން ހޮޓަލާދިމާއަށް ހިނގައިގަތެވެ.
މުރުތަޟާގެ ރަޙުމަތްތެރިން ، އެމީހުން ތިބެން އެ ހަމަޖެއްސީ ކޮންފަދަ އުނދަގޫ ތަނެއް ހެއްޔެވެ ؟ ކުރިޔަކުން މުރުތަޟާ އެހިސާބަކަށް ނާދެއެވެ. އެހެންކަމުން ، އެތާނގެ ޙާލަތެއް މުރުތަޟާއަކަށް ނޭނގެއެވެ. ސީދަލަށް ހުރެގެން އަރާއަރާ ތަހުނިޔާ ހުރީ ނޭވާކުރުވެ ވަރުބަލިވެފައެވެ. މުރުތަޟާގެ ރައްޓެހިން ، އެހާ އުނދަގުލާއި ތަކުލީފު ބޮޑުތަނެއް ހަމަޖެއްސީމަ ، ތަހުނިޔާ ޝަކުވާކޮށްގަތެވެ. އެކަމަކު ، އޭނާގެ ދިރިއުޅުމުގައި އޮތީ ހުސް ތަކުލީފާއި އުނދަގޫކަން އޭނާއަށް އިޙްސާސް ވެއެވެ. ކުރިޔަށް އޮތީ ކޮންފަދަ އުނދަގޫ ކަންތައްތަކެއްކަމެއްވެސް ނޭނގެއެވެ. ކުދިކިޔަމުން ، ތަހުނިޔާވެސް މުރުތަޟާ ފަހަތުން އަރަމުން ގެންދިޔައެވެ.
މުރުތަޟާއަށް އެއީ ވަރަށް ހިތްފަސޭހަ ތަނެކެވެ. އާދައިގެ ވަރަށްވުރެ ބޮޑަށް ފިންޏެވެ. ތަހުނިޔާގެ ފިޔަވަޅުތައް ލަސްވާން ފެށުމުން ، ވަރުބަލިވީތޯ މުރުތަޟާ ސުއާލުކުރިއެވެ. ދިރިއުޅުމުގައި އެކުގައިދާން ވަޢުދުވެގެން ކުރިޔަށްދާއިރު ، ތަކުލީފާއި އުނދަގުލާވެސް ކުރިމަތިލާން ޖެހޭނެކަން ، މުރުތަޟާ ، ތަހުނިޔާއަށް ހަނދާންކޮށްދިނެވެ. ތަހުނިޔާއަށް އިތުރަށް ކުރިޔަށް ހިނގައިގަންނަން އުނދަގޫވެގެން ގުދުވެލިއެވެ. އަދި އޭނާއަށް ދެން އިތުރަށް ކުރިޔަށް ނުހިނގޭނެކަމަށް ބުންޏެވެ.
މުރުތަޟާގާތަށް ހިނި އައެވެ. އަސްލުވެސް އެއީ އަރަން އުނދަގޫ މަގެކެވެ. މުރުތަޟާވެސް ހުރީ މާނޭވާ ލެވިފައެވެ. މުރުތަޟާ ، އޭނާގެ އަތް ތަހުނިޔާއާ ދިމާއަށް ދިއްކޮށްލިއެވެ. މުރުތަޟާގެ އަތުގައި ހިފައިލުމާއެކު ، ތަހުނިޔާ މަޑުމަޑުން މުރުތަޟާއާއެކު ހިނގައިގަތެވެ. އެވަގުތަކީ ، ތަހުނިޔާ ، މުރުތަޟާގެ ހަށިގަނޑާ އެންމެ ފުރަތަމަ ފަހަރަށް ގާތްވެލި ވަގުތެވެ. ( ނުނިމޭ )
Vaahaka v reethi. Sukuriyyaa. Umeedu kuran monday ge bai v avahan kiyaalan libeyne kaman. Vaahaka las vayyaa las'vaa sababu an'gaalaa deebala. Pls.
ވާހަކަ ލިޔެވުނަސް ، މެއިލްކޮށް އަޕްލޯޑް ކުރެވޭ ވަރަށްވުރެ އިންޓަރނެޓްގެ ކަންތައް ބޮޑު ޤައުމަކަށް ޗުއްޓީއެއްގައި އައިސް މިއުޅެވެނީ. ވާހަކަ ، ލަހުން ގެނެސްދެވޭތީ ވަރަށްބޮޑަށް މަޢާފަށް އެދެން . އެކަމާ އަޅުގަނޑުވެސް މިހުންނަނީ ވަރަށް ކަންބޮޑުވެފައި. ޗުއްޓީއެއްގައި އުޅުނަސް ، އެހެންޏާވެސް ވާހަކަ ގެނެސްދޭ ދުވަހު ، ވާހަކަ ގެނެސްދެވޭތޯ ވަރަށް ބަލާނަން. ޝުކުރިއްޔާ.